[1] Ayiwa Bildad min bɔra Sua, o ko:
[2] Aw ka kumaw na ban tuma jumɛn? Aw ka hakili sɔrɔ, o kɔ, an na kuma ɲɔgɔn fɛ.
[3] Mun kosɔn aw bɛ an filɛ i ko baganw, ka an kɛ aw ɲɛ kɔrɔ i ko nalonmaw?
[4] E min diminnen bɛ i yɛrɛ farafara, dugukolo na lankolonya e de kosɔn ka farakurun bɔ a yɔrɔ la wa?
[5] Ɔwɔ, mɔgɔ jugu ka yeelen na dufa, a ka gwa kulu cɛma, tasuma mana na dufa.
[6] Kɛnɛ na kɛ dibi ye a ka finiso kɔnɔ, lanpa yeelen na dufa a kun na.
[7] A taama sen na sumaya, a yɛrɛ ka ko latigɛlenw na a bi.
[8] A senw bɛ don jɔ la, o na kɛ a minɛli jan ye.
[9] Minɛli jan na a sen tontoli minɛ, juru na a minɛ.
[10] Jurukisɛ dogolen bɛ duguma a ɲɛ, minɛli jan dalen bɛ a ɲɛ a ka sira kan.
[11] Siranfɛnw y'a ja tigɛ a fan bɛɛ la, olu bɛ tugu a sen nɔ la.
[12] Kɔngɔ ye a barika ban, ɲɛni bɛ a fan bɛɛ la.
[13] A farisogo na ban bana fɛ, a na ban sayaden fɔlɔ fɛ.
[14] A bɛ miiri ko a bɛ hɛrɛ la a ka finiso min kɔnɔ, a na minɛ ka bɔ o kɔnɔ. A na sama ka taa siranfɛnbaw ka masakɛ ɲɛ kɔrɔ.
[15] Dɔ wɛrɛw na sigi a ka finiso kɔnɔ, kiribi na jɛnsɛn a ka so da la.
[16] A dili na ja dugu rɔ, a bolow na tigɛ san fɛ.
[17] Mɔgɔ si tɛna miiri a ko la dugukolo kan tun, a nɔ bɛ ban dugukolo kan.
[18] A na gɛn ka bɔ kɛnɛ la ka taa dibi la, a na gɛn ka bɔ dugukolo kan.
[19] Den wala bɔnsɔn tɛna to a kɔ a ka mɔgɔw cɛma, mɔgɔ ɲɛnama tɛna to a sigi so kɔnɔ.
[20] Bɔnsɔn nataw bɛɛ na kabakoya a ko la, sisan mɔgɔw fana na siran ka yɛrɛyɛrɛ.
[21] Mɔgɔ juguw nakan bɛ ten jaati, min tɛ Ala dɔn, o niyɔrɔ y'o ye.