[1] Ne ninakili bɛ ɲini ka ban, ne si tile bɛ ban, kaburu bɛ ne makɔnɔ.
[2] Nparabɔlaw ye ne lamini, ne bɛ si ɲɛna ka u ka mafiɲɛyali kumaw lamɛn.
[3] Ala, i ka kɛ ne seere ye ne kɛrɛ fɛ, ko ne bɛ tiɲɛ fɔ. Jɔni na a kan di ne kosɔn?
[4] I ye u hakili geren, o de kosɔn i tɛ sɔn u ka se sɔrɔ.
[5] Mɔgɔ min bɛ a teriw nege ka u don cɛlikɛlaw bolo, dibi na don o tigi denw ɲɛw la.
[6] Ala ye ne kɛ ntalen da fɛn ye mɔgɔw ɲɛ na, u bɛ daji tu ne ɲɛda la.
[7] Ne ɲɛw lafinna ɲɛnasisi fɛ, ne yɔrɔw bɛɛ fasara ka kɛ i ko ja.
[8] Mɔgɔ tilennenw kabakoyara nin ko la, mɔgɔ jalakibali wulila Ala ɲɛsiranbali kama.
[9] O bɛɛ n'a ta mɔgɔ tilennen bɛ to a ka sira kan, mɔgɔ min tɛgɛ jɛlen don, o bɛ barika sɔrɔ ka ta'a fɛ.
[10] Nka aw bɛɛ ka na k'a daminɛ ko kura, ne ma hakilitigi sɔrɔ aw cɛma.
[11] Ne tilew tɛmɛnna, ne dusukun ka ko latigɛlenw tiɲɛnna, hali ne dusukun ka miiriliw.
[12] U bɛ su yɛlɛma ka kɛ tile ye, u b'a fɔ dibi don tuma la ko kɛnɛ bɔli surunyara.
[13] Ne bɛ sigi yɔrɔ min makɔnɔ, o ye lahara ye, ne bɛ ne da yɔrɔ labɛn dibi la.
[14] Ne bɛ kulo kaburu nɔ fɛ, ko: «I ye ne fa ye.» Ntumu minw bɛ ne farisogo dun, ne b'a fɔ olu ye ko: «Aw ye ne ba ani ne balimamuso ye.»
[15] Ayiwa, ne jigi dun bɛ mun kan? Jɔni bɛ se ka a ye?
[16] A bɛ jigin ka taa ne fɛ lahara, ni an bɛ taa ɲɔgɔn fɛ ka an lafiya buguri la tuma min na.