[1] Juda ka masakɛ Asa ka masaya san bisaba ni wɔɔrɔnan la, Israɛl bɔnsɔn ka masakɛ Baesa taara Juda bɔnsɔn kama. Baesa ye Rama dugu barika bonya walisa u kana bɔ ka don Juda bɔnsɔn ka masakɛ Asa ka yɔrɔ la.
[2] Nka masakɛ Asa ye warijɛ ni sanu ta Matigi ka so kɔnɔ ani masaya so kɔnɔ nafolo mara yɔrɔw la ka cidenw ci ka taa Siri masakɛ Ben-Hadad sɛgɛrɛ, o sigilen tun bɛ Damasi.
[3] Asa y'a fɔ o ye ko: «An ka layidu taɲɔgɔn ye i ko e fa ni ne fa y'a kɛ cogo min na. Ne bɛ warijɛ ni sanu ci i ma, walisa i ka taa i ni Israɛl bɔnsɔn ka masakɛ Baesa cɛ layidu tiɲɛn walisa a ka mabɔ ne la.»
[4] Ayiwa Ben-Hadad ye masakɛ Asa lamɛn ka a ka kɛlɛkɛ cɛ kuntigiw ci ka taa Israɛl bɔnsɔn ka duguw kama. U ye Ijɔn ni Dan ni Abɛl-Maim ani Nefitali dumuni mara jiginɛw bɛɛ tiɲɛn.
[5] O yɔrɔ nin bɛɛ o fɔra Baesa ye. A ye Rama dugu jɔli dabila.
[6] Baesa tun bɛ Rama jɔ ni kabakurunw ni jiri minw ye, masakɛ Asa ye Juda mɔgɔw bɛɛ bila ka taa ka o kabakurunw ni o jiriw bɔ yen ka olu kɛ ka Geba ni Mizpa jɔ.
[7] O waati la yelikɛla Hanani taara Juda bɔnsɔn ka masakɛ Asa sɛgɛrɛ k'a fɔ o ye ko: «I taara i sinsin Siri masakɛ la, i ma i sinsin Matigi i ka Ala la, o de kosɔn Siri masakɛ ka kɛlɛbolow tilara ka bɔ i bolo.
[8] Etiopikaw ni Libikaw tun ma kɛlɛbolo barikamaw ni wotorow ani sotigiw caman labɛn wa? I tun ye i sinsin Matigi la, o de kosɔn Matigi ye olu don i bolo,
[9] k'a masɔrɔ Matigi b'a ɲɛ yaala ka dugukolo yɔrɔw bɛɛ filɛ minw bɛɛ bɛ a ɲini ni u dusukun bɛɛ ye, walisa a ka olu dɛmɛ. I ye hakilintanya kɛ nin ko la. Kabini sisan i tɛna kɛlɛ dabila.»
[10] Masakɛ Asa diminna yelikɛla kɔrɔ k'a bila kaso la, k'a masɔrɔ a ka kɔrɔfɔli ye a dusu bɔ. Masakɛ Asa ye a fanga digi jamana kɔnɔ mɔgɔ dɔw la o waati la.
[11] Asa ka ko tɔw, a daminɛw ni a labanw, olu bɛɛ sɛbɛnnen bɛ Juda bɔnsɔn ani Israɛl bɔnsɔn ka masakɛw ka kitabu kɔnɔ.
[12] Asa ka masaya san bisaba ni kɔnɔntɔnnan la, a senw banana. Olu tun b'a dimin kosɛbɛ. O bɛɛ n'a ta, k'a to o bana dalan kan, a ma Matigi ɲini fɔ furakɛlaw.
[13] Asa sunɔgɔra a bɛnbaw fɛ. A sara a ka masaya san binaani ni kelennan la.
[14] A su donna a ka kaburu kɔnɔ Dawuda ka dugu kɔnɔ. A tun ye o sen fara kan. U tun ye latikɔlɔn ni suma diyalan minw dila ka kɛɲɛ ni latikɔlɔn dilalaw ka dilali cogo ye, u ye a ka dalan fa ni olu ye k'a da olu kan. U ye o fɛn suma duman dama dɔnbali wusu a ye.