[1] Solomani y'a latigɛ ko a bɛ so jɔ Matigi ye ani a yɛrɛ ka masaya so fana.
[2] Solomani ye cɛ waa biwolonwulaɲɛnatɔmɔ ka kɛ doni talaw ye ani cɛ waa bisegin ka kɛ kaba dɛsɛlaw ye kuluw kan. Cɛ waa saba ni kɛmɛ wɔɔrɔ ka kɛ kuntigiw ye.
[3] O kɔ, Solomani ye cidenw bila ka taa Tir masakɛ Huram sɛgɛrɛ k'a fɔ o ye ko: «I ye min kɛ ne fa Dawuda ye ka sedere jiriw ci a ma walisa a ka so jɔ a yɛrɛ ye, i ka o ɲɔgɔn kɛ ne ye.
[4] Ne y'a latigɛ ko ne bɛ batoli so jɔ ne Matigi Ala ye. Ne na o di Ala ma ka wusulan saraka suma duman jeni a ɲɛ kɔrɔ. Ne na to ka jirali buuru bila a ɲɛ kɔrɔ tuma bɛɛ, ka saraka jenitaw lase sɔgɔma ni wula fɛ ani lafiɲɛ don na ani kalo kuraw ni Matigi an ka Ala ka seli donw na, o ye sariya wulibali ye Israɛl bɔnsɔn kan.
[5] Ne bɛ batoli so min jɔ, o na bonya k'a masɔrɔ an ka Ala ka bon ni bato fɛn tɔw bɛɛ ye.
[6] Nka jɔni bɛ se ka so jɔ a ye? Sankolo ni sankolow bɛɛ kunna sankolo yɛrɛ ka dɔgɔ a la. Ne ye jɔni ye fo ne ka so jɔ a ye ni wusulan suma duman wusuli ko tɛ?
[7] Ayiwa sisan, i ka mɔgɔ hakilitigi dɔ ci ne ma min bɛ sanu ni warijɛ ni nsiranɛgɛ ani nɛgɛfin ani lomasa gese ni gese bilen ani gese bagalen baara kɛ cogo dɔn kosɛbɛ, walisa o ni ne ka maɲɛrɛ dɔnnaw, ne fa Dawuda ye olu minw ɲɛnatɔmɔ, u ka baara kɛɲɔgɔn fɛ ne fɛ Jerusalɛm yan wala Juda jamana fan wɛrɛw fɛ.
[8] I ka Liban sedere jiriw ni sipere jiriw ni gweni jiri dɔw fana ci ne ma, k'a masɔrɔ ne y'a dɔn ko i ka baaradenw bɛ Liban jiri tigɛ cogo dɔn. Ne ka baaradenw na kɛ i taw fɛ.
[9] I ka jiri caman labɛn ne ye k'a masɔrɔ ne b'a fɛ ka so min jɔ, o ka bon, a cɛ ka ɲi kosɛbɛ.
[10] A filɛ, i ka baaraden minw na jiriw tigɛ ka u dila, ne na alikama barikoɲɛ waa mugan ni duuru ani orje barikoɲɛ waa mugan ni duuru ani diwɛn litiri waa kɛmɛ segin ani tulu litiri waa kɛmɛ segin di olu ma.»
[11] Tir masakɛ Huram ye sɛbɛn ci ka Solomani jaabi ko: «Matigi bɛ a ka mɔgɔw kanu, o de kosɔn a ye i sigi ka kɛ Israɛl mɔgɔw ka masakɛ ye.»
[12] A ko fana: «Matigi, Israɛl ka Ala ka tanu, o min ye sankolo ni dugukolo da, k'a masɔrɔ a ye denkɛ hakiliman di masakɛ Dawuda ma, mɔgɔ ko dɔnna hakilitigi don. A na so jɔ Matigi ye, ka masaya so jɔ a yɛrɛ ye.
[13] Ayiwa ne na mɔgɔ hakilitigi ko dɔnna dɔ ci i ma.
[14] O tɔgɔ ko Huram-Abi. Tirka don k'a masɔrɔ a fa bɔra Tir nka a ba bɔra Dan siya la. O bɛ sanu ni warijɛ ni nsiranɛgɛ ni nɛgɛfin baara cogo dɔn, ani kabakurun ni jiri dila cogo. A bɛ gese bilen ni lomaasa gese ni gese bagalen ani lenfu gese baara kɛ cogo dɔn. A bɛɲɛgɛnni sifa bɛɛ kɛ cogo dɔn. I mago bɛ baara sifa o sifa la, a bɛ o bɛɛ cogo dɔn. Ale ni i ka maɲɛrɛ dɔnnaw ani ne matigi Dawuda, i fa ka maɲɛrɛ dɔnnaw na baara kɛɲɔgɔn fɛ.
[15] Ne matigi, i ye alikama ni orje ni tulu ani diwɛn minw ko fɔ, i ka olu ci i ka baaradenw ma.
[16] An kɔni, an na i magoɲɛ jiriw tigɛ ka bɔ Liban ka taa n'u ye i fɛ yen kɔgɔji kan fo ka se Jafo dankan na. I na taa ni u ye Jerusalɛm.»
[17] Solomani ye Israɛl bɔnsɔn ka jamana la siginfɛw bɛɛ jate, o y'a sɔrɔ a fa Dawuda tun ye u bɛɛ jate ka kɔrɔ. Olu bɛɛ lajɛlen kɛra cɛ waa kɛmɛ ni biduuru ani waa saba ni kɛmɛ wɔɔrɔ ye.
[18] Solomani ye cɛ waa biwolonwulaɲɛnatɔmɔ ka kɛ doni talaw ye, ka cɛ waa biseginɲɛnatɔmɔ ka kɛ kaba dɛsɛlaw ye kuluw kan, ka cɛ waa saba ni kɛmɛ wɔɔrɔ kɛ baarakɛlaw kuntigiw ye, u ka mɔgɔw bɛɛ ka baara koɲɛnabɔ.