[1] Zofar min bɔra Naama, o ko:
[2] I ka kuma ye miirili bila ne la, ka ne jija ka jaabili kɛ.
[3] Kɔrɔfɔli min bɛ ne maloya, ne ye o mɛn. Ne ka faamuli bɛ jaabili di ne ma.
[4] I k'a dɔn kabini tuma jan, kabini Ala ye Hadamadenw da dugukolo kan,
[5] ko mɔgɔ jugu ka se sɔrɔli tɛ mɛn dugukolo kan, Ala ɲɛsiranbali ka ɲagali ye waati dɔɔnin ye.
[6] Hali ni a y'a kuncɛ bonya fo ka se san fɛ, hali ni a kunkolo taara se sankaba ma,
[7] a na tunun dugukolo rɔ i ko ɲaman ton, minw y'a ye, olu n'a fɔ ko: «A bɛ mini?»
[8] A bɛ taa san fɛ i ko sugo, a tɛ se ka ye tun, a bɛ taa i ko sufɛ yeli fɛn.
[9] Ɲɛ min y'a ye, o tɛna a ye tun, a sigi yɔrɔ tɛna a ye tun.
[10] A denw na kolo faantanw ye, a bolo ye nafolo minw bɔsi, a na olu kɔsegin.
[11] Barika min ye a kolo gɛlɛya a kamalenma, a ni o na don buguri la.
[12] Ni ko jugu tun ka timi a da la, ni a y'a dogo a nɛn jukɔrɔ,
[13] ni a y'a lamaga, ni a ma sɔn k'a fili, nka a y'a mara a da kɔnɔ,
[14] a ka dumuni na yɛlɛma a nugu la, ka yɛlɛma ka kɛ fɔnfɔnnin baga ye a kɔnɔ.
[15] A ye nafoloba min kunun, a na o fɔɔnɔ, Ala na a bɛɛ bɔ a kɔnɔ.
[16] A na fɔnfɔnnin baga min, dankalan nɛn na a faga.
[17] Hali ni di ni nare bɛ woyo i n'a fɔ kɔji ni baji, a ɲɛ tɛna o ye.
[18] A ye fɛn min sɔrɔ baara la, a na o kɔsegin, a tɛna o dun. A ye bolo fɛn min sɔrɔ, a tɛna ɲagali o kosɔn.
[19] K'a masɔrɔ a ye i ban faantanw la ka u cɔngɔ a sen kɔrɔ. A ye mɔgɔw ka sow ci, a ma sɔn ka u jɔ.
[20] Dan tɛ a ka wasabaliya la, nka a tɛna to ni a diyaɲe fɛn si ye.
[21] A ma fɛn si to a ka wasabaliya kosɔn, o de kosɔn a ka hɛrɛ tɛ mɛn.
[22] Hali k'a sɔrɔ fɛn caman b'a fɛ, a na degun. Sɛgɛnbaatɔw na u bolow bi a kan.
[23] Ni a kɔnɔ fara tuma min na, Ala ka dimiya na se a ma o tuma la. A na bi a kan ka don a sogo la.
[24] Ni a bɛ boli kɛlɛkɛ minan nɛgɛlama ɲɛ, nsiranɛgɛ bɔnnikɛ kala na a sɔgɔ.
[25] A na biɲɛden sama ka bɔ a farikolo la, nɛgɛ nun bɔlen yɛrɛntɔ na a biɲɛ cɛci. Saya ɲɛsiranba na bi a kan.
[26] Bɔnɛ dibima na a ka nafolo bɛɛ ta, mɔgɔ ma tasuma min tugu, o n'a jeni k'a ban. Fɛn o fɛn tora a ka finiso kɔnɔ, o bɛɛ na jeni.
[27] Sankolo na a ka tilenbaliya ko jira, dugukolo na wuli a kama.
[28] A ka so kɔnɔ fɛnw bɛɛ na cɛ ka taa, u na woyo ka taa Ala ka dimiya don na.
[29] Ala ye ko min latigɛ mɔgɔ jugu ɲɛ, o filɛ o ye, Sebaayabɛɛtigi ye o latigɛ ka kɛ a ciyɛn ye.