[1] Ayiwa Job ye dɔ fara a ka ntalen kan, a ko:
[2] Ala min ye ne ka tiɲɛ labi, Sebaayabɛɛtigi min ye ne dusu kasi, ayiwa, ale ɲɛnama tɔgɔ kosɔn,
[3] ka ne ninakili to ne la, ka Ala dafiɲɛ to ne nunwow la,
[4] ne dawolow tɛna kuma tilenbali si fɔ, ne nɛnkun tɛna nkalon tigɛ.
[5] Ala ka ne kisi jo dili ma aw ma. Ne tɛna ne ka tilennenya bila fo ka taa ne sa.
[6] Ne na to ni ne ka tilennenya ye, ne tɛna a bila. Ne dusukun tɛna ne jalaki ne si tile si la.
[7] Ne juguw ka minɛ i ko mɔgɔ jugu bɛ minɛ cogo min na. Ne kɛlɛɲɔgɔn ka minɛ i ko kojugukɛlaba minɛ cogo.
[8] Ni Ala ye mɔgɔ jugu ka ɲɛnamaya juru tigɛ, ka a ni minɛ a la tuma min na, a jigi na kɛ mun ye tun?
[9] Ni tɔɔrɔ ye a sɔrɔ tuma min na, Ala na a kasikan lamɛn wa?
[10] A na a diyaɲeko sɔrɔ Sebaayabɛɛtigi fɛ ka Ala deli tuma bɛɛ wa?
[11] Ne bɛ aw kalan Ala ka siraw la. Ne tɛna Sebaayabɛɛtigi ka miirili dogo aw la.
[12] O bɛɛ n'a ta Ala ye fɛn minw kɛ, aw yɛrɛw bɛ o bɛɛ dɔn. Mun kosɔn aw dun ka miirili kɛra fuu ye?
[13] Mɔgɔ jugu niyɔrɔ filɛ nin ye Ala fɛ. Mɔgɔ jugu farinmaw bɛ ciyɛn min sɔrɔ Sebaayabɛɛtigi fɛ, nin don.
[14] Ni u denw jiidira, olu ye npan ta ye, kɔngɔ na u bɔnsɔn sɔrɔ.
[15] U tɔ tolenw na sa fiɲɛbana fɛ. U ka muso cɛ salenw tɛna u su kasi.
[16] Hali ni a bɛ wari lajɛ ɲɔgɔn kan i n'a fɔ buguri ka finiw caya i ko bɔgɔ,
[17] ka olu bila ɲɔgɔn kan, nka mɔgɔ tilennenw na olu don u kan na, jalakibaliw na o wari tilatila u cɛ.
[18] Mɔgɔ jugu ye so min jɔ, o bɛ kɛ i ko ntumu foroko, a na kɛ i ko rezɛn nakɔ kɔlɔsibaa ka bugu.
[19] A fɛntigima bɛ i da, o na kɛ a laban ye. A b'a ɲɛ dayɛlɛ, a tɛ ye tun.
[20] Siranba na cun a kan i ko ba woyo karilen. Fiɲɛba bɛ taa n'a ye su fɛ.
[21] Kɔrɔn fɛ fiɲɛ b'a ta, a tɛ ye tun. A bɛ taa ka bɔ a ka yɔrɔ la i ko fununfunun.
[22] Ala bɛ o ci a ma ni hinɛ tɛ, a bɛ i jija ka boli walisa ka kisi o tɔɔrɔ ma.
[23] Mɔgɔ na tɛgɛrɛ fɔ a kosɔn, ka a suuru ka a gɛn.