[1] O tuma la Elifaz min bɔra Teman, o ko:
[2] Ni mɔgɔ bɛ kuma i fɛ, o na i dusu kasi wa? Nka jɔn kumabali bɛ se ka to?
[3] A filɛ, i ye mɔgɔ caman kalan ka bolo barikantanw sinsin.
[4] I ka kuma ye mɔgɔ bitɔ banba, i ye kunbere barikantanw dɛmɛ.
[5] Nka bɔnɛ ye i sɔrɔ, i diminna. E dusu tiɲɛnna k'a masɔrɔ a sera i ma.
[6] I ka Ala ɲɛsiran ma i jigi sigi wa? I taama cogo ɲuman ma kɛ i jigi ye wa?
[7] I ka miiri a la, mɔgɔ jalakibali jumɛn halakira? Diɲɛ la mɔgɔ tilennenw si tununna yɔrɔ jumɛn?
[8] Ne kɔni, ne y'a ye ko minw bɛ tilenbaliya sɛnɛ ka tɔɔrɔ dan, olu bɛ o suman de tigɛ.
[9] Ala dafiɲɛ bɛ u halaki ka u ban. A ka dimiya fiɲɛ bɛ u ban.
[10] Waraba konbokan ni waraba farinma kasikan bɛ ban, waraba kamalenw ɲinw bɛ kari.
[11] Sogontanya bɛ waraba faga, warabamuso denw bɛ jɛnsɛn.
[12] Dogodogoni kumakan dɔ sera ne ma, ne tulo ye a mankanin mɛn.
[13] Su fɛ yeli fɛn bɛ mɔgɔ jasiran sugo la tuma min na k'a sɔrɔ sunɔgɔba bɛ mɔgɔ la,
[14] siran ni yɛrɛyɛrɛli ye ne minɛ fo ka ne kolow bɛɛ yigiyigi.
[15] Ni dɔ tɛmɛnna ne kun na, o ye ne fari kan si taama.
[16] Fɛn dɔ ye i jɔ ne ɲɛ kɔrɔ, nka ne ma se ka a lasaa. Ne ye kumakan cininin dɔ mɛn ko:
[17] «Mɔgɔ bɛ se ka tilen Ala ɲɛ kɔrɔ wa? Mɔgɔ bɛ se ka jɛya a Dabaa ɲɛ kɔrɔ wa?
[18] K'a masɔrɔ Ala jigi tɛ a ka baaradenw kan. A ye fiɲɛma yɔrɔ sɔrɔ mɛlɛkɛw yɛrɛ la a fɛ yen,
[19] janko mɔgɔ minw sigilen bɛ farikolo bɔgɔma la, minw dilara ni buguri ye, o min bɛ ci i ko ntumu.
[20] U bɛ halaki sɔgɔma da ni fitiri cɛ, u bɛ ban, mɔgɔ si tɛ miiri u la tun.
[21] U si tilew juru tigɛra. U bɛ sa sani u ka kɛ hakilitigiw ye.»