[1] Ayiwa, masakɛ Solomani ye Alabatosoba ni a yɛrɛ ka so jɔ san mugan kɔnɔ.
[2] O kɔ, masakɛ Huram tun ye dugu minw di a ma, a ye olu jɔ ko kura ka Israɛl bɔnsɔn sigi o duguw kɔnɔ.
[3] O kɔ, masakɛ Solomani taara Zoba jamana la Hamat kama k'a minɛ.
[4] A ye Tadmor dugu jɔ ko kura kungokolon kɔnɔ ani Hamat fɛn mara duguw.
[5] A ye sanfɛ Bɛt-Horɔn ni duguma Bɛt-Horɔn fana jɔ ko kura. Dugu barikamaw tun don, lamini kogow ni dala konw ni sɔgɔlanw tun bɛ u la.
[6] Baalat dugu ni fɛn mara dugu minw tun bɛ Solomani fɛ ani wotoro mara duguw ani sotigiw ka duguw ani fɛn o fɛn jɔli nege tun bɛ Solomani la Jerusalɛm ani Liban ani a ka mara yɔrɔw bɛɛ la, a ye olu bɛɛ jɔ.
[7] Hɛti bɔnsɔn ka jamana mɔgɔ minw ɲɛnama tun don ani Amɔr siya ni Ferɛz siya ni Hev siya ani Jebuska minw tun tɛ Israɛl bɔnsɔn dɔ ye,
[8] o kɔrɔ ko, olu bɔnsɔn minw tora u kɔ jamana kɔnɔ ani Israɛl bɔnsɔn ma minw halaki ka u ban, Solomani ye olu kɛ a ka diyagoya baarakɛlaw ye. Olu bɛ o baara kɛ halibi.
[9] Israɛl bɔnsɔn si ma diyagoya baara kɛ Solomani ye. Olu tun bɛ a ka mɔgɔw ɲɛ minɛ ka taa kɛlɛ la ka kɛ Solomani ka kɛlɛkɛ cɛ farinw ani sɔrɔdasi kuntigi farinw ani a ka wotoro bolilaw ani a ka sotigiw ye.
[10] Masakɛ Solomani ka kuntigiw bɛɛ lajɛlen tun ye cɛ kɛmɛ fila ni biduuru ye, olu tun bɛ baarakɛlaw kun na.
[11] Solomani ye Faraon denmuso labɔ Dawuda ka dugu kɔnɔ k'a ladon so jɔlen kɔnɔ a ye, a ko: «Ne muso tɛna sigi Israɛl bɔnsɔn ka masakɛ Dawuda ka so kɔnɔ, k'a masɔrɔ yɔrɔ senuma don, sabu Matigi ka wagande donna yen.»
[12] Ayiwa masakɛ Solomani ye saraka jenita dɔw lase Matigi ye Matigi ka saraka bɔlan kan, a tun ye o jɔ gwaɲɛ fɛ.
[13] A ye saraka lase o kan ka kɛɲɛ ni Musa ka ci fɔlen ye, don o don saraka ko la ani lafiɲɛ don ta ani kalo kuraw ta ani seliba saba minw bɛ kɛ san kɔnɔ, olu taw, buuru fununbali seli ani dɔgɔkunw seli ani gwakɔrɔsigi seli.
[14] A ye sarakalasebaaw kuluw sigi u ka baara la ka kɛɲɛ ni a fa Dawuda ka ko latigɛlen ye. A ye Levitew fana sigi u ka baara la, u ka tanuli kɛ ka baara kɛ sarakalasebaaw ɲɛ kɔrɔ ka kɛɲɛ ni don o don baara kɛ cogo ye. A ye dakɔlɔsibaaw kuluw sigi dondaw bɛɛ la, katuguni Ala ka cɛ Dawuda tun ye o fɔ.
[15] Masakɛ tun ye ci min fɔ sarakalasebaaw ni Levitew ye fɛn o fɛn ko la ani nafolo ko la, u ma o si to yen.
[16] Kabini Matigi ka so ju bɔ don na fo ka taa se a laban don ma, u tugura Solomani ka ci fɔlenw la. Ayiwa Matigi ka so jɔra k'a ban.
[17] O tuma la Solomani taara Eziɔn-Gebɛr ani Elot kɔgɔji da la Edɔm jamana la.
[18] Masakɛ Huram ye jikan kurun dɔw ci a yɛrɛ ka baaradenw ni a ka kɔgɔji kan baarakɛlaw bolo. Olu ni Solomani ka baaradenw taaraɲɔgɔn fɛ Ofir. U kɔseginna ni sanu talan kɛmɛ naani ni biduuru ye ka bɔ Ofir ka taa o di masakɛ Solomani ma.