[1] Ayiwa Elifaz min bɔra Teman, o ko:
[2] Mɔgɔ hakilitigi bɛ jaabili kɛ ni dɔnniya fuu ye, ka a disi fa kɔrɔn fɛ fiɲɛ la wa?
[3] A b'a yɛrɛ lafasa ni kuma nafantan ye wala ni kuma gwansan ye wa?
[4] E bɛ Ala ɲɛsiran yɛrɛ tiɲɛn, ka Ala delili tiɲɛn.
[5] I ka tilenbaliya bɛ kalan di i da ma, i bɛ mɔgɔ kegunmanw ka kuma fɔ.
[6] I yɛrɛ da bɛ i jalaki, ne tɛ, i yɛrɛ dawolow ye seereya kɛ i kama.
[7] E de ye mɔgɔ bangelen fɔlɔ ye wa? E dara sani kuluw ka da wa?
[8] Ala ye laadili min di, i y'o mɛn wa? Dɔnniya bɛɛ dira e ma wa?
[9] E bɛ mun dɔn ni an tɛ o dɔn? Dɔnniya jumɛn bɛ e la ni o ɲɔgɔn tɛ an na?
[10] Kunsigijɛtigi ni cɛkɔrɔbaw bɛ an cɛma, min ka kɔrɔ ni i fa yɛrɛ ye.
[11] Ala ka dusu saaloli ka dɔgɔ i ɲɛ na wa, ani kuma duman minw fɔra i ye?
[12] Mun y'a to i dusu bɔra kosɛbɛ? I bɛ i ɲɛ coron mun na?
[13] I diminna Ala kɔrɔ fo i bɛ nin kumaw fɔ i da la.
[14] Hadamaden ye mun ye, a bɛ se ka jɛya wa? Muso den bɛ se ka kɛ tilennen ye wa?
[15] A filɛ, hali Ala tɛ a jigi da a ka senumaw kan, sankolow ma jɛya a ɲɛ kɔrɔ.
[16] Janko Hadamaden nɔgɔlen, tolilen, o min bɛ tilenbaliya min i ko ji.
[17] I ka ne lamɛn, ne bɛ i kalan, ne ye min faamu, ne na o fɔ i ye.
[18] Mɔgɔ hakilitigiw ye ko min welewele da, u ma sɔn ka min dogo, u ye o mɛn u bɛnbaw fɛ.
[19] Nin jamana dira olu ma, dunan si ma sigi u cɛma.
[20] Mɔgɔ jugu bɛ tɔɔrɔ a si tilew bɛɛ la, o si san dama dɔɔnin minw dira mɔgɔ jugu farinma ma.
[21] Siranfɛnba mankan bɛ a tulo fa, k'a to tɔɔrɔ cɛma, tiɲɛnnikɛla bɛ bi a kan.
[22] A ma da a la ko a na kisi dibi fanga ma, npan bɛ a ɲɛ.
[23] A bɛ boli ka taa yen fɛ ani yan fɛ ka a ka dumuni ɲini. A b'a dɔn ko dibi don labɛnnen bɛ a ye k'a makɔnɔ.
[24] Degun ni sɛgɛnba bɛ a lasiran, u bɛ se sɔrɔ a kan, i ko masakɛ min labɛnnen bɛ kɛlɛ kama.
[25] K'a masɔrɔ a y'a bolo kɔrɔta Ala kama, a ye a yɛrɛ kɔrɔta Sebaayabɛɛtigi kama.
[26] A bɛ boli k'a kunbɛn ni tulo gɛlɛya ye, a b'a kunbɛn ni a ka nɛgɛ bɛnnan girinma ye.
[27] A bonyara fo k'a ɲɛda nugu, a woro la kɛn bonyara.
[28] O de kosɔn a bɛ sigi dugu cilen kɔnɔ ani mɔgɔ tɛ so min kɔnɔ, o bɛ bi sɔɔni.
[29] A tɛ fɛntigiya, a ka nafolo tɛ mɛn, a ka jiidili tɛ mɛn dugukolo kan.
[30] A tɛ se ka bɔ dibi la. Tasuma na a ja i ko jiribolo misɛnw, Ala ka fiɲɛ bɛ a ta.
[31] A kana a jigi da fɛn fufafu banta kan k'a yɛrɛ lafili. A ka baraji na kɛ fuu ye.
[32] A na o bɛɛ sɔrɔ sani a ka waati ka se, a bolo tɛna nugu tun.
[33] A na kɛ i ko rezɛn sun min den gerenw burunna, i ko olive feere bɛ kari cogo min na.
[34] K'a masɔrɔ filankafo ka du na lankolonya, tasuma na surɔ fɛn minɛbaa ka finiso jeni k'a ban.
[35] A ye juguya kɔnɔ ta ka tilenbaliya den bange, a dusukun fara ni lafilili kow ye.