[1] Asa denkɛ Josafat sigira masaya la a fa nɔ na.
[2] A y'a yɛrɛ barika bonya Israɛl bɔnsɔn kama. A ye kɛlɛbolow bila Juda bɔnsɔn ka dugu barikamaw bɛɛ kɔnɔ ka kɛlɛdenw sigi Juda jamana yɔrɔ bɛɛ la ani Efrayim dugubaw bɛɛ kɔnɔ, a fa Asa tun ye olu minw minɛ.
[3] Matigi tora Josafat fɛ, k'a masɔrɔ a taamana a bɛnba Dawuda ka sira taamalen fɔlɔw fɛ. A ma sɔn ka baara kɛ Baal boliw ye katuguni
[4] a tun bɛ a fa ka Ala ɲini ka o ka ci fɔlenw sira taama. A m'a kɛ i ko Israɛl bɔnsɔn y'a kɛ cogo min na.
[5] O de kosɔn Matigi ye masaya sabati a bolo. Juda bɔnsɔn bɛɛ tun bɛ bonya di Josafat ma. A kɛra fɛntigiba ye ka tɔgɔba sɔrɔ.
[6] A ye Matigi kan minɛ a dusukun na. A ye Juda bɔnsɔn ka batoli kɛ yɔrɔw ni boli bato yɔrɔw tiɲɛn.
[7] A ka masaya san sabanan la, a y'a ka kuntigiw ci ka taa Juda bɔnsɔn kalan u ka duguw kɔnɔ. O kuntigiw tun ye Ben-Hail ni Abdiasi ni Zakari ni Netaneɛl ani Mise ye.
[8] A ye Levite minw bila ka taa u fɛ, olu tun ye Semaɛja ni Netaniya ni Zebadia ni Asaɛl ni Semiramɔt ni Jonatan ni Adonija ni Tobija ani Tob-Adonija ye. Sarakalasebaaw Elisama ani Joram, olu fana taara Levitew fɛ.
[9] U ye Juda mɔgɔw kalan ni Matigi ka sariya kitabu kɔnɔ kumaw ye. O cogo la u ye Juda bɔnsɔn ka duguw bɛɛ yaala ka o mɔgɔw bɛɛ kalan.
[10] Matigi ɲɛsiran ye Juda bɔnsɔn lamini jamanaw bɛɛ minɛ. U ma sɔn ka Josafat kɛlɛ.
[11] Hali Filisitikaw tun bɛ taa bonya wari ni nisɔngɔ wari di masakɛ Josafat ma. Arabu jamana mɔgɔw fana taara ni sagajigi waa wolonwula ni kɛmɛ wolonwula ani bakɔrɔ waa wolonwula ni kɛmɛ wolonwula ye ka olu di Josafat ma.
[12] Ayiwa Josafat barika bonyara kosɛbɛ haali. A ye masaya sow jɔ Juda bɔnsɔn ka duguw kɔnɔ ka bolo fɛn mara sow fana jɔ.
[13] A ye baaraba kɛ Juda bɔnsɔn ka duguw kɔnɔ. Kɛlɛkɛ cɛ farinw fana tun b'a fɛ Jerusalɛm.
[14] U dama filɛ ninw ye ka kɛɲɛ ni u bɛnbaw bɔnsɔn ye. Juda bɔnsɔn kuntigi tun ye Adina ye. Kɛlɛkɛ cɛ farinw waa kɛmɛ saba tun bɛ ale bolo.
[15] Ale kɛrɛ fɛ, Jokanan tun ye cɛ waa kɛmɛ fila ni bisegin kuntigi ye.
[16] Zikiri denkɛ Amasia tun bɛ o kɛrɛ fɛ, o tun y'a yɛrɛ di Matigi ma ni diyaɲe ye. Kɛlɛkɛ cɛ farin waa kɛmɛ fila tun bɛ ale bolo.
[17] Benjamɛn bɔnsɔn na, Eliada tun ye kɛlɛkɛ cɛ ja gɛlɛn ye. Kɛlɛkɛ cɛ bonnikɛ kalatigi ni nɛgɛ bɛnnan tigi cɛ waa kɛmɛ fila tun bɛ ale bolo.
[18] Jozabad ni a ka kɛlɛkɛ cɛ waa kɛmɛ ni bisegin tun bɛ ale kɛrɛ fɛ.
[19] Olu tun ye masakɛ ka baarakɛlaw ye. Masakɛ ye mɔgɔ minw bila dugu barikamaw kɔnɔ Juda jamana yɔrɔ bɛɛ la, olu sen tun tɛ o la.