[1] Ayiwa, jamana kɔnɔ mɔgɔw ye Josiasi denkɛ Joakazɲɛnatɔmɔ k'a sigi ka kɛ masakɛ ye a fa nɔ na Jerusalɛm.
[2] Joakaz sigira masaya la a si san mugan ni sabanan la. A ye kalo saba kɛ masaya la Jerusalɛm.
[3] Misira jamana masakɛ y'a wuli ka bɔ masaya la Jerusalɛm ka warijɛ talan kɛmɛ ni sanu talan kelenɲangili bi jamana kan.
[4] O kɔ, Misira masakɛ ye Joakaz balimakɛ Eliakim kɛ Juda jamana ni Jerusalɛmkaw ka masakɛ ye. A y'a tɔgɔ yɛlɛma ka kɛ Jojakim ye, nka Neko taara ni Jojakim balimakɛ Joakaz ye Misira jamana la.
[5] Jojakim sigira masaya la a si san mugan ni duurunan la. A ye san tan ni kelen kɛ masaya la Jerusalɛm. A ye ko jugu kɛ Matigi, a ka Ala ɲɛ kɔrɔ.
[6] Babilonɛ masakɛ Nebukadnezar wulila ka taa a kama k'a siri ni nsiranɛgɛ jɔlɔkɔw ye ka taa n'a ye Babilonɛ.
[7] Nebukadnezar taara ni Matigi ka so kɔnɔ minanw fana ye ka olu bila a ka masaya so kɔnɔ Babilonɛ.
[8] Jojakim ka ko tɔw, a ka tilenbaliya kow ani a ye filili minw kɛ, olu bɛɛ sɛbɛnnen bɛ Israɛl bɔnsɔn ni Juda bɔnsɔn ka masakɛw ka kitabu kɔnɔ. A denkɛ Jojaken sigira masaya la a nɔ na.
[9] Jojaken sigira masaya la a si san seginnan la. Ale ye kalo saba ni tile tan kɛ masaya la Jerusalɛm. A ye ko jugu kɛ Matigi ɲɛ kɔrɔ.
[10] San yɛlɛma tuma la, masakɛ Nebukadnezar ye ci bila ka a ni Matigi ka so kɔnɔ minanw ta ka taa n'u ye Babilonɛ ka Jojaken balimakɛ Sedesiasi sigi masaya la a nɔ na Juda bɔnsɔn ni Jerusalɛmkaw kun na.
[11] Sedesiasi sigira masaya la a si san mugan ni kelennan la. A ye san tan ni kelen kɛ masaya la Jerusalɛm.
[12] Ale ye ko jugu kɛ Matigi a ka Alaɲe kɔrɔ. Kira Jeremi, min ye Matigi ka kuma lase a ma, a ma sɔn ka a yɛrɛ majigin o ɲɛ kɔrɔ.
[13] Nebukadnezar y'a wajibiya k'a kali Ala la ko a na to kantigiya la, nka a murutira o ma. A ye a tulo gɛlɛya, a ma sɔn ka kɔsegin Matigi, Israɛl bɔnsɔn ka Ala ma.
[14] Kuntigiw ni sarakalasebaaw kuntigiw ani mɔgɔw fana tora ka ko jugu kɛ ka ta'a fɛ ka jamana wɛrɛw ka ko haramulenw kɛ. Matigi ka yɔrɔ senuma min tun bɛ Jerusalɛm, u ye o nɔgɔ.
[15] Matigi, u bɛnbaw ka Ala tora ka cidenw ci u ma ka u laadi tuma bɛɛ, katuguni a ka mɔgɔw ni a sigi yɔrɔ hinɛ y'a minɛ.
[16] Nka olu tun bɛ yɛlɛ bɔ Ala ka cidenw ma ka a ka kuma mafiɲɛya ka u npara bɔ fo ka taa Matigi ka dimiya lawuli a ka mɔgɔw kama fo dɛmɛbaa si ma sɔrɔ u la.
[17] Ayiwa Ala ye Kaldekaw ka masakɛ lawuli u kama. O ye u ka kamalenw faga ni npan ye yɔrɔ senuma kɔnɔ. A ma kamalen wala npogotigi wala cɛkɔrɔba wala kunsigijɛtigi si to yen. Ala ye u bɛɛ don masakɛ Nebukadnezar bolo.
[18] O ye Matigi ka so kɔnɔ minanw, misɛnmanw ni kunbabaw ani Matigi ka so kɔnɔ nafolo ani masakɛ ni a ka kuntigiw ka nafolo bɛɛ cɛ ka taa ni o ye Babilonɛ.
[19] Kaldekaw ye Ala ka so jeni ka Jerusalɛm lamini kogow ci ka tasuma don masaya so yɔrɔw bɛɛ la ka o kɔnɔ minan sɔngɔ gɛlɛnw bɛɛ tiɲɛn.
[20] O kɔ, mɔgɔ minw kisira npan ma, Nebukadnezar taara ni olu ye Babilonɛ ka olu kɛ a ni a denkɛw ka diyagoya baarakɛlaw ye fo ka taa se Perse masaya daminɛ tuma ma.
[21] O cogo la Matigi ka kuma min tun fɔra kira Jeremi fɛ, o dafara, sabu dugukolo ye a ka lafiɲɛ donw sɔrɔ. Ka a tiɲɛnnen lankolon to, a ye lafiya sɔrɔ fo ka san biwolonwula dafa.
[22] Perse masakɛ Sirus ka masaya san fɔlɔ la, Matigi ye miirili don Perse masakɛ Sirus dusu la walisa Matigi tun ye min fɔ kira Jeremi da la, o ka dafa. Sirus ye welewele da a ka mara yɔrɔw bɛɛ la ka o kuma sɛbɛn, ko Perse masakɛ Sirus ko: «Matigi, sankolola Ala ye dugukolo masayaw bɛɛ di ne ma k'a fɔ ne ye ko ne ka so jɔ a ye Jerusalɛm, o bɛ Juda jamana la. Aw la mɔgɔ minw bɛɛ ye a ka mɔgɔw ye, olu ka kɔsegin ka taa Jerusalɛm. Matigi, u ka Ala ka to u fɛ.»