[1] Asa ye ko ɲuman ni ko tilennenw kɛ Matigi, a ka Ala ɲɛ kɔrɔ.
[2] A ye jamana wɛrɛw ka bato fɛnw ka saraka bɔlanw ni batoli kɛ yɔrɔw ci ka boli samasenw karikari ka boliw tiɲɛn.
[3] A ye Juda bɔnsɔn jija ka Matigi, u bɛnbaw ka Ala ɲini ka Matigi ka sariyaw ni a ka ci fɔlenw kɛ.
[4] Batoli kɛ yɔrɔw ani samasen minw tun kɛra tile batoli kama, a ye olu bɛɛ tiɲɛn ka bɔ Juda bɔnsɔn ka duguw kɔnɔ. Jamana ye lafiya sɔrɔ a ka masaya waati la.
[5] Ka jamana to hɛrɛ la, Asa ye dugu barikamaw sigi Juda bɔnsɔn ka jamana kɔnɔ. Kɛlɛ si ma wuli Asa kama o waati la, k'a masɔrɔ Matigi ye lafiya di a ma.
[6] A y'a fɔ Juda bɔnsɔn ye ko: «An ka nin duguw barika bonya ka u lamini ni kogow ni sankansow ye ka konw ni sɔgɔlanw don u daw la. Jamana labilalen don an ɲɛ katuguni an ye Matigi an ka Ala ɲini. A ye hɛrɛ di an ma an fan bɛɛ la.» U ye duguw barika bonya. Ala dubara u ye.
[7] Kɛlɛkɛ cɛ minw tun bɛ Asa fɛ Juda bɔnsɔn na, olu tun ye cɛ waa kɛmɛ saba ye. Nɛgɛ bɛnnan belebelew ni tamaw tun bɛ olu bolo. Benjamɛn bɔnsɔn tɔw tun ye cɛ waa kɛmɛ fila ni bisegin ye. Nɛgɛ bɛnnan misɛnw ni bonnikɛ kalaw tun bɛ olu bolo. Kɛlɛkɛ cɛ farinw tun don.
[8] Etiopi Zerak ni a ka kɛlɛkɛ cɛ miliyɔn kelen ni a ka wotoro kɛmɛ saba taara Asa kama. O taara se fo Maresa.
[9] Asa taara a kunbɛn. U ye u labɛn kɛlɛ kama Zefata kuluw furancɛ la Maresa kɛrɛ fɛ.
[10] O tuma la Asa ye Matigi, a ka Ala deli ko: «Matigi, a man gɛlɛn i ma ka mɔgɔ barikantanw dɛmɛ ka mɔgɔ barikamaw kɛlɛ. I ka an dɛmɛ, Matigi, an ka Ala, k'a masɔrɔ an jigi dalen bɛ i kan ani an nana nin jamaba kama i tɔgɔ la. I ye Matigi, an ka Ala ye. I kan'a to mɔgɔ ka se sɔrɔ i kan.»
[11] Matigi ye Etiopikaw gosi Asa ni Juda bɔnsɔnɲɛ. Etiopikaw bolila.
[12] Asa ni a nɔ fɛ mɔgɔw ye u nɔgɛn ka taa se Gerar, Etiopikaw caman caman fagara, hali u la kelen ma dan kɛ. U halakira Matigi ni a ka kɛlɛboloɲɛ. Juda bɔnsɔn ye fɛn caman cɛ.
[13] U ye Gerar lamini duguw bɛɛ halaki k'a masɔrɔ Matigi ɲɛsiran ye olu ja tigɛ. U ye o duguw bɛɛ ci ka fɛn caman cɛ.
[14] U ye bagan mara yɔrɔw tiɲɛn ka sagakulu caman aniɲaamɛw caman minɛ. O kɔ, u kɔseginna ka taa Jerusalɛm.