[1] Ezekiasi sigira masaya la a si san mugan ni duurunan la. A ye san mugan ni kɔnɔntɔn kɛ masaya la Jerusalɛm. A ba tun ye Zakari denmuso ye, o tɔgɔ ko Abija.
[2] Ezekiasi ye ko ɲuman kɛ Matigi ɲɛ kɔrɔ i ko a bɛnba Dawuda y'a kɛ cogo min na.
[3] A ka masaya san fɔlɔ kalo fɔlɔ la, a ye Alabatosoba daw yɛlɛ ka u labɛn.
[4] A ye sarakalasebaaw ni Levitew wele ka u lajɛ dukɛnɛ kɔrɔn yanfan fɛ,
[5] k'a fɔ u ye ko: «Levitew, aw ka ne lamɛn. A' ye aw yɛrɛw saniya sisan ka Matigi, an bɛnbaw ka Ala ka so saniya ka yɔrɔ senuma senuma fura,
[6] k'a masɔrɔ an bɛnbaw ye jurumu kɛ ka ko jugu kɛ Matigi an ka Ala ɲɛ kɔrɔ. U y'a bila ka u kɔ don Matigi batoso la ka u kɔ don Matigi yɛrɛ la.
[7] U ye gwa daw tugu fana ka fitinɛ faga. U ma wusulan suma duman wusu, u ma saraka jenitaw jeni Israɛl bɔnsɔn ka Ala ye a ka yɔrɔ senuma kɔnɔ.
[8] O de kosɔn Matigi diminna Juda bɔnsɔn ni Jerusalɛmkaw kɔrɔ. A ye u bila tɔɔrɔ ni halakili la ka u kɛ dala file fyɛ fɛn ye i ko aw ɲɛ b'a la cogo min na.
[9] O de kosɔn an bɛnbaw fagara npan fɛ, an denkɛw ni an denmusow ani an musow cɛra ka kɛ jɔnw ye.
[10] «Nka ne b'a fɛ ka layidu ta Matigi, Israɛl bɔnsɔn ka Ala ye sisan, walisa a ka dimiyaba ka mabɔ an na.
[11] Ne denw, aw kana salaya, k'a masɔrɔ Matigi de ye aw ɲɛnatɔmɔ walisa aw ka to a ɲɛ kɔrɔ k'a ka baara kɛ ka kɛ a ka baarakɛlaw ye ka wusulan suma duman wusu a ye.»
[12] Ayiwa, Levite minw wulila, olu filɛ: Amasai denkɛ Mahat ni Azaria denkɛ Joɛl bɔra Kɛhat siya la. Minw bɔra Mɛrari bɔnsɔn na, olu tun ye Abdi denkɛ Kis ni Jehaleɛl denkɛ Azaria ye. Minw bɔra Gersɔn bɔnsɔn na, olu tun ye Zima denkɛ Joak ani Joak denkɛ Edɛn ye.
[13] Minw bɔra Elizafan bɔnsɔn na, olu tun ye Simri ani Jeiɛl ye. Minw bɔra Asaf bɔnsɔn na, olu tun ye Zakari ni Matania ye.
[14] Minw bɔra Heman bɔnsɔn na, olu tun ye Jehiɛl ni Simei ye. Minw bɔra Jedutun bɔnsɔn na, olu tun ye Semaɛja ni Uziɛl ye.
[15] Olu ye u balimaw lajɛ ka u yɛrɛw saniya. U ye masakɛ ka ci fɔlen kɛ ka kɛɲɛ ni Matigi ka kuma fɔlen ye Matigi ka so saniyali ko la.
[16] Sarakalasebaaw donna Matigi ka soɲɛ kɔnɔ la walisa k'a saniya. U ye fɛn nɔgɔlen minw sɔrɔ yɔrɔ senuma kɔnɔ, u ye olu bɛɛ bɔ yen ka u bila Matigi ka so dukɛnɛ la. Levitew ye olu ta ka taa n'u ye kɛnɛma ka u bila Sedrɔn kɔji la.
[17] U ye saniyali daminɛ san kalo fɔlɔ tile fɔlɔ don. Kalo tile seginnan don u donna Matigi ka so kɔnɔ ka tile segin kɛ a saniyali la. Kalo fɔlɔ tile tan ni wɔɔrɔnan don u tilara o baara la.
[18] U taara masakɛ Ezekiasi sɛgɛrɛ, u ko: «An ye Matigi ka so bɛɛ saniya, saraka jenita saraka bɔlan ni a minanw bɛɛ ani jirali buuru tabali ni a minanw bɛɛ.
[19] Masakɛ Akaz tun ye minan minw nɔgɔ a ka masaya waati la, a ka tilenbaliya kɛ tuma la, an ye olu bɛɛ labɛn ka u bɛɛ saniya. U filɛ Matigi ka saraka bɔlanɲɛ fɛ.»
[20] O dugusajɛ sɔgɔma da fɛ, masakɛ Ezekiasi ye dugu kɔnɔ kuntigiw bɛɛ lajɛ ka taa Matigi ka soba kɔnɔ.
[21] U taara ni ntura wolonwula ni sagajigi wolonwula ni san kelen sagaden wolonwula ani bakɔrɔ wolonwula ye ka kɛ jurumu kafari sarakaw ye masaya ni yɔrɔ senuma ani Juda bɔnsɔn kosɔn. O kɔ, masakɛ ye ci di sarakalasebaaw, Aron bɔnsɔn ma ko u ka olu lase Matigi ka saraka bɔlan kan.
[22] O tuma la sarakalasebaaw ye nturaw kan tigɛ ka u joli minɛ ka o seriseri saraka bɔlan kan. U ye sagajigiw kan tigɛ ka olu joli seriseri saraka bɔlan kan. U ye sagadenw fana kan tigɛ ka u joli seriseri saraka bɔlan kan.
[23] O kɔ, u taara ni jurumu yafa bakɔrɔw ye masakɛ ni jama bɛɛ ɲɛ kɔrɔ. Olu ye u bolow da u kan.
[24] Sarakalasebaaw ye olu kan tigɛ ka olu joli seriseri saraka bɔlanɲɛ fɛ ka kɛ Israɛl bɔnsɔn bɛɛ ka jalaki yafa saraka ye, k'a masɔrɔ masakɛ tun y'a fɔ ko saraka jenitaw ani saraka kɔrɔtataw ka lase Israɛl bɔnsɔn bɛɛ kosɔn.
[25] A ye Levitew ni u ka nsiranɛgɛ tɛgɛrɛw ni npɔlɔnw ni nkɔniw bila Matigi ka so kɔnɔ ka kɛɲɛ ni Dawuda ka ci fɔlen ni masakɛ ka yelikɛla Gad ka ci fɔlen ni kira Natan ka ci fɔlen ye, k'a masɔrɔ Matigi tun ye o ciw don o kiraw da la.
[26] Levitew kɛra Dawuda ka fɔlifɛnw fɔbaaw ye, buru fyɛtaw tun bɛ sarakalasebaaw bolo.
[27] O tuma la Ezekiasi ye ci di ko u ka saraka jenitaw lase saraka bɔlan kan. U ye saraka laseli daminɛ tuma min na, u ye dɔnkili dali fana daminɛ ka Israɛl bɔnsɔn ka masakɛ Dawuda ka fɔlifɛnw fɔ ka bɛn ni dɔnkili ye.
[28] Jama bɛɛ y'u biri o dɔnkili ni o buru fyɛ waati la. O bɛɛ kɛra fo ka saraka jenitaw laseli ban.
[29] U tilalen kɔ saraka jenitaw laseli la, masakɛ ni a fɛ mɔgɔw bɛɛ y'u biri ka batoli kɛ.
[30] O kɔ, masakɛ Ezekiasi ani kuntigiw ye ci di Levitew ma ko u ka tanuli dɔnkili da Matigi ye ni Dawuda ni yelikɛla Asaf ka dɔnkili kumaw ye. U y'a tanu niɲagaliba ye ka u biri ka batoli kɛ.
[31] O tuma la Ezekiasi ko: «Aw ye aw yɛrɛw bila Matigi ye sisan, aw ka na ni saraka fagataw ni nisɔndiya sarakaw ye Matigi ka so kɔnɔ.» Jama nana ni saraka kɔrɔtataw ni nisɔndiya sarakaw ani diyaɲe nili fɛnw ye ka olu kɛ saraka jenitaw ye.
[32] Jama nana ni saraka jenita minw ye, olu tun ye ntura biwolonwula ni sagajigi kɛmɛ ani sagaden kɛmɛ fila ye. Olu bɛɛ tun ye saraka jenitaw ye minw bɔra Matigi ye.
[33] U nana ni saraka wɛrɛ minw ye, olu tun ye ntura kɛmɛ wɔɔrɔ ani saga waa saba ye.
[34] Sarakalasebaaw tun man ca, hali u ma se ka baganw bɛɛ wolo bɔ. U balima Levitew ye u dɛmɛ fo ka o baara ban, fo ka sarakalasebaa wɛrɛw saniya, k'a masɔrɔ Levitew tun ye u yɛrɛw saniya ka tɛmɛn sarakalasebaa yɛrɛw kan.
[35] Saraka jenita caman wɛrɛw tun bɛ yen ani nisɔndiya sarakaw kɛn ni saraka bɔntaw. Ayiwa u ye Matigi ka so kɔnɔ baara daminɛ a cogo la ko kura.
[36] Masakɛ Ezekiasi ani mɔgɔw bɛɛ ɲagalila Ala ka ko ɲuman kɛlen kosɔn mɔgɔ bɛɛ dusukunw na. U ye o kow bɛɛ ban joona ka kɛɲɛ ni Matigi ka kuma ye.