[1] Ayiwa Juda bɔnsɔn bɛɛ ye Oziasi ta k'a kɛ masakɛ ye a fa Amazia nɔ na a si san tan ni wɔɔrɔnan la.
[2] A ye Elat dugu jɔ ko kura ka o kɔsegin Juda bɔnsɔn ma masakɛ Amazia salen kɔ.
[3] Oziasi si tun ye san tan ni wɔɔrɔ ye a sigi tuma la masaya la. Ale ye san biduuru ni fila kɛ masaya la Jerusalɛm. A ba tɔgɔ ko Jekolia ka bɔ Jerusalɛm.
[4] Oziasi ye ko ɲuman kɛ Matigi ɲɛ kɔrɔ ka kɛɲɛ ni a fa Amazia ka kɛwalew bɛɛ ye.
[5] Zakari min tun bɛ mɔgɔw kalan Ala ɲɛsiran na, ka o ɲɛnama to, Oziasi y'a sɛbɛ don Ala ɲini la. Ala ye a ka kɛtaw ɲɛ.
[6] Oziasi wulila Filisitikaw kama ka Gat dugu lamini kogow ni Jabine ani Asdɔd lamini kogow ci. A ye dugubaw sigi Asdɔd jamana la ani Filisitikaw cɛma.
[7] Ala y'a dɛmɛ ka Filisitikaw kɛlɛ, Arabu minw sigilen tun bɛ Gur-Baal, ka olu ni Maonkaw kɛlɛ.
[8] Amɔn bɔnsɔn tun bɛ taa nisɔngɔ di Oziasi ma. A tɔgɔ bɔra fo ka taa se Misira jamana la k'a sɔrɔ a barika tun bɛ bonya ka ta'a fɛ.
[9] Oziasi ye sankanso janw jɔ Jerusalɛm seleke donda la ani jɛkɛnɛ sira donda la ani lamini kogo seleke la ka u barika bonya.
[10] A ye sankanso jan dɔw jɔ kungokolon kɔnɔ ka ji dingɛ caman sen kungokolon kɔnɔ, k'a masɔrɔ bagankulu caman tun bɛ a fɛ jɛkɛnɛ ni kɛnɛba la. Sɛnɛkɛlaw ni rezɛn nakɔtu sɛnɛkɛlaw tun bɛ a fɛ kuluw kan ani Karmɛl, katuguni sɛnɛ ko tun ka di a ye kosɛbɛ.
[11] Kɛlɛkɛ cɛ caman tun bɛ Oziasi fɛ fana. Sɛbɛnnikɛla Jeiɛl ani kuntigi Maseja tun bɛ u dan ka u sɛbɛn kɛlɛbolow la ka taa ka kɛlɛ kɛ. Masakɛ ka kɛlɛ kuntigiw la kelen min tɔgɔ ko Hananiya, o tun bɛ o baara kun na.
[12] Gwatigi minw tun bɛ kɛlɛkɛ cɛw kun na, olu dama tun ye cɛ waa fila ni kɛmɛ wɔɔrɔ ye.
[13] Olu tun bɛ sɔrɔdasi minw kun na, olu tun ye kɛlɛkɛ cɛ farinw waa kɛmɛ saba ani waa wolonwula ni kɛmɛ duuru ye. Olu tun ye cɛ farinw ye ka masakɛ dɛmɛ kɛlɛ la a juguw kama.
[14] Masakɛ Oziasi tun bɛ nɛgɛ bɛnnanw ni tamaw ni nɛgɛ fugulaw ni nɛgɛ dulɔkiw ni bonnikɛ kalaw ani ntanfuraw di o kɛlɛkɛ cɛ bɛɛ kelen-kelen ma.
[15] A ye biɲɛ bon minanw ni kabakurunw kunbaba bon minanw dila Jerusalɛm, u ka sigi sankanso janw ni lamini kogo selekew san fɛ. Mɔgɔ maɲɛrɛ dɔnnaw ye o kow dabɔ. A tɔgɔ bɔra kosɛbɛ fo ka se yɔrɔ jan, katuguni Ala ye a dɛmɛ ka fangaba sɔrɔ. O kɛra kabako dɛmɛni ye.
[16] Nka a ye fangaba sɔrɔ tuma min na, a ye a yɛrɛ bonya fo ka ko jugu kɛ. A ye Matigi a ka Ala hakɛ ta. A donna Matigi batosoba kɔnɔ ko a bɛ wusulan suma duman wusu wusulan suma duman saraka bɔlan kan.
[17] Nka sarakalasebaa Azaria donna a nɔ fɛ ni Matigi ka sarakalasebaa cɛ bisegin ye minw ja tun ka gɛlɛn. Olu ye masakɛ Oziasi kɔrɔfɔ ko: «E tɛ wusulan suma duman wusubaa ye Matigi ye, Oziasi! Nka o ye sarakalasebaaw, Aron bɔnsɔnw ka baara ye, olu saniyara o baara kɛli kama. I ka bɔ yɔrɔ senuma kɔnɔ, k'a masɔrɔ i ye tilenbaliya ko kɛ. O tɛna i ko diya Matigi, i ka Ala ye.»
[19] Ayiwa wusulan daga tun bɛ Oziasi bolo ka wusulan suma duman jeni. A diminna sarakalasebaaw kɔrɔ, o tuma la kuna bɔra a ten na sarakalasebaaw bɛɛ ɲɛ kɔrɔ Matigi ka so kɔnɔ wusulan saraka bɔlan kɛrɛ fɛ.
[20] Sarakalasebaaw kuntigi Azaria ni sarakalasebaa tɔw bɛɛ y'a filɛ. U y'a ye ko kuna bɛ a ten na. U y'a labɔ kɛnɛma joona. A yɛrɛ tɛliyara ka bɔ, k'a masɔrɔ Matigi y'a gosi.
[21] Masakɛ Oziasi kɛra kunatɔ ye fo ka taa se a sa don ma. U y'a bila a dan na so dɔ kɔnɔ a ka kuna kosɔn, katuguni a tun tɛ se ka don Matigi ka so kɔnɔ tun. A denkɛ Jotam kɛra a ka so kuntigi ni masaya so kuntigi ye ka mɔgɔw ka kiri kow ɲɛnabɔ.
[22] Amoz denkɛ Esayi ye Oziasi ka ko tɔw, a daminɛw ni a labanw sɛbɛn.
[23] Oziasi sunɔgɔra a bɛnbaw fɛ. U y'a su don olu kɛrɛ fɛ masakɛw ka kaburudo la nka kunatɔ don, u ma a su don masakɛ ka kaburu la. A denkɛ sigira masaya la a nɔ na.