[1] Masakɛ Ezekiasi ye cidenw ci Israɛl bɔnsɔn ka jamana ni Juda bɔnsɔn ka jamana yɔrɔ bɛɛ la ka sɛbɛnw kɛ ka ci Efrayim bɔnsɔn ni Manase bɔnsɔn siyaw bɛɛ ma ka u bɛɛ wele ka na Matigi ka so kɔnɔ Jerusalɛm walisa ka Tɛmɛnkan seli kɛ Matigi, Israɛl bɔnsɔn ka Ala ye.
[2] Masakɛ n'a ka kuntigiw ani Jerusalɛmkaw bɛɛ y'a latigɛ ko u bɛ Tɛmɛnkan seli kɛ Jerusalɛm san kalo filanan la.
[3] U ma se k'a kɛ a waati la, katuguni sarakalasebaa minw tun ye u yɛrɛw saniya, olu tun man ca. Mɔgɔw tun maɲɔgɔn lajɛ Jerusalɛm fana.
[4] O ko diyara masakɛ ni jama bɛɛ ye.
[5] U y'a latigɛ ko welewele ka da Israɛl jamana yɔrɔ bɛɛ la k'a daminɛ Beɛr-Seba fo ka taa se Dan, ko olu bɛɛ ka na Tɛmɛnkan seli kɛ Matigi, Israɛl bɔnsɔn ka Ala ye Jerusalɛm. U tun ma o seli kɛ o cogo la ka kɛɲɛ ni a cogo sɛbɛnnen ye ka kɔrɔ.
[6] O cidenw taara ni masakɛ ka sɛbɛn ni a ka kuntigiw ka sɛbɛnw ye Israɛl jamana ni Juda jamana yɔrɔw bɛɛ la k'a fɔ u ye ka kɛɲɛ ni masakɛ ka ci ye ko: «Israɛl bɔnsɔn, a' ye kɔsegin Matigi, Ibrahima ni Isaka ani Israɛl ka Ala ma walisa ale yɛrɛ ka kɔsegin aw ma, ale min ye aw tila ka bɔ Asiri masakɛw bolo.
[7] Aw kan'a kɛ i ko aw faw ni aw balimaw y'a kɛ cogo min na, ka Matigi, u bɛnbaw ka Ala hakɛ ta, a ye u bila tɔɔrɔba la i ko aw y'a ye cogo min na.
[8] Ayiwa sisan aw kana aw tulo gɛlɛya i ko aw bɛnbaw. A' ye aw majigin Matigi ɲɛ. A' ye na a ka yɔrɔ saniyalen na ka baara kɛ a ye tuma bɛɛ. A ka dimiya na mabɔ aw la.
[9] Ni aw kɔseginna Matigi ma, mɔgɔ minw ye aw balimaw ni aw denkɛw minɛ ka taa jɔnya la, olu na hinɛ u la ka u bila ka u kɔsegin nin jamana kɔnɔ, k'a masɔrɔ makari bɛ Matigi aw ka Ala fɛ. A ka makari hinɛma don. Ni aw kɔseginna ale ma, a tɛna a kɔ sin aw ma tun.»
[10] Ayiwa o cidenw taara Efrayim bɔnsɔn ni Manase bɔnsɔn ka duguw bɛɛ la fo ka taa se Zabulɔn bɔnsɔn ka yɔrɔw la. Nka olu yɛlɛla u la ka u mafiɲɛya.
[11] O bɛɛ n'a ta Asɛr bɔnsɔn dɔw ni Manase bɔnsɔn dɔw ani Zabulɔn bɔnsɔn dɔw y'u yɛrɛw majigin ka taa Jerusalɛm.
[12] Ala bolo tora Juda bɔnsɔn fɛ ka u kɔnɔ kɛ kelen ye ka masakɛ ni a ka kuntigiw ka ci kɛ ka kɛɲɛ ni Matigi ka kuma fɔlen ye.
[13] Jamaba ye ɲɔgɔn lajɛ Jerusalɛm ka buuru fununbali seli kɛ san kalo filanan la. A kɛra jamaba dama dɔnbali ye.
[14] Saraka bɔlan minw tun bɛ Jerusalɛm, wusulan suma duman tun bɛ wusu saraka bɔlan minw kan, u ye olu bɛɛ bɔ yen ka taa u fili Sedrɔn kɔji la.
[15] O kɔ, u ye Tɛmɛnkan saraka faga san kalo filanan tile tan ni naaninan don. Sarakalasebaaw ni Levitew maloyara u saniyabaliya kosɔn. U ye u yɛrɛw saniya ka saraka jenita dɔw lase Matigi ka so kɔnɔ.
[16] Yɔrɔ minw tun bilara u ye ka kɛɲɛ ni Ala ka cɛ Musa ka sariya ye, u ye u jɔ o yɔrɔw la. Sarakalasebaaw ye joli min sɔrɔ Levitew bolo, u ye o seriseri.
[17] Jama la mɔgɔ caman tun ma u yɛrɛw saniya, o de kosɔn Levitew ye Tɛmɛnkan saraka fagataw faga mɔgɔ nɔgɔlenw bɛɛ kosɔn walisa ka u bila Matigi ye.
[18] O cogo la Efrayim bɔnsɔn ni Manase bɔnsɔn ni Isakar bɔnsɔn ani Zabulɔn bɔnsɔn caman tun ma saniya. Olu ye Tɛmɛnkan dumuni kɛ k'a sɔrɔ u ma saniya ka kɛɲɛ ni ko sɛbɛnnen ye. O de kosɔn Ezekiasi ye delili kɛ u ye ko: «Matigi, e ka ɲi.
[19] Ni mɔgɔ o mɔgɔ ye a dusukun to Matigi, a bɛnbaw ka Ala ɲinili la, hali k'a sɔrɔ a jɛlen tɛ ka kɛɲɛ ni yɔrɔ senuma jɛyali cogo ye, Matigi ɲuman ka o yafa u bɛɛ kelen-kelen ma.»
[20] Matigi ye Ezekiasi ka delili lamɛn ka yafali kɛ jama ma.
[21] Israɛl bɔnsɔn minw tun bɛ Jerusalɛm, olu fana ye buuru fununbali seli kɛ tile wolonwula kɔnɔ niɲagaliba ye. Levitew ni sarakalasebaaw tun bɛ dɔnkili da ka fɔlifɛnw fɔ ka Matigi tanu don o don ni kanba ye.
[22] Levite minw ye Matigi ka baara kɛ ni hakilitigiya ye, masakɛ Ezekiasi ye olu ja gɛlɛya. U ye seli dumuni kɛ tile wolonwula kɔnɔ ka nisɔndiya sarakaw faga ka Matigi, u bɛnbaw ka Ala tanu.
[23] Jama bɛɛ y'a latigɛ ko u ka tile wolonwula wɛrɛ fara Tɛmɛnkan seli kan. U ye tile wolonwula wɛrɛ kɛ niɲagali ye.
[24] Juda bɔnsɔn ka masakɛ Ezekiasi ye ntura waa kelen ni saga waa wolonwula di jama ma. Kuntigiw fana ye ntura waa kelen ni saga waa tan di jama ma. Sarakalasebaa caman ye u yɛrɛw saniya.
[25] Juda bɔnsɔn jama bɛɛ ani sarakalasebaaw ni Levitew ani Israɛl bɔnsɔn jama minw bɛɛ nana ka bɔ u ka jamana la ani siginfɛ minw bɛɛ nana ka bɔ Juda jamana la, olu bɛɛ ɲagalila kosɛbɛ.
[26] Ɲagaliba kɛra Jerusalɛm. Kabini Dawuda denkɛ Solomani, Israɛl ka masakɛ tilew la, o bɔɲɔgɔnko tun ma kɛ Jerusalɛm.
[27] O kɔ, sarakalasebaaw ni Levitew ye dubaw kɛ jama ye. U ka dubaw minɛna. U ka delili sera fo sankolo la Matigi sigi yɔrɔ senuma la.