[1] Ayiwa, o tuma la Ala Ni jiginna Odɛd denkɛ Azaria kan.
[2] O kɛlen, Azaria bɔra ka taa masakɛ Asa kunbɛn k'a fɔ a ye ko: «Asa ani Juda ni Benjamɛn bɔnsɔn, aw ka ne lamɛn. Ni aw tora Matigi fɛ, a na to aw fɛ. Ni aw y'a ɲini, aw n'a ye, nka ni aw murutira a ma, a na aw bila.
[3] Kabini waati jan, Ala sɛbɛ tun tɛ Israɛl bɔnsɔn fɛ. Sarakalasebaa fana tun tɛ u fɛ wala sariya, ka u kalan.
[4] Nka u degun tuma la, u kɔseginna Matigi, Israɛl bɔnsɔn ka Ala ma. U y'a ɲini, u y'a ye fana.
[5] Dɛmɛ cogo tun tɛ u fɛ u don tuma ni u bɔ tuma la, sabu tɔɔrɔba tun bɛ jamana kɔnɔ mɔgɔw bɛɛ kan.
[6] Siya dɔ tun bɛ siya dɔ halaki, dugu dɔ tun bɛ dugu dɔ halaki. O cogo la Ala ye degun ni bɔnɛ sifa caman lase u ma.
[7] Nka aw kɔni, a' ye aw ja gɛlɛya, aw bolo barika kana ban, k'a masɔrɔ aw na aw ka baara baraji sɔrɔ.»
[8] Masakɛ Asa ye o kuma ni Odɛd denkɛ Azaria ka kiraya kumaw mɛn minkɛ, a ja gɛlɛyara. A ye boli haramulenw tiɲɛn ka bɔ Juda bɔnsɔn ni Benjamɛn bɔnsɔn ka jamana kɔnɔ, ani a ye dugu minw minɛ Efrayim kulu jamana la, Matigi ka saraka bɔlan min tun bɛ Matigi ka gwaɲɛ fɛ, a ye o dila ko kura.
[9] O kɔ, a ye Juda bɔnsɔn cɛw ni Benjamɛn bɔnsɔn cɛw lajɛ ani Efrayim ni Manase ni Simeɔn bɔnsɔn cɛ minw nana ka bɔ Israɛl bɔnsɔn cɛma, a ye olu bɛɛ lajɛ a kɔrɔ, katuguni u y'a ye ko Matigi Ala tora Asa fɛ.
[10] Olu bɛɛ ye ɲɔgɔn lajɛ Jerusalɛm Asa ka masaya san tan ni duurunan kalo sabanan la.
[11] U ye sarakaw bɔ Matigi ye o don na ka bɔ u ka fɛn cɛlenw la. Olu tun ye misi kɛmɛ wolonwula ni saga waa wolonwula ye.
[12] U y'a latigɛ ko u bɛ Matigi, u bɛnbaw ka Ala ɲini ni u dusukun bɛɛ ye ani u hakili bɛɛ.
[13] U ko, ni mɔgɔ o mɔgɔ ma sɔn ka Matigi, Israɛl ka Ala ɲini, ko o mɔgɔ na faga, mɔgɔ misɛn fara mɔgɔba kan, cɛ fara muso kan.
[14] U ye u kali Matigi ye ni kanba ni pɛrɛnkan ani burukan ni biɲɛkolo burukan ye.
[15] Juda bɔnsɔn mɔgɔw bɛɛ nisɔndiyara o kalili kosɔn katuguni u ye o kalili kɛ ni u dusukun bɛɛ ye. U ye Matigi ɲini ni diyaɲe ye, u y'a sɔrɔ. O de kosɔn Matigi ye lafiya di u ma u fan bɛɛ la.
[16] Masakɛ Asa ye a ba Maka bɔ masamusoya la, k'a masɔrɔ o tun ye Astarte boli dɔ jɔ. Asa ye a ba ka boli tiɲɛn k'a karikari ka o jeni Sedrɔn kɔji da la.
[17] O bɛɛ n'a ta batoli kɛ yɔrɔw ma ci ka bɔ Israɛl bɔnsɔn cɛma, nka Asa nɔrɔlen tora Matigi la ni a dusukun bɛɛ ye a si bɛɛ la.
[18] Asa fa tun ye fɛn minw di Ala ma ani a yɛrɛ ye fɛn minw di Ala ma, warijɛw ni sanuw ani minan tɔw, a ye olu bɛɛ bila Ala ka so kɔnɔ.
[19] Kɛlɛ si ma kɛ fo ka taa se Asa ka masaya san bisaba ni duurunan ma.