[1] Ayiwa Job, i ka ne ka kuma lamɛn, ka i tulo majɔ ne ka kumaw bɛɛ la.
[2] Ɔwɔ, ne bɛ ne da yɛlɛ, ne nɛn na lamaga ne da kɔnɔ.
[3] Ne dala kumaw bɛ ne dusukun ka tilennenya ko fɔ. Ne bɛ tiɲɛ min dɔn, ne dawolow na o de fɔ.
[4] Ala Ni de ye ne da, Sebayabɛɛtigi dafiɲɛ ye ɲɛnamaya di ne ma.
[5] Ni i bɛ se, i ka ne jaabi. I ka i yɛrɛ lafasa ne ɲɛ kɔrɔ, i ja gɛlɛyalen ka i jɔ.
[6] A filɛ, ne ye i bɔɲɔgɔnko ye Ala ɲɛ kɔrɔ, ne fana dilara ka bɔ bɔgɔ la.
[7] O de kosɔn, kun t'a la i ka yɛrɛyɛrɛ ne ɲɛ kɔrɔ, ne fanga tɛna digi i la.
[8] Ayiwa i y'a fɔ ne tulo kɔrɔ, ne ye i ka kuma mɛn,
[9] ko i jɛlen don, jurumu tɛ i la, ko i jalakibali don, tilenbaliya ko si tɛ i la.
[10] O bɛɛ n'a ta, i ko Ala bɛ cogo ɲini ka i jalaki, ko a ye i jate a jugu ye.
[11] Ko a bɛ i senw don jiri la ka i ka ko kɛtaw bɛɛ kɔlɔsi.
[12] Jo tɛ i fɛ o ko la, k'a masɔrɔ Ala ka bon mɔgɔ ye.
[13] Mun y'a to i bɛ a sɔsɔ, ko a tɛ a yɛrɛ ka kɛtaw fɔ i ye?
[14] Ala kumana siɲɛ kelen, hali siɲɛ fila, nka mɔgɔ m'a lamɛn.
[15] Ni sunɔgɔ ye mɔgɔ minɛ tuma min na, ka u to u ka dali dlan kan, Ala bɛ kuma u fɛ sugo la ani yeli fɛnw na.
[16] O tuma la a bɛ mɔgɔw tulo dayɛlɛ ka u lasɔmi k'a jɛya,
[17] walisa a ka a yɛlɛma ka mabɔ a taama cogo jugu la, ka a mabɔ kuncɛbaw la,
[18] walisa ka a ni kisi dingɛ dunba ma, ani ka a ni kisi npan ka fagali ma.
[19] Mɔgɔ bɛ latilen ni bana ye fana k'a to a ka dalan kan, a kolow bɛɛ b'a dimi.
[20] A bɛ ɲigin dumuni la, dumuni fɛn timima man di a ye fewu.
[21] A bɛ fasa ka ta'a fɛ, a kolo minw tun tɛ ye, olu bɔra kɛnɛkan sisan.
[22] A ni bɛ kɛ saya da fɛ, a ni donna halakili mɛlɛkɛ bolo.
[23] Nka ni mɛlɛkɛ kelen sɔrɔla o cɛ kɛrɛ fɛ, mɛlɛkɛ kelenpe ka bɔ Ala ka mɛlɛkɛ sorona donna waa kelen cɛma, ka tilennenya sira jira o cɛ la,
[24] o tuma la mɛlɛkɛ bɛ hinɛ a la k'a fɔ Ala ye ko: «I kana a to a ka don kaburu kɔnɔ. Ne ye cogo sɔrɔ ka a tila.»
[25] Ayiwa a farisogo bɛ kuraya ka tɛmɛn denmisɛn farisogo cogo kan. A bɛ segin a denmisɛnma cogo la.
[26] A bɛ Ala deli, Ala na a jaabi, a b'a to a ɲɛ kɔrɔ walisa k'a ɲɛda ye ni ɲagali ye. A b'a minɛ i ko mɔgɔ tilennen.
[27] A bɛ dɔnkili da mɔgɔw ɲɛ na ko: «Ne ye jurumu kɛ ka tilennenya bila, ne ma sara o la.
[28] Ala ye ne kunmabɔ walisa ne kana don kaburu kɔnɔ. Ne ni na ɲɛnamaya kɛnɛyeelen na tun.»
[29] Ala bɛ min kɛ, o filɛ o ye. A bɛ o kɛ siɲɛ fila, siɲɛ saba mɔgɔ ta fan fɛ,
[30] walisa ka a labɔ kaburu kɔnɔ, walisa a ka ɲɛnamaya ka kɛnɛyeelen sɔrɔ.
[31] Job, i tulo majɔ ka ne lamɛn, i makun, ne na kuma.
[32] Ni i b'a fɛ ka fɛn dɔ fɔ, i ka ne jaabi. I ka kuma k'a masɔrɔ ne b'a fɛ i tilennen ka sɔrɔ.
[33] Ni kuma tɛ i fɛ, i ka ne lamɛn. I ka i makun, ne na i kalan hakilitigiya la.