[1] Solomani ye nsiranɛgɛ saraka bɔlan fana jɔ. O janya tun ye nɔnkɔnɲɛ mugan ye, a bonya tun ye nɔnkɔnɲɛ mugan ye, a jɔ kundama tun ye nɔnkɔnɲɛ tan ye.
[2] A ye nsiranɛgɛ yeele ka faa belebeleba dila, o da tun ye nɔnkɔnɲɛ tan ye, a koolilen tun don. A jɔ kundama tun ye nɔnkɔnɲɛ duuru ye, a lamini suma jurukisɛ tun ye nɔnkɔnɲɛ bisaba ye.
[3] Masiri fɛn minw tun bɛ a dawolo jukɔrɔ, olu tun ye nɔnkɔnɲɛ kelen ntura tan bisigi nɔnkɔnɲɛ kelen ntura tan bisigi ye k'a lamini. O masiri fɛn sira fila tun kɛra ka faaba lamini. O bɛɛ kɛra ni nɛgɛ yeelelen kelen ye.
[4] O faaba tun sigira ntura tan ni fila bisigi kan. O ntura sabaɲɛ sinnen tun bɛ saheli ma, sabaɲɛ sinnen tun bɛ tilebi ma, sabaɲɛ sinnen tun bɛ worodugu ma, sabaɲɛ sinnen tun bɛ kɔrɔn ma. O faaba sigira olu kan, olu bɛɛ jɔra ka u kuw sinɲɔgɔn ma o faaba jukɔrɔ.
[5] O faaba dawolo firin giriya tun bɛ tɛgɛfura da yɔrɔ kelen bɔ. A dawolo tun bɛ i ko jifilen baga feerema bisigi. O faabaɲɛ kelen ji tun bɛ litiri waa kɛmɛ ni muganɲɔgɔn bɔ.
[6] Solomani ye koli minan wɛrɛw dila saniyali kama ka o duuru sigi kinin yanfan fɛ, ka duuru sigi numan yanfan fɛ Alabatosoba kɔnɔ. Olu kɛra saraka jenitaw koli kama. Nsiranɛgɛ faaba kɛra sarakalasebaaw saniyali kama.
[7] A ye sanu fitinɛ tan fana dila ka kɛɲɛ ni cogo sɛbɛnnen ye ka olu sigi Alabatosoba kɔnɔ. A ye duuru sigi kinin yanfan fɛ ka duuru sigi numan yanfan fɛ.
[8] A ye tabali tan dila ka olu sigi Alabatosoba kɔnɔ. A ye duuru sigi kinin yanfan fɛ ka duuru sigi numan yanfan fɛ Alabatosoba kɔnɔ. A ye sanu tasa kɛmɛ fana dila.
[9] A ye sarakalasebaaw ka du ni dukɛnɛ fana labɛn ani o dukɛnɛ dondaw ka o konw bɛɛ datugu ni nsiranɛgɛ ye.
[10] A ye nsiranɛgɛ faaba sigi so kinin yanfan fɛ worodugu ni kɔrɔn seleke la.
[11] Huram ye minanw dila, bugurijɛ cɛlanw ni peluw ani koli minanw. Ayiwa Huram tilara masakɛ Solomani ka baaraw bɛɛ la Alabatosoba kɔnɔ,
[12] samasen fila ni samasenw kunna birilan fila ani jɔ fila minw tun bɛ samasenw kunna birilanw fila da tugu.
[13] Gerenatiden bisigi kɛmɛ naani tun bɛ nsiranɛgɛ jɔ fila la, gerenatiden bisigi sira fila-fila tun bɛ o nsiranɛgɛ jɔ kelen-kelen na. O jɔw birila samasenw kun na.
[14] A ye koli minanw ni u sigi wotoro misɛnw fana dila,
[15] ani faaba ni a sigira ntura tan ni fila minw kan.
[16] Bugurijɛ cɛlanw ni peluw ni sogo sɔgɔlanw ni magoɲɛ minanw bɛɛ dilara ni nsiranɛgɛ nugulen ye. Solomani tun ye olu ko fɔ Huram-Abi ye Matigi ka so kɔnɔ baara kama.
[17] Masakɛ ye olu bɛɛ dila ni bɔgɔɲuman ye Sukɔt ni Zereda cɛ Jurdɛn jɛkɛnɛ la.
[18] Solomani ye magoɲɛ minan caman dila ni nsiranɛgɛ dama dɔnbali ye.
[19] Solomani ye minan dɔ wɛrɛw dila Ala ka so kama. Olu tun ye saraka bɔlan sanuma ani jirali buuru bila tabaliw
[20] ani sanu fitinɛw ani u ka lanpa minw dilara ni sanu yɛrɛwolo ye, i ko sariya y'a jira cogo min na ko u manalen ka to yɔrɔ senumaɲɛ fɛ,
[21] ani u baga feere bisigiw ni lanpaw ani balan minw dilara ni sanu yɛrɛwolo ye
[22] ani muruw ni tasaw ni kuyɛrɛw ani bugurijɛ cɛlan minw dilara ni sanu yɛrɛwolo ye. So donda la kon minw ɲɛ sinnen bɛ yɔrɔ senuma senuma ma ani kon minw bɛ so donda la, olu bɛɛ tun ye sanu ye.