[1] O kɔ, Job kumana k'a bange don danga.
[2] A ko:
[3] Ne bange don ka halaki, ani su min y'a fɔ ko muso ye kɔnɔ ta denkɛ la.
[4] O don ka kɛ dibi ye, ka Ala to san fɛ, a kana a janto o don na k'a jate. Yeelen si kana bɔ o don ye.
[5] Dibi ni saya suma ka o minɛ, sankaba ka a datugu, dibi ka o tile minɛ k'a lasiran fo k'a naalo ta.
[6] Dibifin ka o su minɛ. A kana jate san dafa donw cɛma, a kana don kalo jatew la.
[7] Ɔwɔ, o don su ka kɛ bange kɛbali ye, ɲagalikan si kana mɛn o su fɛ.
[8] Tile dangabaaw ka o tile danga, olu minw bɛ Leviatan lawuli cogo dɔn.
[9] O don fitiri dala dolow ka don dibi la. A ka dugujɛ makɔnɔ fuu. A kana kɛnɛbɔda yeelen ye,
[10] katuguni o su ma mɔgɔ bali ka ne kɔnɔ ta ka ne ɲɛ kisi bi tɔɔrɔ ma.
[11] Mun y'a to ne ma sa ne ba kɔnɔ, k'a to ne kana ninakili ne bange tuma la?
[12] Mun y'a to ne sigira sen kan? Mun y'a to ne ye sin sɔrɔ k'a min?
[13] K'a masɔrɔ sisan tun na a sɔrɔ ne dalen lafiya la ne kaburu kɔnɔ. Ne tun na kɛ sunɔgɔ la, ne lakanalen tun na sɔrɔ
[14] masakɛw ni dugukolo kan mɔgɔbaw cɛma, olu minw ye kaburu sow jɔ u yɛrɛw ye,
[15] ani masakɛw fɛ minw ka sow falen bɛ sanu la, ni u ye u ka masaya sow fa ni warijɛ ye.
[16] Ni o don tun ma kɛ, ne tun tɛna kɛ fewu, ne tun na kɛ i ko den dafabali min bɛ ɲɛmadogo mɔgɔ fɛ, i ko den min ma kɛnɛ ye.
[17] Mɔgɔ jugu tɛ se ka ko jugu kɛ mɔgɔ si la yen, mɔgɔ sɛgɛnnenw barika dɛsɛlenw bɛ lafiya yen.
[18] Jɔnw bɛɛ bɛ hɛrɛ la yen, u tɛ u tɔɔrɔbaaw mankan mɛn tun.
[19] Mɔgɔ misɛnw ni mɔgɔbaw bɛɛ ka kan yen, jɔn tɛ a makɛ kɔrɔ tun.
[20] Mun y'a to kɛnɛ bɛ bɔ mɔgɔ tɔɔrɔlenw ye ka ɲɛnamaya di dusu kasitɔw ma?
[21] U bɛ saya makɔnɔ k'a sɔrɔ a bɛ boli u ɲɛ, u bɛ saya ɲini ka tɛmɛn nafoloba kan.
[22] Ni u bɛ don kaburu kɔnɔ, u bɛ ɲagali kosɛbɛ ka nisɔndiya.
[23] Mɔgɔ min tɛ a taa yɔrɔ dɔn ani Ala ye min ka siraw bɛɛ datugu, mun y'a to kɛnɛyeelen bɛ bɔ o ye?
[24] Ne nwunankan ye ne ka dumuni ye, ne kasikan bɛ bɔ, a tɛ dabila.
[25] Ne tun bɛ siran tɔɔrɔ minw ɲɛ, olu sera ne ma, ani ne tun bɛ siga bɔnɛ ko minw na, olu bɛɛ sera ne ma.
[26] Ne bɔnɛna hɛrɛ ni marali ani lafiya la. Ne koolilen don ni tɔɔrɔ kow ye.