[1] Manase sigira masaya la a si san tan ni filanan la. A ye san biduuru ni duuru kɛ masaya la Jerusalɛm.
[2] Matigi ye siya minw gɛn ka bɔ Israɛl bɔnsɔnɲɛ, Manase ye ko jugu kɛ Matigi ɲɛ kɔrɔ ka kɛɲɛ ni olu ka ko haramulenw ye.
[3] A fa Ezekiasi tun ye batoli kɛ yɔrɔ minw ci, ale ye olu jɔ ko kura ka saraka bɔlanw jɔ Baal batoli kama. A ye Astarte boli dila ka i biri sankolola kɛnɛbɔlanw kɔrɔ ka olu bato.
[4] Matigi tun y'a fɔ a ka so min ko la ko: «Ne tɔgɔ na da o kan badaa.» Manase ye saraka bɔlan dɔw jɔ o so yɛrɛ kɔnɔ.
[5] A ye saraka bɔlanw jɔ Matigi ka so dukɛnɛ fila la sankolola kɛnɛbɔlanw batoli kama.
[6] A y'a denkɛw jeni Hinom denkɛw ka kulu furancɛ la. A ye taamashyɛn dɔnbaaya kɛ ka filɛli kɛ ka subaaya kɛ ka jinɛ kililaw ni filɛlikɛlaw sigi. A ye ko jugu caman kɛ ka Matigi dusu dimin.
[7] A ye boli dɔ dila ka o jɔ Ala ka so kɔnɔ, Ala tun y'a fɔ Dawuda ni a denkɛ Solomani ye o so min ko la ko: «Ne de ye nin batoso ani Jerusalɛm duguɲɛnatɔmɔ Israɛl bɔnsɔn bɛɛ cɛma ka ne tɔgɔ da o kan badaa.
[8] Ne tɛna Israɛl bɔnsɔn bila, ne ye jamana min di u bɛnbaw ma, ne tɛna u labɔ o kɔnɔ, ni u ye ne kan minɛ ka ne ka sariyaw ni ne ka ko latigɛlenw ni ne ka ci fɔlenw siraw taama, olu minw sɛbɛnna Musa fɛ.»
[9] Nka Matigi ye siya minw halaki ka u ban ka bɔ Israɛl bɔnsɔnɲɛ, Manase ye Juda bɔnsɔn ni Jerusalɛmkaw ɲɛ minɛ ka ko jugu kɛ ka tɛmɛn o siyaw ka ko jugu kɛlenw kan.
[10] Matigi kumana Manase ni a ka mɔgɔw fɛ nka u ma u yɛrɛw kɔlɔsi.
[11] O de kosɔn Matigi ye Asiri masakɛ ka kɛlɛbolow kuntigiw ci u kama. Olu ye Manase don nɛgɛ la k'a siri ni nsiranɛgɛ jɔlɔkɔw ye ka taa n'a ye Babilonɛ.
[12] A tɔɔrɔla yen tuma min na, a kasira Matigi, a ka Ala nɔ fɛ ka a yɛrɛ majigin a bɛnbaw ka Ala ɲɛ kɔrɔ.
[13] A ye Ala deli, Matigi hinɛna a la k'a ka deliliw jaabi k'a lasegin Jerusalɛm a ka masaya la. O tuma la Manase y'a dɔn ko Matigi de ye Ala ye.
[14] O kow kɔ, Manase ye kogo dɔ jɔ Dawuda ka dugu kɔ fɛ tilebi yanfan fɛ Gihɔn jɛkɛnɛ la, ka o kogo kundama janya kosɛbɛ. A ye a daminɛ kulu furancɛ la fo ka taa se jɛgɛ donda ma ka Ofɛl lamini. A ye kɛlɛbolo kuntigiw sigi Juda bɔnsɔn ka dugu barikamaw fana kɔnɔ.
[15] Jamana wɛrɛw ka bato fɛnw ani boli min tun bɛ Matigi ka so kɔnɔ, a ye olu ni u ka saraka bɔlanw ci ka bɔ Matigi ka so kɔnɔ. A tun ye saraka bɔlan minw jɔ Matigi ka so kulu kan ani Jerusalɛm, a ye olu bɛɛ ci ka u fili dugu kɔ fɛ.
[16] O kɔ, a ye Matigi ka saraka bɔlan jɔ ka nisɔndiya sarakaw ani barika dali sarakaw lase o kan ka ci di Juda bɔnsɔn ma ko u ka baara kɛ Matigi, Israɛl bɔnsɔn ka Ala ye.
[17] O bɛɛ n'a ta mɔgɔw tora ka sarakaw lase batoli kɛ yɔrɔw kan, nka o kɛra Matigi, u ka Ala kelenpe ye.
[18] Manase ka ko tɔw ani a ka Ala delili ani kiraw ye kuma minw fɔ a ye, Matigi, Israɛl bɔnsɔn ka Ala ko la, olu bɛɛ sɛbɛnnen bɛ Israɛl bɔnsɔn ka masakɛw ka kitabu kɔnɔ.
[19] A ka deliliw ani olu jaabira cogo min na ani a ka jurumu kɛlenw bɛɛ ani a ka kanntanya bɛɛ ani a ye batoli kɛ yɔrɔ minw jɔ ka boliw ni ja dɛsɛnen minw dila sani a ka a yɛrɛ majigin, olu bɛɛ bɛ lakali Hozai ka kuma la.
[20] O kɔ, Manase sunɔgɔra a bɛnbaw fɛ. U y'a su don a ka masaya so kɔnɔ. A denkɛ Amɔn sigira masaya la a nɔ na.
[21] Amɔn si tun ye san mugan ni fila ye a sigi tuma la masaya la. A ye san fila kɛ masaya la Jerusalɛm.
[22] A ye ko jugu kɛ Matigi ɲɛ kɔrɔ i ko a fa Manase y'a kɛ cogo min na. A ye sarakaw bɔ a fa Manase ka ja dɛsɛnenw bɛɛ ye ka olu bato.
[23] A ma a yɛrɛ majigin Matigi ye i ko a fa Manase y'a yɛrɛ majigin cogo min na, nka Amɔn tun bɛ jalakima kow kɛ ka ta'a fɛ.
[24] A ka baaradenw wulila a kama k'a faga a ka masaya so kɔnɔ.
[25] Minw tun bɛ masakɛ Amɔn kama, jamana kɔnɔ mɔgɔw wulila olu kama ka olu bɛɛ faga ka a denkɛ Josiasi sigi ka kɛ masakɛ ye a nɔ na.