[1] Ayiwa Elihu y'a fɔ ko kura ko:
[2] I jɔ dɔɔnin fɔlɔ, ne ka i kalan k'a masɔrɔ ne b'a fɛ ka kuma wɛrɛ fɔ i ye Ala ta fan fɛ.
[3] Ne na ne ka dɔnniya ɲini yɔrɔ jan k'a fɔ ko ne Dabaa tilennen bɛ.
[4] Tiɲɛ la, ne ka kumaw tɛ nkalon ye. Dɔnniya sɛbɛ tigi bɛ i ɲɛ fɛ yan.
[5] A filɛ, Ala ye Sebaayabɛɛtigi ye, nka a tɛ mɔgɔ si mafiɲɛya. Ala ka sebaaya ka bon a ka hakilitigiya barika la.
[6] A tɛ sɔn mɔgɔ jugu ɲɛnama ka to fewu. A na tiɲɛ di faantanw ma.
[7] A tɛ a ɲɛ cɛ ka bɔ mɔgɔ tilennenw la, a bɛ sigi yɔrɔ di u ma masakɛw fɛ masasigilan kan. Ala bɛ olu sigi badaa walisa u ka kɔrɔta.
[8] Ni olu donna nɛgɛ la ka siri ni tɔɔrɔ juruw ye,
[9] a na u ka ko kɛlen jira u la, u ka jurumu ni u ka kuncɛbaya kow kɔni.
[10] Ayiwa, a na u tulo dayɛlɛ ka lasɔmili kumaw lamɛn, ka u laadi ko u ka sira juguw bila.
[11] Ni u y'a lamɛn ka baara kɛ a ye, u na u si tilew dafa hɛrɛ la, u si sanw na kɛ ni ɲagali ye.
[12] Nka ni u ma a lamɛn, u na faga ni npan ye, u na halaki u ka tulo gɛlɛya la.
[13] Ni minw dusukun ma siran Ala ɲɛ, olu bɛ u yɛrɛw don dimiya la. Ni Ala bɛ u siri, u tɛ kasi a nɔ fɛ.
[14] U denmisɛnma bɛ sa, u bɛ sa i ko jatɔw.
[15] Nka Ala bɛ mɔgɔ tɔɔrɔlenw kisi halakili ma ka u kalan ni bɔnɛ ye.
[16] E yɛrɛ fana, a na i sama ka bɔ tɔɔrɔ la, a na i bila lafiya yɔrɔ la. I ka tabali na fa dumuni tulumaw la.
[17] Nka ni i ye mɔgɔ jugu cogo ta kiri la, kiri ni jalaki bɛ bi i kan.
[18] Dimiya kana i don nparabɔli la, kunmabɔli sara bonya kana i lafili.
[19] I na kisi i ka tɔɔrɔw ma i ka fɛntigiya kosɔn wa? I tɛna tila i ka sanu ni i ka sebaaya barika la.
[20] I kana kɔrɔtɔ su koli la, o de bɛ mɔgɔw bɔ u ka yɔrɔ la.
[21] I yɛrɛ kɔlɔsi tilenbaliya kɛli ma, k'a masɔrɔ i ye o ɲɛnatɔmɔ ka tɛmɛn tɔɔrɔ kan.
[22] A filɛ, Ala ka bon, a ka sebaaya ka bon. Jɔni bɛ mɔgɔw kalan i ko ale?
[23] Jɔni bɛ se ka sira jira Ala la? Jɔni bɛ se k'a fɔ a ye ko a ye tilenbaliya koba kɛ?
[24] I ka a ka kɛwalew bonya i dusukun na, Hadamadenw bɛɛ ka a tanuli dɔnkili da.
[25] Mɔgɔ bɛɛ bɛ u filɛ, mɔgɔ bɛ u ye ka a to yɔrɔ jan.
[26] Ɔwɔ, Ala ka bon, a ka bonya tɛmɛnna an hakili la miiriliw kan. Ale tilew dama tɛ dɔn.
[27] A bɛ jiw sama dɔɔnin dɔɔnin ka taa san fɛ, olu bɛ kɛ sanji ye ka bɔ a ka sankabaw la.
[28] Sankabaw bɛ a bila ka woyo, a bɛ tonitoni mɔgɔw caman kan.
[29] Jɔn bɛ se ka sankaba fɛnsɛ cogo dɔn, ani sankulukan min bɛ bɔ Kɔrɔtalenba sigi yɔrɔ la?
[30] A filɛ, a bɛ a ka kɛnɛyeelen fɛnsɛ a fan bɛɛ la ka a yɛrɛ dogo kɔgɔji jukɔrɔ.
[31] A bɛ kiri tigɛ mɔgɔw kan o cogo de la, a bɛ dumuni caman di u ma.
[32] A bɛ san yɛgɛyɛgɛ minɛ a bolo ka o ci ka taa a juguw gosi.
[33] A mankan bɛ a nali ko fɔ. Baganw fana b'a dɔn ko a bɛ na.