[1] Ayiwa Job ye dɔ fara a ka ntalen kan, a ko:
[2] Aa, ni a tun kɛra ko Ala tun bɛ ne fɛ i ko waati tɛmɛnnenw, Ala ye ne mara don minw na,
[3] a ye a ka yeelen bɔ ne kun na tuma min na, a ka yeelen ye ne ɲɛ minɛ dibi la tuma min na.
[4] Ni ne tun bɛ se ka barika sɔrɔ i ko ne kamalenma cogo, Ala ye ne kunnandiya tuma min na.
[5] Sebaayabɛɛtigi tun bɛ ne fɛ yen, ne denw tun bɛ ne lamini.
[6] O tuma la ne tun bɛ ne senw ko nɔnɔ la, farakurun tun bɛ tulu bɔ ne ye fo ka woyo.
[7] Ni ne bɔra ka ne jɔ dugu donda la ka sigi yɔrɔ dila ne yɛrɛ ye fɛrɛkɛnɛ la,
[8] kamalenw ye ne ye ka bɔ ne kɔrɔ, cɛkɔrɔbaw wulila ka u jɔ.
[9] Faamaw ye kuma dabila, ka u bolo biri u da la.
[10] Kuntigiw kan tun bɛ mada, u kan tun tɛ mɛn tun.
[11] Tulo min ye ne kan mɛn, o ye duba ta ne ye. Ɲɛ min ye ne ye, o ye seereya kɛ.
[12] Faantan minw ye dɛmɛni ɲini, ne ye olu dɛmɛ, ani dɛmɛbaa tun tɛ falatɔ minw na.
[13] Mɔgɔ min tun bɛ ɲini ka sa, o ye duba ta ne ye. Muso cɛ salen ɲagalila ne ko la.
[14] Tilenneya kɛra ne ka dulɔki ye, ka kɛ ne ka dulɔkiba ni ne kunna jala ye.
[15] Ne kɛra fiyentɔw ɲɛw ye, ka kɛ sen kelenw senw ye.
[16] Ne kɛra kɔlibaatɔw fa ye, ka dunanw ka kiri kow sɛgɛsɛgɛ.
[17] Ne ye mɔgɔ tilenbaliw ntagakolo kari, ka u ka fɛn minɛlenw bɔsi ka bɔ u da la.
[18] Ne y'a fɔ fana ko: «Ne na sa ka ne to ne ka ɲaa kɔnɔ. Ne si tilew na caya i ko kɔgɔji dala cɛncɛn.
[19] Ne dili donna fo ji dun na, ngomi bɛ su bɛɛ kɛ ne bolow la.
[20] Ne nɔɔrɔ bɛ kuraya tuma bɛɛ, ne ka bɔnnikɛ kala bɛ barika kura sɔrɔ tuma bɛɛ ka taa ɲɛ.»
[21] Mɔgɔw ye u tulo majɔ ka ne makɔnɔ, u ye u makun ka ne ka laadili mɛn.
[22] Ni ne tun tilara kuma la, u si tun tɛ se ka ne jaabi. Ne ka kuma tun bɛ toni u kan i ko ngomiji.
[23] U ye ne makɔnɔ i ko mɔgɔ bɛ sanji makɔnɔ cogo min na. U ye u da yɛlɛ i ko dugukolo bɛ sanji kun fɔlɔ sɔrɔ cogo min na.
[24] U jigi tigɛra tuma min na, ne nisɔndiyara, ne ma ɲɛnasisi u kɔrɔ tuma si.
[25] A diyara ne ye ka kɛ u kuntigi ye. Ne sigira u cɛma i ko masakɛ bɛ sigi a ka kɛlɛbolow cɛma cogo min na, i ko dusu kasilenw dusu saalobaa.