[1] O tuma la Matigi kumana Job fɛ sanfiɲɛba la ko:
[2] Min bɛ ne ka laadili dogo dibi la ni ko dɔnbaliya kuma ye, o ye jɔn ye?
[3] I cɛ siri i ko cɛ ja gɛlɛn, ne na i ɲininka, i ka ne jaabi.
[4] Ne ye dugukolo ju sigi tuma min na, i tun bɛ min? Ni i ye hakilitigi ye, o fɔ ne ye.
[5] Jɔn ye dugukolo bonya hakɛ latigɛ, i b'o dɔn wa? Jɔn ye a suma ni juru ye?
[6] Diɲɛ ju sigira mun kan? Jɔn ye a seleke la kabakurun sigi,
[7] ka kɛnɛbɔda dolow to tanuli dɔnkili dali la, ka Ala denkɛw to ɲagali la ni pɛrɛnkan ye?
[8] Kɔgɔji bɔra tuma min na, i n'a fɔ a wolola, jɔni ye a da tugu ni dala konw ye?
[9] Ne ye sankabaw kɛ a ka fini ye, ka a meleke ni dibiba ye.
[10] Ne ye ne ka sariya sigi a kan ka dala konw ni kon balabalaw kɛ a la.
[11] Ne y'a fɔ a ye ko: «I bɛ na fo yan, i kana tɛmɛn o kan. I fanga dan ye yan ye.»
[12] Kabini i bɛ diɲɛ la, i y'a fɔ ko dugu ka jɛ wa? I ye tile bɔ yɔrɔ jira a la,
[13] walisa a ka dugukolo fan bɛɛ minɛ ka mɔgɔ juguw yuguyugu ka bɔ a la wa?
[14] Dugukolo cogoya bɛ yɛlɛma, i ko nataliye bɛ bɔgɔ kan cogo min na, fɛn bɛɛ bɛ ye, i n'a fɔ u masirila ni fini ye.
[15] Mɔgɔ juguw ka kɛnɛyeelen bɛ tunun u fɛ, u bolo kɔrɔtalen karila.
[16] I donna kɔgɔji ji boyiw la wa? I taara i yaalayaala ji dunbaw la wa?
[17] Saya dondaw jirala i la wa? Yala i ɲɛ ye saya dibi konw ye wa?
[18] I ye dugukolo bonya ye i ɲɛ la wa? Ni i bɛ o bɛɛ dɔn, i ka o fɔ.
[19] Kɛnɛyeelen dugu sira bɛ min? Dibi sigi yɔrɔ bɛ min?
[20] I bɛ se ka u danw sigi wa, yala i bɛ u sigi yɔrɔ sira dɔn wa?
[21] I bɛ o dɔn k'a masɔrɔ i bangera u ɲɛ. I si tilew ka ca.
[22] I donna fo neje nafolo mara yɔrɔ la wa? i ye sanbɛlɛ nafolo mara yɔrɔ ye wa?
[23] Ne ye olu labɛn tɔɔrɔ waati kama, kɛlɛ don ni kɛlɛ kama.
[24] Kɛnɛyeelen bɛ yɛrɛkɛ ka taa sira jumɛn fɛ? Kɔrɔn fɛ fiɲɛ bɛ na dugukolo kan sira jumɛn fɛ?
[25] Jɔn ye ji sira labɛn sanji ɲɛ, ka sira labɛn sanpɛrɛn kɛnɛyeelen ye,
[26] walisa mɔgɔ tɛ yɔrɔ min na, Hadamaden sigilen tɛ dugukolo jalen min na, ka sankolola sanji lana o kan,
[27] walisa ka dugukolo jalen fa ji la, ka bin falen ka nugu?
[28] Yala bange fa bɛ sanji la wa? Jɔni ye ngomi tonitaw bange?
[29] Jɔni ye ji siminen bange? Jɔn ye sanfɛ nɛnɛ bange?
[30] Ji bɛ simi ka kɛ i ko kabakurun, a sanfɛla bɛ gɛlɛya ka kɛ i ko kabakurun.
[31] Yala i bɛ se ka ɲuguɲugu dolow siri ɲɔgɔn na wa? I bɛ se ka cɛ saba dolow foni wa?
[32] I bɛ se ka dolow bɔ u waati la wa? I bɛ se ka ɲaamɛ dolow ni a denw ɲɛminɛ wa?
[33] I bɛ sankolola sariyaw dɔn wa? U bɛ ko minw kɛ dugukolo kan, e de bɛ olu labɛn wa?
[34] I bɛ se ka kuma sankaba fɛ walisa jiba ka bi i kan wa?
[35] I bɛ se ka san yɛgɛyɛgɛw ci ka taa wa? Olu b'a fɔ i ye ko: «An filɛ yan wa»?
[36] Jɔn ye hakilitigiya don mɔgɔ dusukun na? Jɔn ye faamuli di a hakili ma?
[37] Jɔn bɛ se ka sankabaw jate ni a hakili ye ka u dama dɔn? Jɔn bɛ se ka sankolola foroko jimaw ji bɔn
[38] ka buguri kɛ bɔgɔ ye, ka bɔgɔ kuruw nɔrɔ ɲɔgɔn na?