[1] O tuma la Bildad min bɔra Sua, o ye Job jaabi ko:
[2] I na o kow fɔli dabila tuma jumɛn, i dala kuma na kɛ i ko fiɲɛba wa?
[3] Ala bɛ tilennenya yɛlɛma wa? Sebaayabɛɛtigi bɛ tiɲɛ yɛlɛma wa?
[4] I denkɛw ye jurumu kɛ ale la, o de kosɔn a ye u bila u ka tilenbaliya kow bolo.
[5] Nka e yɛrɛ, ni i ye Ala ɲini, ni i ye Sebaayabɛɛtigi ka nɛɛma deli,
[6] ni i kɛra mɔgɔ jɛlen ni mɔgɔ tilennen ye, a na a ɲɛ jɔ i la, siga t'a la. A na hɛrɛ kɛ i ka tilennenya so ye.
[7] I fɔlɔ cogo na kɛ fɛn misɛn ye i ɲɛ na, nka i laban ko na kɛ hɛrɛba ye.
[8] I ka fɔlɔ mɔgɔw ɲininka, u faw ye fɛn minw sɛgɛsɛgɛ ka u dɔn, i ka i janto olu la.
[9] An ye kununwo mɔgɔw dama ye, an ma foyi dɔn, an si tilew bɛɛ bɛ i ko ja dugukolo kan.
[10] Nka olu na i kalan, u na kuma i fɛ ka u dusukun dayɛlɛ i ye ka kuma.
[11] Buruku bɛ se ka wuli ni bɔgɔ tɛ wa? Fala kɔnɔ bin bɛ se ka bonya ni ji tɛ wa?
[12] A kɔgɔbali bɛ ja bin tɔ bɛɛ ɲɛ, sani a kan tuma ka se.
[13] Mɔgɔ minw bɛ ɲinɛ Ala kɔ, olu bɛ ten. Mɔgɔ jugu jigi na tiɲɛn.
[14] A ka dannaya b'a lafili, a jigi da yɔrɔ na kɛ i ko ntalo mana.
[15] A bɛ i sɛmɛ a ka so kogo la, nka o bɛ lamaga. A b'a minɛ, nka a jɔlen tɛ se ka to.
[16] A bɛ i ko jirisun furama tile jukɔrɔ, a bolow bɛ nakɔ yɔrɔw bɛɛ fa.
[17] A diliw bɛ meleke kabakurunw na, a bɛ don fo fara jukɔrɔ.
[18] Nka ni a samana ka bɔ a ka yɔrɔ la, o yɔrɔ b'a fɔ a ye ko: «Ne ma i dɔn fewu.»
[19] A bɛ suman min tigɛ, o don. Dɔ wɛrɛ bɛ falen ale kɔ o dugukolo yɔrɔ kelen na.
[20] Ayiwa, Ala tɛ mɔgɔ tilennen fili, a tɛ mɔgɔ jugu fana mara.
[21] A na i da fa ɲagali la don dɔ la, ka tanuli dɔnkili bila i da la.
[22] I juguw na datugu ni maloya ye, mɔgɔ juguw ka sow na halaki.