[1] Ala denkɛw taara Matigi ɲɛ kɔrɔ don dɔ la. Sitanɛ fana taara i jɔ u cɛma Matigi ɲɛ kɔrɔ.
[2] O tuma la Matigi y'a fɔ Sitanɛ ye ko: «I nana ka bɔ mini?» Sitanɛ ye Matigi jaabi ko: «Ne nana ka bɔ ne yaalayaala yɔrɔw la dugukolo kan.»
[3] Matigi y'a fɔ Sitanɛ ye ko: «I ye ne ka jɔnkɛ Job cogo kɔlɔsi wa? Ale bɔɲɔgɔnko mɔgɔ tilennen si tɛ dugukolo kan. A tilennen dafalen don. A bɛ siran Ala ɲɛ ka i mabɔ ko jugu la, hali k'a sɔrɔ i ye ne bila a la k'a bolo fɛnw tiɲɛn gwansan. A bɛ to a ka kantigiya kan.»
[4] Sitanɛ ye Matigi jaabi ko: «Wolo ye wolo sara ye. Ɔwɔ, mɔgɔ bɛ sɔn ka a bolo fɛnw bɛɛ di a ni kosɔn.
[5] Nka i ka i bolo mɔɔnɔbɔ ka se a kolow ni a farisogo ma. Siga t'a la, a na i danga i yɛrɛ ɲɛ na.»
[6] Matigi y'a fɔ Sitanɛ ye ko: «Ayiwa, a filɛ i kɔrɔ, nka i kana a faga.»
[7] Sitanɛ taara ka bɔ Matigi ɲɛ kɔrɔ ka joli juguw bila Job fari yɔrɔw bɛɛ la ka bɔ a sentɛgɛ la ka se a kuncɛ ma.
[8] Job ye daga ntɛgɛnɛw ta ka a fari shyɛn ni olu ye ka i sigi bugurijɛ la.
[9] A muso y'a fɔ a ye ko: «I ka dafalenya bɛ mun ɲɛ i ye tun? I ka Ala danga ka sa.»
[10] Job y'a muso jaabi ko: «I bɛ kuma i ko muso hakilintan. Yala an ka ko ɲuman sɔrɔ Ala fɛ ko an kana ko jugu sɔrɔ wa?» Ayiwa, Job ma jurumu si kɛ o kow bɛɛ la.
[11] Job terikɛ cɛ saba Elifaz min bɔra Teman dugu kɔnɔ ani Bildad min bɔra Sua jamana la ani Zofar min bɔra Naama jamana la, olu ye Job ka bɔnɛ kow kibaru mɛn. U bɛnna a la ko u bɛɛ ka bɔ u ka jamanaw la don kelen na ka taa ka u nganiya jira Job la k'a dusu saalo.
[12] U y'u to yɔrɔ jan k'u ɲɛw kɔrɔta k'a filɛ. U ma se k'a dɔn. O tuma la u ye kasikanba bɔ. U y'u ka finiw fara ka buguri seri san fɛ u kun na.
[13] O kɔ, u y'u sigi duguma a kɔrɔ ka tile wolonwula ni su wolonwula kɛ. U si ma se ka kuma a fɛ, katuguni u y'a ye ko a tɔɔrɔlen bɛ fo ka dama tɛmɛn.