[1] Elihu kumana ko kura, a ko:
[2] Ayiwa, hakilitigiw, aw ka ne ka kumaw lamɛn, mɔgɔ ko dɔnnaw, aw ka aw tulo majɔ ka ne lamɛn,
[3] k'a masɔrɔ tulo de bɛ kiri tigɛ kuma kan, i ko nɛnkun bɛ dumuni fɛn nɛnɛ cogo min na.
[4] Ko min tilennen don, an ka o ɲɛnatɔmɔ, ko min ka ɲi, an ka o dɔn ɲɔgɔn fɛ.
[5] Job y'a fɔ ko a tilennen don, nka Ala banna a ka tilennenya ma,
[6] ko jo bɛ a fɛ nka a jatera nkalontigɛla ye. A ka tɔɔrɔ dimi juguyara, k'a sɔrɔ a ma jurumu kɛ.
[7] Job bɔɲɔgɔnko mɔgɔ jumɛn bɛ yen, min bɛ nparabɔli min i ko ji,
[8] ka taama tilenbaliya kɛbaaw fɛ, ka kojugukɛlaw kɛ a taamaɲɔgɔn ye?
[9] K'a masɔrɔ a b'a fɔ ko: «Nafa tɛ Ala ɲinili la.»
[10] O de kosɔn aw ka ne ka kuma lamɛn, aw faamulikɛlaw. Ala ni kojugukɛlaw cɛ ka jan, Sebaayabɛɛtigi ni tilenbaliya cɛ ka jan.
[11] A bɛ mɔgɔw sara ka kɛɲɛ ni u ka kɛwalew ye, ka u bɛɛ kelen-kelen sara ka kɛɲɛ ni u ka taama cogo ye.
[12] Ala tɛ ko jugu kɛ fewu, Sebaayabɛɛtigi tɛ kiri tilenbali tigɛ.
[13] Jɔn ye dugukolo kuntigiya di a ma? Jɔn y'a kɛ a kɔlɔsibaa ye?
[14] Ni a tun ma miiri foyi la a yɛrɛ kɔ, ni a tun y'a yɛrɛ Ni ni a dafiɲɛ minɛ ka kɔsegin a yɛrɛ ma,
[15] dafɛnw bɛɛ tun na sa ɲɔgɔn fɛ, Hadamadenw tun na kɔsegin buguri la.
[16] Ayiwa, ni i bɛ faamuli kɛ, i ka ne lamɛn. I ka i tulo majɔ ne ka kumaw la.
[17] Min bɛ tilennenya koniya, o bɛ se ka sigi masaya la wa? I na tilennen barikama jalaki wa?
[18] A b'a fɔ masakɛ ye ko: «Kojugukɛla,» k'a fɔ faamaw ye ko: «Aw tilennen tɛ.»
[19] Ala tɛ mɔgɔ bɔ mɔgɔ la, a tɛ fɛntigi fisaya ka tɛmɛn faantan kan, k'a masɔrɔ u bɛɛ ye a bolo baara nɔ ye.
[20] Waati dɔɔnin, u bɛɛ na halaki. Mɔgɔw bɛna yuguyugu ka ban dugu tila fɛ. Mɔgɔ barikamaw bɛ ban k'a sɔrɔ mɔgɔ wɛrɛ bolo ma da u kan.
[21] K'a masɔrɔ Ala ɲɛw yɛlɛlen don ka mɔgɔ filɛ, a bɛ mɔgɔ senda kow bɛɛ kɔlɔsi.
[22] Dibi wala saya suma tɛ yen ka kɛ tilenbaliya kɛbaaw dogo yɔrɔ ye.
[23] Ala mago t'a la ka mɔgɔ filɛ siɲɛ fila walisa ka na n'a ye a ka kiri yɔrɔ la.
[24] A bɛ barikamaw karikari ni sɛgɛsɛgɛli tɛ ka dɔ wɛrɛw sigi u nɔ na,
[25] k'a masɔrɔ a bɛ u ka kɛwalew dɔn. A bɛ u dabiri su fɛ ka u ɲɔɲɔ.
[26] A bɛ u gosi mɔgɔw bɛɛ ɲɛ na i ko mɔgɔ tilenbali,
[27] k'a masɔrɔ u murutira a ma, u ma sɔn k'a ka siraw taama.
[28] U y'a to faantanw kasikan ka se a ma, a ye sɛgɛnbaatɔw kasikan mɛn.
[29] Ni a ye hɛrɛ layidu ta, jɔn bɛ se k'a jalaki? Ni a y'a ɲɛda dogo, jɔn bɛ se k'a ye? A bɛ siya ni mɔgɔ kelen kɔlɔsi cogo kelen na,
[30] walisa ka Ala ɲɛsiranbaliw bali ka sigi kuntigiya la, ani minw bɛ janw da mɔgɔw ɲɛ.
[31] Mɔgɔ bɛ se k'a fɔ Ala ye wa ko: a tɔɔrɔla ko a tɛ jurumu kɛ tun,
[32] ko a tɛ se ka min ye, Ala ka o jira a la, ko ni a ye ko jugu kɛ, a tɛna o kɛ tun?
[33] Ala na mɔgɔ sara ka kɛɲɛ ni a sago ye wa? E de bɛ ban a la. Ɲɛnatɔmɔli bɛ e de ma, ne tɛ. O de kosɔn, i bɛ ko min dɔn, i ka o fɔ.
[34] Mɔgɔ hakilimanw n'a fɔ ne ye, mɔgɔ hakilitigi minw bɛ ne ka kumaw lamɛn kɔni,
[35] olu ko: «Job tɛ kuma dɔnniya ko la, faamuli tɛ sɔrɔ a ka kumaw la.»
[36] Ɔwɔ, Job ka kɔrɔbɔ fo ka se a dan na, k'a masɔrɔ a ye jaabili kɛ i ko mɔgɔ juguw,
[37] k'a masɔrɔ a bɛ murutili kura fara a ka jurumu kan. A bɛ tɛgɛrɛ fɔ an cɛma, a bɛ to ka Ala kɔrɔfɔ tuma bɛɛ.