[1] Ayiwa, ne ɲɛ ye o bɛɛ ye, ne tulo y'a mɛn k'a faamu.
[2] Aw bɛ min dɔn, ne fana bɛ o dɔn. Ne ni aw si man fisa ni si ye.
[3] Nka ne b'a fɛ ka kuma Sebaayabɛɛtigi fɛ, ne b'a fɛ ka ne yɛrɛ lafasa Ala ɲɛ kɔrɔ.
[4] Aw kɔni bɛ nkalon miiri aw kɔnɔ, aw bɛɛ ye furakɛla nafantanw ye.
[5] Ni aw tun bɛ aw makun, o tun na kɛ aw niyɔrɔ ye hakilitigiya la.
[6] Ne bɛ aw deli ko aw ka ne ka fɔta lamɛn, ka aw tulo majɔ ne dala kumaw la.
[7] Aw na kuma tilenbali fɔ Ala tɔgɔ la, ka nanbara kow fɔ a kosɔn wa?
[8] Aw bɛ aw yɛrɛw bila Ala nɔ na ka kɛ a lafasabaa ye wa?
[9] Ni a ye aw sɛgɛsɛgɛ, a na jo di aw ma wa? Aw na se k'a lafili i ko aw bɛ mɔgɔ lafili cogo min na wa?
[10] Ni aw bɛ mɔgɔ bɔ mɔgɔ la dogo la, siga t'a la, a na aw kɔrɔfɔ.
[11] A nɔɔrɔ tɛna aw lasiran wa? A ɲɛsiran tɛna aw sɔrɔ wa?
[12] Aw ka kuma kɔrɔmaw ye bugurijɛ ntalenw ye, aw ka yɛrɛ lafasa kumaw ye kɛlɛ kunbɛn kogo bɔgɔlamaw ye.
[13] A' ye aw makun ka ne to yen. Ne b'a fɛ ka kuma. Fɛn min bɛ ka ne sɔrɔ, o ka ne sɔrɔ.
[14] Mun kosɔn ne ka ne farisogo ta ni ne ɲinw ye? Ayi, ne bɛ ne ni di.
[15] Ayiwa, a na ne faga, jigi si tɛ ne la tun, o bɛɛ n'a ta, ne bɛ ne taama cogo lafasa a ɲɛ kɔrɔ.
[16] O na ne ka kisili ko yɛrɛ nɔgɔya, k'a masɔrɔ mɔgɔ nɔgɔlenw tɛ se ka jɔ ale ɲɛ kɔrɔ.
[17] Aw ka aw tulo majɔ, aw ka aw tulo majɔ ne ka kumaw la. Aw ka aw tulo majɔ ka ne ka kuma fɔtaw lamɛn.
[18] A filɛ sisan, ne ye ne ka kuma labɛn. Ne y'a dɔn ko jo bɛ ne fɛ.
[19] Mɔgɔ dɔ na ne sɔsɔ wa? O tuma la ne na ne makun ka saya makɔnɔ.
[20] Nka Ala, i ka fɛn fila kɛ ne ye. Ne tɛna ne dogo i la.
[21] I ka i bolo mabɔ ne la, i ɲɛsiranba kana ne ja tigɛ.
[22] O kɔ, i ka ne wele, ne na i jaabi, wala ne fɔlɔ na kuma, i ka ne jaabi.
[23] Ne ye tilenbaliya ni jurumu kɛ siɲɛ joli? I ka ne ka fililiw ni ne ka jurumuw jira ne la.
[24] Mun y'a to i bɛ i dogo ne la ka ne jate i jugu ye?
[25] Fiɲɛ bɛ taa ni jirifura burulen min ye, i na o gosi wa? I na bin jalen nɔgɛn wa?
[26] Mun y'a to i bɛ tɔɔrɔ kunamanw sɛbɛn ne kama ka ne denmisɛnma ka tilenbaliya kow kɛ ne ciyɛn ye?
[27] E min ye ne senw don nɛgɛ la ka ne ka kow ɲɛnabɔ, ka danw tigɛ ne senw ye,
[28] ne farisogo bilen filɛ buguri la i ko jiri tolilen, i ko fini min bɛ sɔgɔ nkɔbɔ fɛ.