[1] Joas sigira masaya la a si san wolonwulanan la. A ye san binaani kɛ masaya la Jerusalɛm. A ba tɔgɔ ko Zibija ka bɔ Beɛr-Seba.
[2] Masakɛ Joas ye ko ɲuman kɛ Matigi ɲɛ kɔrɔ sarakalasebaa Jehojada tilew la.
[3] Jehojada ye muso fila furu Joas ye. A ye denkɛw ni denmusow sɔrɔ.
[4] O kɔ, Joas y'a latigɛ ko a bɛ Matigi ka so tiɲɛn yɔrɔw dila.
[5] A ye sarakalasebaaw ni Levitew lajɛ k'a fɔ u ye ko: «A' ye taa Juda bɔnsɔn ka duguw la ka wari dɔ lajɛ Israɛl bɔnsɔn bɛɛ cɛma san o san, walisa aw ka Ala ka so tiɲɛn yɔrɔw dila. Ayiwa aw ka aw tɛliya ka o kɛ.» Nka Levitew ma o kɛ joona.
[6] Masakɛ ye u kuntigi Jehojada wele k'a fɔ a ye ko: «Matigi ka jɔnkɛ Musa ye nisɔngɔ ko min fɔ Israɛl bɔnsɔn ka seereya finiso kosɔn, mun y'a to i ma Levitew jija ka na ni o wari ye ka bɔ Juda bɔnsɔn ni Jerusalɛmkaw cɛma?»
[7] K'a masɔrɔ masamusoma Atali ni a denkɛw ye Ala ka so kɔnɔ fɛnw tiɲɛn ka fɛn senumaw ta ka olu bila Baal boliw bato so kɔnɔ.
[8] O tuma la masakɛ ko u ka kɛsu dɔ dila ka o sigi kɛnɛma Matigi ka so donda la.
[9] O kɔ, ka welewele da Juda bɔnsɔn bɛɛ cɛma ani Jerusalɛm, ko Ala ka baaraden Musa ye nisɔngɔ ko min fɔ Israɛl bɔnsɔn ye kungokolon kɔnɔ, ko u bɛɛ ka na ni o ye k'a di Matigi ma.
[10] Kuntigiw bɛɛ ni jama bɛɛ ɲagalila o kosɔn. U bɛɛ taara ni nisɔngɔ wari ye ka o kɛ o kɛsu kɔnɔ fo u bɛɛ y'a sara k'a ban.
[11] Levitew y'a ye ko wari caman bɛ kɛsu kɔnɔ tuma min na, u taara ni o ye k'a di masakɛ ka sɛbɛnnikɛla ma. Masakɛ ka sɛbɛnnikɛla ni sarakalasebaaw kuntigi ka baarakɛla nana o wari bɛɛ bɔ kɛsu kɔnɔ, o kɔ, Levitew ye o kɛsu ta ka taa o sigi a nɔ na. U ye o kɛ don o don fo ka wari caman lajɛɲɔgɔn kan.
[12] Masakɛ ni sarakalasebaa Jehojada taara o di baara kuntigiw ma Matigi ka so tiɲɛn yɔrɔw dilali kosɔn. U ye masɔnw ni mininsiyew ta walisa ka Matigi ka so tiɲɛn yɔrɔw dila. U ye nɛgɛfin ni nsiranɛgɛ baara kɛ numuw fana sara ka Matigi ka so dila.
[13] Baarakɛlaw ye u jija baara la k'u janto a la. U ye Ala ka so dila o cogo la k'a barika bonya.
[14] U ka baara bannen kɔ, u taara ni wari tɔ tolen ye masakɛ ni Jehojada yɔrɔ la ka olu kɛ minanw ye Alabatosoba baaraw kama, sanu minanw ni warijɛ minanw, saraka jenita minanw ni jifilenw ani minan wɛrɛw. U tora ka saraka jenitaw lase Matigi ka so kɔnɔ Jehojada si tilew bɛɛ la.
[15] Jehojada kɔrɔla, a si dafalen sara. A si tun ye san kɛmɛ ni bisaba ye a sa tuma la.
[16] U y'a su don masakɛw fɛ Dawuda ka dugu kɔnɔ, k'a masɔrɔ a ye ko ɲuman kɛ Israɛl bɔnsɔn ye ni kantigiya ye Ala ni a ka soɲɛ kɔrɔ.
[17] Sarakalasebaa Jehojada salen kɔ, Juda bɔnsɔn kuntigiw nana u biri masakɛ kɔrɔ. Masakɛ ye u lamɛn.
[18] U ye Matigi, u bɛnbaw ka Ala ka so bila ka boliw ni Astarte boliw bato. O tuma la Matigi diminna Juda bɔnsɔn ni Jerusalɛm kɔrɔ u ka juguya kosɔn.
[19] Matigi ye kiraw ci u ma walisa ka u lasegin a ma, nka u ma olu ka laadilikan lamɛn.
[20] Matigi Ni jiginna sarakalasebaa Jehojada denkɛ Zakari kan. O taara mɔgɔw ɲɛ kɔrɔ k'a fɔ u ye ko: «Ala bɛ aw ɲininka ko mun y'a to aw ye Matigi ka ci fɔlenw tiɲɛn ka ko jugu lase aw yɛrɛw ma? Aw ye Matigi bila, o de kosɔn ale fana na aw bila.»
[21] Nka u diminna Zakari kɔrɔ k'a bon ni kabakurunw ye Matigi ka so dukɛnɛ la, i ko masakɛ y'a fɔ u ye cogo min na.
[22] Ayiwa masakɛ Joas hakili ma to Zakari fa Jehojada ka ko ɲuman kɛlenw na. A ye o denkɛ faga, nka Zakari satɔ y'a fɔ ko: «Matigi ka i filɛ ka i sara.»
[23] San yɛlɛma tuma la, Sirikaw ka kɛlɛbolo taara Joas kama ka Juda jamana minɛ ka don Jerusalɛm. Sirikaw ye mɔgɔ caman faga ka kuntigiw bɛɛ faga ka u ka fɛn cɛlenw ci u ka masakɛ yɔrɔ la Damasi.
[24] O bɛɛ n'a ta Sirikaw ka kɛlɛkɛ cɛw tun man ca, Matigi ye kɛlɛboloba don u bolo sabu Juda bɔnsɔn tun ye Matigi, u bɛnbaw ka Ala bila. Sirikaw ye kiri tigɛ Joas kan a ka juguya kosɔn.
[25] U y'u mabɔ a la tuma min na k'a to a ka tɔɔrɔba la, a yɛrɛ ka baaradenw wulila a kama sarakalasebaa Jehojada denkɛ fagali kosɔn. U y'a faga a ka dalan kan. A sara. U y'a su don Dawuda ka dugu kɔnɔ nka u ma a su don masakɛw ka kaburuw kɔnɔ.
[26] Minw wulila a kama, olu tun ye Zabad ni Jozabad ye. Zabad ba tɔgɔ ko Simeat ka bɔ Amɔn bɔnsɔn na. Jozabad ba tɔgɔ ko Simrit ka bɔ Moab bɔnsɔn na.
[27] Ko minw fɔra Joas denkɛw ko la ani kiraya kuma minw fɔra a ko la ani a ye Ala ka so jɔ cogo min na, olu bɛɛ sɛbɛnnen bɛ masakɛw ka hakili jigin kitabu kɔnɔ. A denkɛ Amazia sigira masaya la a nɔ na.