[1] Solomani tun ye baara min ko fɔ Matigi ka so kosɔn, o bɛɛ banna. O kɔ, Solomani fa Dawuda tun ye fɛn senuma minw bila Ala ye, warijɛw ni sanu ani a minanw bɛɛ, a taara ni olu ye ka olu bila Ala ka so kɔnɔ a nafolo mara yɔrɔw la.
[2] O tuma la Solomani ye Israɛl bɔnsɔn cɛkɔrɔbaw ni siyaw kuntigiw bɛɛ ani Israɛl bɔnsɔn na gwatigiw bɛɛ lajɛ yɔrɔ kelen na Jerusalɛm walisa ka taa Matigi ka layidu wagande ta ka bɔ Dawuda ka dugu kɔnɔ Sion.
[3] Israɛl bɔnsɔn na cɛw bɛɛ ye ɲɔgɔn lajɛ masakɛ ka yɔrɔ la ka seli kɛ. O kɛra san kalo wolonwulanan la.
[4] Israɛl bɔnsɔn cɛkɔrɔbaw bɛɛ selen yen, Levitew ye layidu wagande ta ka taa ni o ni finiso ni a kɔnɔ minan senumaw bɛɛ ye. Sarakalasebaaw ni Levitew taara ni u ye.
[6] Masakɛ Solomani ani a fɛ mɔgɔw, Israɛl bɔnsɔn bɛɛ y'u jɔ layidu wagandeɲɛ fɛ ka saraka sagaw ni misiw caman dama dɔnbali lase.
[7] Sarakalasebaaw taara ni Matigi ka layidu wagande ye a ka yɔrɔ la Alabatosoba yɔrɔ senuma kɔnɔ k'a sigi yɔrɔ senuma senuma kɔnɔ serubɛnw kamanfuraw jukɔrɔ.
[8] Serubɛnw kamanw sɛɛnɛlen tun don wagande san fɛ, u kaman tun kɛra ka wagande ni a ta berew da tugu.
[9] Wagande ta berew tun ka jan fo u tun bɛ se ka ye ka i to yɔrɔ senuma kɔnɔ, nka mɔgɔ tun tɛ se ka u ye ka i to kɛnɛma. Layidu wagande tora yen fo ka na se bi ma.
[10] Nka fɛn wɛrɛ tun tɛ layidu wagande kɔnɔ fɔ Musa ye kabakurun walaha fila minw bila a kɔnɔ Hɔrɛb kulu kɔrɔ, Matigi ye layidu ta Israɛl bɔnsɔn ye tuma min na u bɔ tuma la Misira jamana la.
[11] Ayiwa sarakalasebaaw bɔra yɔrɔ senuma kɔnɔ, k'a masɔrɔ o sarakalasebaa minw bɛɛ tun bɛ yen, olu bɛɛ saniyalen tun don, hali ni a ma kɛ ka kɛɲɛ ni u ka kulu ye.
[12] Levite dɔnkili dalaw bɛɛ, Asaf ni Heman ani Jedutun ni u denkɛw ani u balimakɛw, olu jɔlen tun bɛ saraka bɔlan ni kɔrɔn cɛ. Lenfu dulɔkiw tun bɛ u bɛɛ kan na. Nsiranɛgɛ tɛgɛrɛw ni npɔlɔnw ni nkɔniw tun bɛ u bolo. Sarakalasebaa kɛmɛ ni mugan tun bɛ u cɛma ka buru fyɛ.
[13] Buru fyɛlaw ani dɔnkili dalaw bɛɛ jɛra ka u kan bɔɲɔgɔn fɛ ka batoli kɛ ka Matigi tanu. U ye buru fyɛ ka nsiranɛgɛ tɛgɛrɛw fɔ ka bɛn ni fɔlifɛn wɛrɛw ye ka Matigi bato k'a fɔ ko: «Ɔwɔ, a ka ɲi, ɔwɔ, a ka ɲumaya tɛ ban.» O tuma la sankaba ye so kɔnɔ fa, Matigi bato so kɔni.
[14] Sarakalasebaaw ma se ka to yen ka u ka baara kɛ o sankaba kosɔn, k'a masɔrɔ Matigi nɔɔrɔ ye Ala ka so fa.