[1] Seba masamusoma ye masakɛ Solomani kibaru mɛn minkɛ, a taara Solomani sɛgɛrɛ Jerusalɛm ka a ɲininka ko gɛlɛnmaw na. Mɔgɔw caman taara a fɛ niɲaamɛ doninenw ye, fɛn suma duman sifa caman ni sanu caman ani kabakurun sɔngɔ gɛlen caman na. O masamusoma sera Solomani fɛ yen ka a kɔnɔna kow bɛɛ fɔ Solomani ye.
[2] Solomani y'a ka ɲininkaliw bɛɛ jaabi, a ka ɲininkali si ma to ni Solomani ma min jaabi.
[3] O tuma la a ye Solomani ka hakilitigiya ni a ka so jɔlen ye,
[4] ka a ka dumuni fɛnw ye, ani a ka baaradenw ka sigi yɔrɔw ani a ka kuntigibaw ka baara kɛ cogo ni olu fɛɛrɛbɔ cogo ani masakɛ ka minni fɛnɲɛnabɔbaaw ani olu fɛɛrɛbɔ cogo ani Solomani bɛ saraka jenita minw lase Matigi ka so kɔnɔ, olu ye Seba masamusoma kabakoya kosɛbɛ kosɛbɛ.
[5] O tuma la Seba masamusoma y'a fɔ masakɛ ye ko: «Ne tun ye i ka kɛwalew ni i ka hakilitigiya kibaru minw mɛn ka ne to ne ka jamana la, olu bɛɛ ye tiɲɛ ye.
[6] Ne tun ma da o fɔlen la sani ne yɛrɛ ka na yan ka u ye ne yɛrɛɲɛ la. Tiɲɛ don, hali i ka hakilitigiya tilancɛ tun ma fɔ ne ye. Ko minw tun fɔra ne ye i ko la, a tɛmɛnna olu bɛɛ kan.
[7] I ka mɔgɔw ni i ka baaraden minw bɛ jɔ i ɲɛ kɔrɔ tuma bɛɛ ka i ka hakilitigiya kumaw mɛn, olu ye dubadenw ye.
[8] Matigi, i ka Ala ka tanu, o min sɔnna ka i ɲɛnatɔmɔ ka i sigi a ka masasigilan kan walisa i ka masaya kɛ Matigi, i ka Ala tɔgɔ la, k'a masɔrɔ i ka Ala bɛ Israɛl bɔnsɔn kanu, a b'a fɛ ka u sabati badaa. O de y'a to a ye e sigi ka kɛ masakɛ ye, walisa i ka u mara ka kɛɲɛ ni tiɲɛ ni tilennenya kow ye.»
[9] O kɔ, Seba masamusoma ye sanu talan kɛmɛ ni mugan ani fɛn suma dumanw dama dɔnbali ani kabakurun sɔngɔ gɛlɛn caman di masakɛ ma. Seba masamusoma ye fɛn suma duman minw di masakɛ Solomani ma, a tun ma o bɔɲɔgɔnko sɔrɔ ka kɔrɔ.
[10] Huram ka baaradenw ni Solomani ka baaradenw tun bɛ taa sanu ta Ofir ani gwɛni jiriw ni kabakurun sɔngɔ gɛlɛnw.
[11] Masakɛ Solomani tun bɛ gwɛni jiriw kɛ yɛlɛnyɛlɛnnanw ye Matigi ka so la ani a yɛrɛ ka masaya so la ani dɔw tun bɛ kɛ nkɔniw ni npɔlɔnw ye dɔnkili dalaw ye. O jiriɲɔgɔn tun tɛ sɔrɔ Juda bɔnsɔn ka jamana la ka kɔrɔ.
[12] Fɛn o fɛn ko tun bɛ Seba masamusoma la, ani a ye fɛn minw deli, masakɛ Solomani ye o bɛɛ di a ma, ka fɛn caman di masamusoma ma ka tɛmɛn a ka fɛn dilenw kan. O kɔ, Seba masamusoma ni a ka baaradenw ye sira minɛ ka taa a ka jamana la.
[13] Masakɛ Solomani tun bɛ sanu min sɔrɔ san o san, o tun ye sanu talan kɛmɛ wɔɔrɔ ni biwɔɔrɔ ani wɔɔrɔ ye.
[14] A ye sanu min sɔrɔ jagokɛlaw fɛ, o sen t'a la. Arabu jamana masakɛw ni jamana kuntigiw taara ni sanu ni warijɛ ye k'a di Solomani ma.
[15] Masakɛ Solomani ye sanu nɛgɛ bɛnnan kɛmɛ fila dila ni sanu fagalen ye. O sanu nɛgɛ bɛnnan bɛɛ kelen-kelen dilara ni sanu sikle kɛmɛ wɔɔrɔ-wɔɔrɔ ye.
[16] A ye nɛgɛ bɛnnan misɛnman kɛmɛ saba dila. O sanu nɛgɛ bɛnnan bɛɛ kelen-kelen dilara ni sanu sikle kɛmɛ saba-saba ye. Masakɛ ye olu bila Liban kungo kɔnɔ masaya so kɔnɔ.
[17] Masakɛ Solomani ye masasigilan belebeleba dila ni samaɲin ye ka o yɔrɔ bɛɛ datugu ni sanu yɛrɛwolo ye.
[18] Senda yɔrɔ wɔɔrɔ tun bɛ o masasigilan na ani sanu sen dalan kelen, o nɔrɔlen tun bɛ masasigilan na. Boloda yɔrɔw tun bɛ o sigilan fan fila la. Waraba ja fila jɔlen tun bɛ o boloda yɔrɔw kɛrɛ fɛ.
[19] Waraba bisigi tan ni fila jɔlen tun bɛ masasigilan yɛlɛnyɛlɛnnan senda yɔrɔ wɔɔrɔ fan fila la, a kinin ni a numan fɛ. O bɔɲɔgɔnko si tun tɛ masaya wɛrɛ si la.
[20] Masakɛ Solomani ka jifilenw bɛɛ tun ye sanu ye. Minan minw tun bɛ Liban masaya so kɔnɔ, olu bɛɛ tun ye sanu yɛrɛwolo ye. O fɛn si tun tɛ warijɛ ye. Warijɛ tun tɛ jate masakɛ Solomani tilew la,
[21] k'a masɔrɔ masakɛ ka jikan kurunw ani Huram ka baaradenw tun bɛ taa Tarsisi san saba o san saba ka segin ni sanu ni warijɛ ni samaɲinw ni warabilenw ani nkumanw ye.
[22] Ayiwa masakɛ Solomani tɛmɛnna dugukolo kan masakɛw bɛɛ kan fɛntigiya ni hakilitigiya la.
[23] Dugukolo kan masakɛw bɛɛ tun bɛ taa Solomani sɛgɛrɛ, Ala ye hakilitigiya min don Solomani dusukun na, walisa u ka o lamɛn.
[24] Olu bɛɛ kelen-kelen tun bɛ taa ni u ka bonyali fɛnw ye, warijɛ minanw ni sanu minanw ani finiw ani kɛlɛkɛ minanw ni fɛn suma dumanw ni sow ni falibaw. A tun bɛ o fɛnw bɛɛ sɔrɔ san o san.
[25] Sow ani wotorow mara yɔrɔ waa naani tun bɛ Solomani fɛ ani so kan yɛlɛnnaw waa tan ni fila, olu tun bɛ a ka wotoro mara duguw la ani a yɛrɛ kɛrɛ fɛ Jerusalɛm.
[26] K'a daminɛ Ufrate ba da la fo ka taa se Filisitikaw ka jamana ma ka tɛmɛn ka taa se fo Misira jamana dancɛ ma, Solomani ye o yɔrɔw bɛɛ mara.
[27] Masakɛ ye warijɛ caya Jerusalɛm i ko kabakurunw, ka sedere jiri fana caya i ko kɛnɛba la torosunw.
[28] Solomani ye so minw sɔrɔ, olu tun bɛ bɔ Misira jamana la ani jamana wɛrɛw la.
[29] Masakɛ Solomani ka ko kɛlenw daminɛ ni a labanw bɛɛ sɛbɛnnen bɛ kira Natan ka kitabu ni kira Akija min bɔra Silo, o ka kiraya kuma la ani yelikɛla Jedo ka fɛn jiralenw na, a ye o min sɛbɛn Nebat denkɛ Jeroboam ko la.
[30] Solomani ye san binaani kɛ masaya la Israɛl bɔnsɔn bɛɛ kun na Jerusalɛm.
[31] O kɔ, Solomani sunɔgɔra a bɛnbaw fɛ, a su donna a fa Dawuda ka dugu kɔnɔ. A denkɛ Roboam sigira masaya la a nɔ na.