[1] Ayiwa Elihu y'a fɔ ko kura ko:
[2] I y'a fɔ ko ni i ma jurumu kɛ, ko mun nafa bɛ o la, i na mun sɔrɔ o la? A bɛ i kɔnɔ ko o ye i jo ye wa? ko i na jo sɔrɔ Ala ɲɛ kɔrɔ o ko fɔli la wa?
[4] Ne na i ni i teriw jaabi ɲɔgɔn fɛ.
[5] I ka sankolo filɛ ka miiri o la, i ka sankabaw filɛ, olu bɛ i ni san cɛ.
[6] Ni i ye jurumu kɛ, i ye Ala ka mun tiɲɛn? Ni i ye jurumu caman kɛ, o bɛ mun kɛ Ala la?
[7] Ni i tilennen don, i bɛ mun di Ala ma? Ale bɛ mun minɛ i bolo?
[8] I ka juguya bɛ i bɔɲɔgɔnko tɔɔrɔ, i ka tilennenya bɛ nafa ɲɛ Hadamadenw ye.
[9] Mɔgɔw bɛ kulo, katuguni fanga digira u la kosɛbɛ. U bɛ kasi sebaayatigiw bolo kosɔn.
[10] Nka mɔgɔ si t'a fɔ ko: «Ne Dabaa Ala bɛ min? A bɛ tanuli dɔnkili bila mɔgɔ da la su fɛ,
[11] ka an kɛ hakilitigiw ye ka tɛmɛn dugukolo kan baganw kan, ka an kɛ hakilitigiw ye ka tɛmɛn sanfɛ kɔnɔw kan.»
[12] Mɔgɔw bɛ kulo, nka Ala tɛ u jaabi mɔgɔ juguw ka kuncɛbaya kosɔn.
[13] Ala tɛ nkalon kuma lamɛn, Sebaayabɛɛtigi tɛ a tulo majɔ o la fewu.
[14] Hali ni i y'a fɔ ko, i ɲɛ t'a la, i ka koɲɛ bɛ ale bolo, i ka a ka kiri ko makɔnɔ sa.
[15] Ayiwa sisan, hali ni a ma i sara ni a ka dimiya ye fɔlɔ, o kɔrɔ tɛ ko a tɛ ko jugu jate.
[16] O de kosɔn Job y'a da yɛlɛ ka kuma gwansan, a bɛ hakilintanya kuma caman fɔ.