[1] Ayiwa, ne ka kɔrɔ mɔgɔ minw ye, olu bɛ yɛlɛ bɔ ne la sisan, ne tun tɛ sɔn minw faw ni ne ka wuluw ka taa ne ka sagaw nɔ fɛ.
[2] Olu bolo barika bɛ se ka ne nafa cogo di? Barika si tɛ u la.
[3] U fasara kɔli ni kɔngɔ fɛ. U bɛ boli ka taa yɔrɔ jalen na, yɔrɔ jintan min bilara kabini tuma jan.
[4] U bɛ kungo la ɲugu fɔri jiri misɛnw cɛma, ka baga sen ka a dun.
[5] U bɛ gɛn ka bɔ mɔgɔw cɛma, mɔgɔ bɛ pɛrɛn u nɔ fɛ, i n'a fɔ u ye sonyali kɛ.
[6] U bɛ dogo kuluw furancɛw la, wow kɔnɔ faraw cɛma.
[7] Mɔgɔw bɛ u kan mɛn jirininw cɛma. U bɛ gɛrɛ ɲɔgɔn na nwɔni sunw kɔrɔ.
[8] Mɔgɔ sɔnkolon lagosilenw don, u gɛnna ni gɛɲɛ ye ka bɔ jamana la.
[9] Ɔwɔ, ne tɔgɔ donna olu ka dɔnkili la, ne kɛra yɛlɛbɔ fɛn ye u fɛ.
[10] U bɛ ɲigin ne la ka u mabɔ ne la. U tɛ siran u daji tuli la ne ɲɛda kan.
[11] K'a masɔrɔ Ala ye ne ka kalaw juru foni ka ne tɔɔrɔ, o de kosɔn u banna ne ka foli ma.
[12] Mɔgɔ jugu jamaba wulila ne kinin fɛ ka ne sen jɛngɛ ka bɔ sira la. U wulila ne kama walisa ka ne halaki.
[13] U bɛ ne ka siraw tiɲɛn, ka u jija ka ne halaki. Mɔgɔ si ma u bali.
[14] U bɛ na i ko u bɛ don lamini kogo cilen wo fɛ. U balala ne la i ko ba woyo karilen.
[15] Siran kobaw ye ne lamini. U ye ne nɔɔrɔ fyɛ i ko fiɲɛba. Ne ka hɛrɛ tɛmɛnna i ko sankaba.
[16] Ɔwɔ, ne ni bɛ woyo ne kɔnɔ i ko ji. Don juguw sera ne ma.
[17] Dimi bɛ ne kolow sɔgɔ ka u jeni su fɛ, tɔɔrɔ min bɛ ne kan, o tɛ lafiya si di ne ma.
[18] Ala ye ne minɛ ne ka dulɔki kan ma ka ne tɔɔrɔ. A bɛ ne degun i ko ne ka dulɔki kan cɔrɔntɔlen.
[19] Ala ye ne fili bɔgɔ la. Ne kɛra i ko buguri ni bugurijɛ.
[20] Ne bɛ kasi i nɔ fɛ, i tɛ ne jaabi. Ne bɛ jɔ i ɲɛ kɔrɔ, i tɛ sɔn ka ne filɛ.
[21] I fariyara ne ma, i ye ne kɛlɛ ni i bolo barika bɛɛ ye.
[22] I ye ne lawuli ka taa ni ne ye fiɲɛ kaman kan ka ne halaki sanfiɲɛba fɛ.
[23] Ɔwɔ, ne y'a dɔn ko i bɛ ne bila saya la, o min latigɛra Hadamadenw bɛɛ ye.
[24] Nka mɔgɔ halakitɔ tɛna a bolo mɔɔnɔbɔ wa? A tɛna kulo dɛmɛbaa nɔ fɛ a ka bɔnɛ tuma la wa?
[25] Ne ma kasi mɔgɔ tɔɔrɔlen kosɔn wa? Ne ɲɛna ma sisi kɔlibaatɔ kosɔn wa?
[26] Ne ye hɛrɛ makɔnɔ, bɔnɛ sera ne ma. Ne tun bɛ kɛnɛyeelen makɔnɔ, nka dibi nana.
[27] Ne dusu wulila fo ne ma lafiya si sɔrɔ, tɔɔrɔ donw sera ne ma.
[28] Ne fari finna nka tile nɔ tɛ. Ne bɛ wuli jama cɛma ka kulokan bɔ.
[29] Ne kɛra kungo wuluw balima ye, ani kɔnɔsogonti jɛɲɔgɔn.
[30] Ne wolo finna fo a bɛ bunan, ne kolow jenina farigwan fɛ.
[31] O de kosɔn ne ka nkɔni kɛra su kasi nkɔni ye. Ne ka file fyɛkan kɛra kasikan ye.