[1] Job ko:
[2] Aa, ni ne ka tɔɔrɔ kow tun bɛ se ka pese, ni ne ka bɔnɛ kow bɛɛ tun dara sumanikɛ ja kan.
[3] Olu tun na giriya ka tɛmɛn kɔgɔji la cɛncɛn kan, o de kosɔn ne ye hakilintanya kuma fɔ.
[4] K'a masɔrɔ Sebaayabɛɛtigi ka biɲɛw ye ne sɔgɔ, ne ni ye u baga min. Ala ka siran kobaw bɛ u labɛn ne kɛlɛli kama.
[5] Kungo fali bɛ kasi bin ko la ka bin nugu to a kɔrɔ wa? Misi bɛ kulo k'a to dumuni la wa?
[6] Dumuni min man timi, o bɛ se ka dun ni kɔgɔ t'a la wa? Yala timiya bɛ shɛfan jɛman la wa?
[7] Ne ma sɔn ka maga fɛn minw na, ni ne ɲiginna u la, olu kɛra ne ka dumuni ye.
[8] Ni ne tun ye ne ka fɛn delilen sɔrɔ, fɛn min ko bɛ ne la kosɛbɛ, ni Ala tun sɔnna ka o di ne ma.
[9] Ala ka sɔn ka ne kɛ buguri ye, a ka a bolo bɔ ne kɔrɔ ka ne ban.
[10] Dususuma ko kelen kɔni bɛ ne fɛ, nisɔndiya ko kelen bɛ ne fɛ nin tɔɔrɔ kow bɛɛ la, ko ne ma Senuma ka sariya tiɲɛn tuma si la.
[11] Barika jumɛn bɛ ne la fo ne ka makɔnɔli kɛ? Ne laban ye mun ye fo ne ka muɲuli kɛ?
[12] Yala ne barika ye farakurun barika ye wa? Yala ne farisogo ye nsiranɛgɛ ye wa?
[13] Dɛmɛbaa tɛ ne la. Dɛmɛbaa minw tun bɛ ne kɛrɛ fɛ, olu ma minɛ wa?
[14] Mɔgɔ tɔɔrɔlen hinɛ ka kan k'a teriw minɛ, hali ni a ye Sebaayabɛɛtigi ɲɛsiran bila.
[15] Ne balimaw ye janfali kɛ i ko kɔji woyota, i ko kɔji min bɛ woyo ka taa.
[16] U woyo bɛ bali ji similen fɛ, o ji mana yeele, o bɛ u fa.
[17] Nka ji bɛ dɛsɛ tilema fɛ, ji bɛ ban yen funteni waati la.
[18] O tuma la kungo cɛtigɛbaaw bɛ yɛlɛma ka taa sira wɛrɛw fɛ. U bɛ taa kungokolon kɔnɔ, u bɛ sa yen.
[19] Tema jamana kungo kɔnɔ taamabaaw bɛ ji ɲini, Seba jagokɛlaw jigi bɛ o ji kan.
[20] Nka u jigi tigɛra, u sera kɔ da la, u jigi tigɛlen tora.
[21] Ayiwa aw fana tɛ foyi ye. Aw ye ne ka tɔɔrɔ kobaw ye, aw ja tigɛra.
[22] Nka ne y'a fɔ ko aw ka fɛn dɔ di ne ma wa? ko aw ka daguli fɛn di ne kosɔn wa?
[23] Ko aw ka ne tila ka bɔ ne juguw bolo wa? wala ko aw ka ne sama ka bɔ mɔgɔ farinmaw bolo wa?
[24] A' ye ne kalan, ne na ne makun. Aw ka ne ka fililiw jira ne la.
[25] Barikaba bɛ tiɲɛ kuma la, nka aw ka kɔrɔfɔli bɛ mun ɲɛ ne ye?
[26] Aw b'a fɛ ka ne ka kumaw lakari wa? ka mɔgɔ ja tigɛlen ka kumaw jate i n'a fɔ fiɲɛ wa?
[27] Tiɲɛ la, aw bɛ bi falatɔ kan, ka aw teri tɔɔrɔ.
[28] Ayiwa sisan, a' ye wuli ka aw ɲɛ jɔ ne la, ne tɛna nkalon tigɛ aw ɲɛ na fewu.
[29] Ɔwɔ, aw ka yɛlɛma, aw kana tilenbaliya kɛ. Aw ka yɛlɛma, aw k'a dɔn ko ne jalakibali don.
[30] Yala tilenbaliya bɛ ne nɛnkun na wa? Ne da tɛ se ka ko jugu faranfasi wa?