[1] O kɔ, Moab bɔnsɔn ni Amɔn bɔnsɔn ani Maon bɔnsɔn taara Josafat kama k'a kɛlɛ.
[2] Mɔgɔ dɔ taara a fɔ Josafat ye ko: «Jamaba dama dɔnbali bɔra Kɔgɔji Salen kɔ fɛ Edɔm jamana la ka na i kama. U selen filɛ Hazazon-Tamar, o ye En-Gedi ye.»
[3] O tuma la Josafat siranna, a ye Matigi ɲinili daminɛ. A ye ci di ko Juda bɔnsɔn bɛɛ ka sun don.
[4] O tuma la Juda bɔnsɔn ye ɲɔgɔn lajɛ yɔrɔ kelen na ka dɛmɛni ɲini Matigi fɛ. U nana ka bɔ Juda bɔnsɔn ka duguw bɛɛ la ka Matigi tɔgɔ wele.
[5] O tuma la Josafat wulila ka i jɔ Juda bɔnsɔn jama bɛɛ ni Jerusalɛmkaw bɛɛ cɛma Matigi bato so kɔnɔ dukɛnɛ kuraɲɛ fɛ.
[6] A ko: «Matigi, an bɛnbaw ka Ala, yala e tɛ sankolola Ala ye wa? Yala e tɛ siyaw ka masayaw kun na wa? Barika ni fanga bɛɛ bɛ i bolo, foyi tɛ se ka i bali.
[7] An ka Ala, yala Ala min ye nin jamana kɔnɔ mɔgɔw gɛn ka bɔ i ka mɔgɔw Israɛl bɔnsɔnɲɛ ka nin jamana di i ka kanulen Ibrahima bɔnsɔn ma badaa, o tɛ e ye wa?
[8] U y'u sigi a kɔnɔ ka yɔrɔ senuma jɔ i tɔgɔ la k'a fɔ ko:
[9] ‹Ni bɔnɛ dɔ cunna an kan wala kɛlɛ wala fiɲɛbana jugu wala kɔngɔba, an na an jɔ nin so ni i ɲɛ kɔrɔ, k'a masɔrɔ i tɔgɔ bɛ wele nin so kɔnɔ. An degunnen na kasi i nɔ fɛ an ka tɔɔrɔw la. E na an kan lamɛn ka an kisi.›
[10] Ayiwa sisan Amɔn bɔnsɔn ni Moab bɔnsɔn ani Seir kulu mɔgɔw filɛ. Israɛl bɔnsɔn bɔra Misira jamana la tuma min na, i ma sɔn u ka don o mɔgɔw ka jamana la, nka u munumununa ka u to yen, u ma u halaki.
[11] U bɛ an sara cogo min na, o filɛ. U nana, ko u na an gɛn ka bɔ i ka jamana la, i ye o min di an ma ka kɛ an ta ye.
[12] An ka Ala, i tɛna i ka kiri tilennen tigɛ u kan wa? K'a masɔrɔ barika si tɛ an na nin jamaba dama dɔnbaliɲɛ kɔrɔ, olu minw natɔ don an kama. An ka kan ka min kɛ, an tɛ o dɔn, nka an ɲɛ jɔlen bɛ e de la.»
[13] Juda jamana kɔnɔ mɔgɔw bɛɛ wulila k'u jɔ Matigi ɲɛ kɔrɔ, hali u ka denmisɛnw ni u musow ani u denw.
[14] O tuma la Matigi Ni jiginna Jakaziɛl kan jama cɛma. O fa tun ye Zakari ye, Benaja denkɛ tun ye Zakari ye, Jeiɛl denkɛ tun ye Benaja ye, Matania denkɛ tun ye Jeiɛl ye, Levite Asaf bɔnsɔn tun don.
[15] Jakaziɛl y'a fɔ ko: «A' ye aw yɛrɛw kɔlɔsi, Juda bɔnsɔn ni Jerusalɛmkaw ani e masakɛ Josafat, a' ye lamɛnni kɛ. Matigi ko: ‹Aw kana siran, aw ja kana tigɛ o jama dama dɔnbaliɲɛ, katuguni nin kɛlɛ tɛ aw ta ye, nka Ala de ta don.
[16] A' ye jigin sini ka u kunbɛn. A filɛ, u na yɛlɛn Ziz tintin kan, aw na u sɔrɔ fo kulu furancɛ dan na, Jeruɛl kungokolon fan fɛ.
[17] Aw tɛna kɛlɛ kɛ nin se in na, a' ye aw labɛn, o kɔ, aw ka to yɔrɔ kelen na. Matigi na aw kisi cogo min na, aw na o ye. Juda bɔnsɔn ni Jerusalɛmkaw, aw kana siran, aw ja kana tigɛ.› Sini aw ka bɔ ka taa u kunbɛn, Matigi na to aw fɛ.»
[18] Josafat y'i biri k'a ɲɛ biri duguma. Juda bɔnsɔn ni Jerusalɛmkaw bɛɛ fana y'u biri Matigi ɲɛ kɔro k'a bato.
[19] Levitew Kɛhat ni Korɛ bɔnsɔnw wulila ka batoli kɛ ni kanba ye Matigi, Israɛl bɔnsɔn ka Ala ɲɛ kɔrɔ.
[20] O dugusajɛ sɔgɔma da joona fɛ, u solila ka wuli ka taa kungokolon fan fɛ Tekoa. Ka u to sira kan ka taa, Josafat y'i jira u la k'a fɔ u ye ko: «Juda bɔnsɔn ni Jerusalɛmkaw, a' ye ne lamɛn. A' ye aw jigi da Matigi, aw ka Ala kan, aw na sabati. A' ye aw jigi da a ka kiraw kan, aw ka ko kɛtaw naɲɛ.»
[21] A ni mɔgɔw ye ɲɔgɔn ye tuma min na, a ye dɔnkili dalaw sigi ko olu ka taa kɛlɛboloɲɛ. U ka dɔnkili da Matigi ye ka a tanu, u masirilen senuya la, u k'a fɔ ko: «Aw ka barika da Matigi ye, katuguni a ka makari bɛ to badaa.»
[22] Ka u to tanuli dɔnkili da la, Amɔn bɔnsɔn ni Moab bɔnsɔn ani Seir kulu kan mɔgɔ minw tun b'a fɛ ka Juda bɔnsɔn kɛlɛ, Matigi ye olu bilaɲɔgɔn na kaɲɔgɔn kɛlɛ. U tiɲɛnna,
[23] k'a masɔrɔ Amɔn bɔnsɔn ni Moab bɔnsɔn bira Seir kulu kan mɔgɔw kan ka olu tiɲɛn fo ka u bɛɛ faga ka u ban. U tilalen kɔ Seirkaw fagali la, u y'u yɛlɛmaɲɔgɔn kama kaɲɔgɔn faga.
[24] Juda bɔnsɔn sera sanfɛ kungokolon kɔnɔ tuma min na, u y'u yɛlɛma ka kungokolon fan filɛ. U ma foyi ye o jamaba la ni mɔgɔ salen suw tɛ duguma. Hali u la kelen ma kisi.
[25] Josafat ni a fɛ cɛw taara u suw wɔrɔn. U ye nafoloba sɔrɔ o mɔgɔ fagalenw cɛma ani finiw ani minan sɔngɔ gɛlɛn caman, u ye olu cɛ fo u ma se o bɛɛ kɔrɔ. U ye tile saba kɛ o fɛnw cɛli la katuguni u tun ka ca kosɛbɛ.
[26] A tile naaninan don, u taaraɲɔgɔn lajɛ Beraka jɛkɛnɛ la. U ye barika da Matigi ye yen. O de kosɔn o yɔrɔ tɔgɔ dara ko Beraka jɛkɛnɛ fo ka na se bi ma.
[27] O kɔ, Juda bɔnsɔn bɛɛ ni Jerusalɛmkaw kɔseginna Jerusalɛm niɲagali ye. Josafat tun bɛ u ɲɛ fɛ k'a masɔrɔ Matigi ye u dusukunw faɲagali la ka u tila ka bɔ u juguw bolo.
[28] O tuma la u donna Matigi ka so kɔnɔ Jerusalɛm ni npɔlɔnkan ni nkɔni fɔkan ani buru fyɛkan ye.
[29] Kabini siya wɛrɛw ka masayaw y'a mɛn ko Matigi ye Israɛl bɔnsɔn juguw bɛɛ kɛlɛ, Ala ɲɛsiran ye mɔgɔw bɛɛ minɛ.
[30] O cogo la Josafat ka mara tora hɛrɛ la. A ka Ala ye hɛrɛ di a ma a sigiɲɔgɔnw bɛɛ cɛma.
[31] Ayiwa Josafat ye Juda bɔnsɔn mara. A si tun ye san bisaba ni duuru ye a sigi tuma la masaya la. A ye san mugan ni duuru kɛ masaya la Jerusalɛm. A ba tɔgɔ ko Azuba, Silki denmuso tun don.
[32] Josafat ye a fa Asa ka siraw taama, a ma jɛngɛ ka mabɔ u la. A ye ko ɲuman kɛ Matigi ɲɛ kɔrɔ.
[33] O bɛɛ n'a ta batoli kɛ yɔrɔw ma bɔ yen. Mɔgɔ dusukunw nɔrɔlen ma to u bɛnbaw ka Ala ɲinili la.
[34] Josafat ka ko tɔw, u daminɛw ni u labanw, olu bɛɛ sɛbɛnnen bɛ Hanani denkɛ Jehu ka hakili jigin kitabu kɔnɔ, o donna Israɛl bɔnsɔn ka masakɛw ka kitabu kɔnɔ.
[35] O kɔ, Juda bɔnsɔn ka masakɛ Josafat ni Israɛl bɔnsɔn ka masakɛ Akazia jɛra, o min taama cogo tun manɲi.
[36] U jɛra ka jikan kurun dɔw dila minw tun bɛ taa Tarsisi. U ye o kurunw dila Eziɔn-Gebɛr.
[37] Nka Dodava denkɛ Eliezɛr min bɔra Maresa, o ye kiraya kɛ Josafat kama, ko: «E ni Akazia jɛra, o de kosɔn Matigi ye i ka baara tiɲɛn.» O jikan kurunw tiɲɛnna, u ma se ka taa Tarsisi.