[1] Job ko:
[2] A' ye aw tulo majɔ ka ne ka kumaw lamɛn, ne bɛ o dusu saaloli kelen ɲini aw fɛ.
[3] A' ye muɲu ne ye k'a to ne ka kuma. Ni ne tilara kuma la, aw bɛ se ka yɛlɛ bɔ ne la.
[4] Yala ne bɛ ne ka tɔɔrɔ kow ɲɛ fɔ mɔgɔw ye wa? Mun kosɔn ne dusu kana bɔ joona?
[5] A' ye ne filɛ ka kabakoya, ka aw bolo biri aw da la.
[6] Ni ne bɛ miiri o ko la, o bɛ ne kɔnɔna fili, ne farisogo bɛ yɛrɛyɛrɛ kosɛbɛ.
[7] Mun y'a to mɔgɔ jugu ɲɛnama bɛ to, fo ka kɔrɔ ka fangaba sɔrɔ?
[8] U ni u bɔnsɔn bɛ to ɲɔgɔn fɛ, u bɛ u ye. U denw bɛ to u ɲɛ kɔrɔ.
[9] U ka sow bɛ hɛrɛ la, siran tɛ yen, Ala ka bere tɛ u gosi.
[10] U ka nturaw barika tɛ dɔgɔya tuma si, u ka misiw bɛ den sɔrɔ, olu kɔnɔ tɛ tiɲɛn.
[11] U bɛ u yɛrɛ denw taamatɔ ye u ɲɛ kɔrɔ i ko sagakulu, u denw bɛ tulon kɛ ka u panpan.
[12] U bɛ dɔnkili da ni dɔnkan ni nkɔniw ye, ka u ɲɛnajɛ ni file ye.
[13] U bɛ u si bɛɛ kɛ hɛrɛ la, o kɔ, u bɛ taa kaburu kɔnɔ.
[14] Nka u b'a fɔ Ala ye ko: «I mabɔ an na, an t'a fɛ ka i ka siraw dɔn.
[15] Sebaayabɛɛtigi ye jɔn ye fo an ka baara kɛ a ye? An na nafa jumɛn sɔrɔ a tɔgɔ weleli la?»
[16] Ayiwa, u ka hɛrɛ tɛ u bolo wa? Ne ka ko latigɛlen ni mɔgɔ jugu ta tɛ kelen ye.
[17] Mɔgɔ jugu ka yeelen bɛ dufa tuma caman wa? Tɔɔrɔ bɛ u sɔrɔ wa? Ala diminnen na u halaki wa?
[18] Bin jalen min bɛ saalo fiɲɛ fɛ, wala nwɛɲɛ min bɛ taa fununfunun fɛ, u bɛ kɛ ten siɲɛ caman wa?
[19] Aw y'a fɔ ko Ala bɛ mɔgɔ ka tilenbaliya hakɛ bɔ a denw la, nka Ala ka o tigi yɛrɛ sara, walisa a k'a dɔn.
[20] Mɔgɔ jugu ka a yɛrɛ ka tɔɔrɔ kow ye a ɲɛ la ka Sebaayabɛɛtigi ka dimiya min k'a fa.
[21] Sabu ni a si dafara tuma min na, a salen kɔ, a bɛ miiri a ka so ko la tun wa?
[22] Mɔgɔ bɛ se ka Ala kalan dɔnniya la wa, ale min bɛ kiri tigɛ sanfɛ fɛnw bɛɛ kan?
[23] Mɔgɔ dɔ bɛ sa k'a sɔrɔ a barika dafalen don, a lakanalen don hɛrɛ la.
[24] A kɛrɛw tɔlɔlen bɛ, a kolow falen bɛ sɛmɛ la.
[25] Dɔ wɛrɛ bɛ sa k'a sɔrɔ a ɲanilen don, a ma hɛrɛ ye fewu.
[26] U fila bɛɛ bɛ da buguri la, ntumuw bɛ u dun.
[27] A filɛ, ne bɛ aw ka miiriliw dɔn, ani aw bɛ ko minw bisigi ne kama ka ne tɔɲɔ.
[28] K'a masɔrɔ aw b'a fɔ ko: «Mɔgɔ barikama ka so bɛ min? Mɔgɔ jugu sigi yɔrɔ kɛra di?»
[29] Aw ma taamadenw ɲininka wa? Aw ma u ka seereyaw lamɛn wa?
[30] Ko ni bɔnɛ don sera, mɔgɔ jugu bɛ kisi, Ala ka dimiya don na, foyi tɛ u sɔrɔ.
[31] Jɔn na a kɔrɔfɔ a ka kɛtaw kosɔn? Jɔn na a sara a ka ko kɛlenw kosɔn?
[32] Su tabaaw bɛ taa ni a ye kaburu la, u bɛ a kaburu kɔlɔsi.
[33] Mɔgɔ bɛɛ bɛ tugu a nɔ fɛ, jɛkɛnɛ la bɔgɔ kurunw bɛ da a kan dɔɔnin dɔɔnin, a bilasira jama dama dɔnbali don.
[34] Aw dun bɛ se ka ne dusu saalo cogo di k'a sɔrɔ aw ka jaabiliw bɛɛ ye nkalon ye?