[1] Josafat ye fɛn caman ni bonyaba sɔrɔ. Furu donna a ni Israɛl bɔnsɔn ka masakɛ Akab cɛ.
[2] San dama dɔ tɛmɛnnen kɔ, a taara Akab sɛgɛrɛ Samari. O tuma la Akab y'a ladon ka saga caman ni misi caman faga a ni a fɛ mɔgɔw ye. O kɔ, a y'a deli ko u ka taa ɲɔgɔn fɛ Galad jamana la Ramɔt kama.
[3] Israɛl bɔnsɔn ka masakɛ Akab y'a fɔ Juda bɔnsɔn ka masakɛ Josafat ye ko: «I b'a fɛ ka taa ne fɛ Galad jamana la Ramɔt kama wa?» Josafat y'a jaabi ko: «Ne ni e ye kelen ye, ne ka mɔgɔw ni i ka mɔgɔw ye kelen ye. An na taa i dɛmɛ nin kɛlɛ la.»
[4] O tuma la Josafat y'a fɔ Israɛl bɔnsɔn ka masakɛ ye ko: «Ne bɛ i deli, ko i ka Matigi ɲininka fɔlɔ.»
[5] O tuma la Akab ye Israɛl bɔnsɔn ka kiraw lajɛ yɔrɔ kelen na. Olu kɛra cɛ kɛmɛ naani ye, ka olu ɲininka ko: «Ne ka taa Galad jamana la Ramɔt kɛlɛ wa, wala ne kana taa?» U y'a jaabi ko: «I ka taa, Ala na o dugu don masakɛ bolo.»
[6] Nka Josafat y'a fɔ ko: «Yala Matigi ka kira dɔ wɛrɛ tɛ yan ninw kɔ, an bɛ se ka Matigi ɲininka min da la wa?»
[7] Israɛl bɔnsɔn ka masakɛ ye Josafat jaabi ko: «Mɔgɔ kelen wɛrɛ bɛ yen an bɛ se ka Matigi ɲininka min da la, nka o ko man di ne ye, k'a masɔrɔ a tɛ kirayaɲuman kɛ ne ko la. A tɛ foyi fɔ ne ye ni ko jugu tɛ. O ye Jimla denkɛ Mise ye.» Josafat pɛrɛnna ko: «Masakɛ kana kuma ten.»
[8] O tuma la Israɛl bɔnsɔn ka masakɛ ye jalatigi kelen wele du kɔnɔ k'a fɔ o ye ko: «I tɛliya ka taa Jimla denkɛ Mise wele ka na.»
[9] Israɛl bɔnsɔn ka masakɛ ani Juda bɔnsɔn ka masakɛ Josafat bɛɛ sigilen tun bɛ u ka masasigilanw kan fɛrɛkɛnɛ la Samari dugu donda la. U ka masaya finiw tun bɛ u kan na. Kiraw bɛɛ tun b'a la ka kiraya kɛ u ɲɛ kɔrɔ.
[10] Kenana denkɛ Sedesiasi ye biɲɛkolo nɛgɛlama dila a yɛrɛ ye k'a fɔ ko: «Matigi ko: ‹I na Sirikaw tuu ni nin biɲɛkolow ye fo ka u bɛɛ halaki ka u ban.›»
[11] Kiraw bɛɛ fana ye kiraya kɛ o cogo la k'a fɔ ko: «Masakɛ, i ka taa Galad jamana la Ramɔt kama. I na se sɔrɔ. Matigi na o dugu don i bolo.»
[12] Ciden min taara Mise wele, o y'a fɔ Mise ye ko: «A filɛ, kiraw ye kirayaɲuman kɛ masakɛ ye, i fana ka kirayaɲuman kɛ. Ne bɛ i deli, i ni olu ka kumaw ka bɛnɲɔgɔn ma.»
[13] Nka Mise ko: «Matigi ɲɛnama tɔgɔ kosɔn, ne ka Ala bɛ min fɔ ne ye, ne na o de fɔ.»
[14] Mise selen masakɛ kɔrɔ, masakɛ y'a fɔ a ye ko: «Mise, an ka taa Galad jamana la Ramɔt kɛlɛ wala an kana taa?» Mise y'a jaabi ko: «I ka taa, i na se sɔrɔ, juguw na don i bolo.»
[15] Nka masakɛ y'a fɔ a ye ko: «Ne ka kangari da i ye siɲɛ joli ko i kana foyi fɔ ne ye Matigi tɔgɔ la ni tiɲɛ tɛ?»
[16] O tuma la Mise y'a jaabi ko: «Ne ye Israɛl bɔnsɔn bɛɛ jɛnsɛnnen ye kulu kan i ko sagaw, gɛnbaa tɛ minw na. Matigi y'a fɔ ko kuntigi tɛ nin mɔgɔw kun na, ko bɛɛ kelen-kelen ka segin ka taa u ka so hɛrɛ la.»
[17] Israɛl bɔnsɔn ka masakɛ y'a fɔ Josafat ye ko: «Ne m'a fɔ i ye ko a tɛ kirayaɲuman si kɛ ne ko la fɔ kiraya jugu wa?»
[18] Mise y'a fɔ ko kura ko: «A' ye Matigi ka kuma lamɛn. Ne ye Matigi sigilen ye a ka masasigilan kan, sankolola kɛlɛbolow bɛɛ jɔlen bɛ a kinin yanfan ni a numan yanfan fɛ.
[19] Matigi y'a fɔ ko: ‹Aw la jumɛn na jigin ka taa Israɛl bɔnsɔn ka masakɛ Akab lafili walisa a ka taa Galad jamana la Ramɔt kama, a ka faga yen?› U y'a jaabi, dɔ ye kuma dɔ fɔ, dɔ wɛrɛ ye kuma wɛrɛ fɔ.
[20] O tuma la ni dɔ gɛrɛla ka i jɔ Matigi ɲɛ kɔrɔ k'a fɔ ko: ‹Ne na taa a lafili.›
[21] Matigi y'a ɲininka ko: ‹I na o kɛ cogo di?› A ye Matigi jaabi ko: ‹Ne na taa ne yɛrɛ kɛ ni nkalontigɛla ye a ka kiraw bɛɛ da la.› Matigi y'a fɔ a ye ko: ‹Ɔwɔ, i na se k'a lafili. I ka taa a kɛ i ko i y'a fɔ cogo min na. I na se ka o kɛ.›
[22] Ayiwa sisan, Matigi ye ni nkalontigɛla don o kiraw bɛɛ da la, k'a masɔrɔ Matigi ye ko jugu latigɛ i kama.»
[23] O tuma la Kenana denkɛ Sedesiasi gɛrɛla Mise la k'a bugɔ a tama na k'a fɔ a ye ko: «Yala Matigi Ni bɔra ne la ka tɛmɛn sira jumɛn fɛ ka kuma i fɛ?»
[24] Mise y'a jaabi ko: «Ni i taara i dogo sibon dogodogo la don min na, i na a dɔn o don na.»
[25] Israɛl bɔnsɔn ka masakɛ ye ci di ko: «A' ye Mise minɛ ka taa n'a ye dugutigi Amɔn ani masakɛ denkɛ Joas ka so.
[26] Aw k'a fɔ ko masakɛ ko, u ka nin cɛ bila kaso la k'a balo ni buuru ni ji dɔɔnin ye fo ne ka kɔsegin hɛrɛ la tuma min na.»
[27] Mise ko: «Ni i kɛnɛma kɔseginna hɛrɛ la, o tuma la Matigi ma kuma ne da la.» A ko fana: «Mɔgɔw bɛɛ, aw ka o mɛn.»
[28] O tuma la Israɛl bɔnsɔn ka masakɛ ani Juda bɔnsɔn ka masakɛ Josafat taara Galad jamana la Ramɔt kama.
[29] Israɛl bɔnsɔn ka masakɛ y'a fɔ Josafat ye ko: «Ne na ne ka finiw yɛlɛma ka taa kɛlɛ la, nka e ka i ka masaya finiw to i la.» Ayiwa Israɛl bɔnsɔn ka masakɛ ye a ka finiw yɛlɛma ka taa kɛlɛ la.
[30] O y'a sɔrɔ Sirikaw ka masakɛ tun ye ci di a ka wotorow kuntigiw ma ko: «Aw kana mɔgɔ si kɛlɛ, mɔgɔ misɛn fara mɔgɔba kan fɔ Israɛl bɔnsɔn ka masakɛ.»
[31] O tuma la wotoro kuntigiw ye Josafat ye tuma min na, u y'a fɔ ko: «Nin ye Israɛl bɔnsɔn ka masakɛ ye.» U y'a kooli walisa k'a kɛlɛ. Nka Josafat ye kulokanba bɔ. Matigi y'a dɛmɛ, Ala ye Sirikaw mabɔ a la.
[32] Wotoro kuntigiw y'a ye ko Israɛl bɔnsɔn ka masakɛ tɛ minkɛ, u y'u mabɔ a la.
[33] O tuma la cɛ dɔ y'a ka bonnikɛ kala bon ten, o taara bɛn Israɛl bɔnsɔn ka masakɛ ka nɛgɛ dulɔki tugu yɔrɔ dɔ ma. Masakɛ y'a fɔ a ka wotoro bolila ye ko: «I ka tɛliya ka i yɛlɛma ka taa ni ne ye ka bɔ kɛlɛkɛlaw cɛma, k'a masɔrɔ ne joginna.»
[34] Kɛlɛ juguyara o don na. Israɛl bɔnsɔn ka masakɛ tora a ka wotoro kɔnɔ Sirikaw ɲɛ fo ka taa se wula da ma. A sara tile bi tuma la.