[1] Matigi ye Job jaabi k'a to fiɲɛba cɛma ko:
[2] I cɛ siri sisan i ko cɛ ja gɛlɛn. Ne na i ɲininka, i ka ne jaabi.
[3] I b'a fɛ ka ne ka kiri ko yɛlɛma wa? I b'a fɛ ka ne jalaki, walisa i yɛrɛ ka jo sɔrɔ wa?
[4] Yala e bolo bɛ i ko Ala bolo wa? A bɛ sankulukan bɔ cogo min na, i bɛ se o la wa?
[5] I ka i yɛrɛ masiri ni i ka sɛbɛya ni i bonyaba ye, ka i masiri ni nɔɔrɔ ni saramaya ye.
[6] I ka i ka dimiya farinma bɔn kuncɛbaw kan ka u majigin.
[7] Ɔwɔ, i ka kuncɛbaw bɛɛ kelen-kelen filɛ ka u majigin. I ka mɔgɔ juguw cɔngɔ yɔrɔ nin kelen.
[8] I ka u bɛɛ don buguri la ɲɔgɔn fɛ, ka u ɲɛdaw datugu kaburu dibi la.
[9] O tuma la, ne fana na i tanu, ko i yɛrɛ bolo bɛ se ka i kisi.
[10] I ka mali filɛ, ne ye o da i ko e. Ale bɛ bin dun i ko misi.
[11] A filɛ, a barikaba bɛ a solo la, a fanga bɛ a kɔnɔbara fasaw la.
[12] A bɛ a ku wuli i ko sedere sun. A woro fasaw tugutugulen bɛ ɲɔgɔn na.
[13] A kolow bɛ i ko nsiranɛgɛ buru kolow, a senkalaw bɛ i ko nɛgɛfin bere kunbabaw.
[14] Ala bolo baara nɔ bɛɛ la kabakoma don. A Dabaa dɔrɔn bɛ se ka se sɔrɔ a kan.
[15] Kuluw bɛ bin jalen bɔ a ye. Kungo kɔnɔ waraw bɛɛ bɛ tulon kɛ a kɛrɛ fɛ.
[16] A bɛ i da lotus sunw kɔrɔ, a bɛ i dogo bɔ tu la ani falaw kɔnɔ.
[17] Lotus sunw suma bɛ kɛ a kun na, ani kɔ da la jirisun minw kɛra ka a lamini.
[18] Hali ni ba karila, a tɛ siran fewu. Hali ni Jurdɛn ba woyo sera fo a da ma, a ja tɛna tigɛ.
[19] Ka a ɲɛ to i la, jɔn bɛ se ka a minɛ? Jɔn bɛ se ka a minɛ ni jɔ ye ka a nun sɔgɔ?
[20] I bɛ se ka ji la sogoba Leviatan minɛ ni dɔlen ye ka juru siri a nɛnkun na wa?
[21] I na jurukisɛ don a nun na wa? I na a bonbon sɔgɔ ni dɔlen ye wa?
[22] A na i deli kosɛbɛ wa? A na kuma duman fɔ i ye wa?
[23] A na layidu ta i ye, ko a na kɛ i ka jɔn ye badaa wa?
[24] I na tulon kɛ a fɛ i ko kɔnɔ, k'a siri k'a kɛ i denmuso npogotigiw ɲɛnajɛlan ye wa?
[25] Mɔnnikɛlaw na a kɛ jago kun ye wa? I na ale tilatila jagokɛlaw cɛ wa?
[26] I na a wolo sɔgɔ ni nɛgɛ nun bɔlenw ye ka a kunkolo sɔgɔ ni tama ye wa?
[27] I bolo da a kan dɔrɔn ni i b'a fɛ k'a kɛlɛ, min mana bɔ o la, i tɛna o dɔ wɛrɛ kɛ tun.
[28] I jigi na tigɛ, k'a masɔrɔ a yeli dama bɛ i ja tigɛ ka i labi duguma.