[1] Perse jamana masakɛ Sirus ka masaya san fɔlɔ la, Matigi ye miirili don Perse masakɛ Sirus dusu la walisa Matigi ye kuma min fɔ Jeremi da la, o ka dafa. Sirus ye welewele da a ka masaya mara fan bɛɛ la ni kanba ye ka o kuma sɛbɛn fana ko:
[2] «Perse masakɛ Sirus ko: ‹Matigi, sankolola Ala ye dugukolo kan masayaw bɛɛ don ne bolo ka ci di ne ma ko ne ka batoli so jɔ a ye Jerusalɛm, Juda bɔnsɔn ka jamana la.
[3] Aw la mɔgɔ minw bɛɛ ye a ka mɔgɔw ye, olu ka kɔsegin Jerusalɛm, Juda bɔnsɔn cɛma walisa ka Matigi, Israɛl ka Alabatosoba jɔ ko kura. Olu ka Ala ka to u fɛ. Ale de ye Ala ye min bɛ sigi Jerusalɛm.
[4] Yahutuw tɔ tolen minw sigilen bɛ yɔrɔ o yɔrɔ, olu sigiɲɔgɔnw ka warijɛ ni sanu ni bolo fɛnw ni baganw di u ma ka diyaɲe nili fɛnw fana di u ma Ala ka so jɔli kama Jerusalɛm.›»
[5] O tuma la Ala Ni ye miirili don Juda bɔnsɔn ni Benjamɛn bɔnsɔn ka gwaw kuntigiw ni sarakalasebaaw ani Levite minw dusu la, ko u ka taa Matigi ka so jɔ ko kura Jerusalɛm, olu y'u labɛn ka taa.
[6] Olu bɛɛ sigiɲɔgɔnw ye u dɛmɛ ka warijɛ ni sanu minanw ni bolo fɛnw ni baganw ni fɛn sɔngɔ gɛlɛnw di u ma. Diyaɲe nili fɛnw sen tun tɛ olu la.
[7] O kɔ, masakɛ Nebukadnezar tun ye Matigi ka so kɔnɔ minan minw ta ka olu bila a ka bato fɛn ka so kɔnɔ, Sirus ye olu di u ma ka taa n'u ye Jerusalɛm.
[8] Perse jamana masakɛ Sirus y'a fɔ a ka nafolo marabaa Mitredat ye ko a ka o minanw labɔ ka u dan ka u di Juda bɔnsɔn ka kuntigi Sesbazar ma.
[9] Olu jate bɛɛ lajɛlen filɛ nin ye: sanu tasa bisaba ni warijɛ tasa waa kelen ni muru mugan ni kɔnɔntɔn,
[10] ni sanu jifilen bisaba ni warijɛ jifilen sifa wɛrɛw kɛmɛ naani ni tan ani minan wɛrɛw waa kelen.
[11] Sanu minanw ni warijɛ minanw bɛɛ lajɛlen tun ye waa duuru ni kɛmɛ naani ye. O minan minw tun tara Babilonɛ, Sesbazar kɔseginna ni olu bɛɛ ye mɔgɔ cɛlenw kɔsegin tuma la ka bɔ Babilonɛ ka taa Jerusalɛm.