[1] Masakɛ Josiasi ye Tɛmɛnkan seli kɛ Matigi ye Jerusalɛm. U ye Tɛmɛnkan sagaden fiɲɛntanw faga san kalo fɔlɔ tile tan ni naaninan don.
[2] A ye sarakalasebaaw sigi u ka baara la ka u jija ka Matigi ka so kɔnɔ baara kɛ.
[3] Levite minw tun bɛ Israɛl bɔnsɔn kalan ni u bilalen bɛ Matigi ye, a y'a fɔ olu ye ko: «Israɛl bɔnsɔn ka masakɛ Dawuda denkɛ Solomani ye so min jɔ, aw ka wagande senuma sigi o kɔnɔ. Aw kana o wagande ta aw kamankun kan tun. Aw ka baara kɛ Matigi, aw ka Ala ni a ka mɔgɔ Israɛl bɔnsɔn ye.
[4] A' ye aw labɛn ka kɛɲɛ ni aw faw ka gwaw ni aw kuluw ye, i ko Israɛl bɔnsɔn ka masakɛ Dawuda ani a denkɛ Solomani y'a sɛbɛn cogo min na.
[5] Aw ka aw jɔ yɔrɔ senuma la ka kɛɲɛ ni aw balimaw mɔgɔ gwansan bɛnbaw bɔnsɔn kulu-kulu ye ani ka kɛɲɛ ni Levitew bɛnbaw bɔnsɔn kulu-kulu ye.
[6] Aw ka sagaden fiɲɛntanw faga aw saniyalen kɔ ka u labɛn aw balimaw ye ka kɛɲɛ ni Matigi ka kuma fɔlen ye Musa fɛ.»
[7] Josiasi ye saga ni ba waa bisaba ni ntura waa saba di Israɛl mɔgɔ tɔw ma walisa u ka Tɛmɛnkan seli kɛ. O bɔra masakɛ yɛrɛ ka fɛnw na.
[8] A ka kuntigiw fana ye nili fɛn dɔw di mɔgɔw ni sarakalasebaaw ni Levitew ma. Hilkija ni Zakari ani Jehiɛl, olu tun ye Ala ka so kɔnɔ baara kuntigiw ye. Olu ye saga waa fila ni kɛmɛ wɔɔrɔ ani ntura kɛmɛ saba di sarakalasebaaw ma ka kɛ Tɛmɛnkan sarakaw ye.
[9] Konania ni Semaɛja ni Netaneɛl ni olu balimaw Hasabia ni Jeiɛl ani Jozabad tun ye Levitew kuntigiw ye. Olu ye bagan misɛn waa duuru ni misi kɛmɛ duuru di Levitew ma ka kɛ Tɛmɛnkan sarakaw ye.
[10] Baara kɛ cogo labɛnna, sarakalasebaaw taara u ka yɔrɔw la. Levitew fana y'u labɛn ka kɛɲɛ ni u kuluw ye i ko masakɛ y'a fɔ cogo min na.
[11] O kɔ, u ye Tɛmɛnkan sarakaw faga. Sarakalasebaaw ye o joli minɛ Levitew bolo ka o seriseri. Levitew ye o bagan fagalenw boso.
[12] U ye saraka jenitaw bila u dan na ka olu tilatila jamala mɔgɔw cɛ ka kɛɲɛ ni u ka gwaw ye walisa olu ka lase Matigi ma i ko a sɛbɛnnen bɛ Musa ka sariya kitabu kɔnɔ cogo min na. U ye misiw kɛ ten fana.
[13] U ye Tɛmɛnkan sarakaw wusu tasuma la ka kɛɲɛ ni ci dilen ye, ka fɛn senumaw tobi dagaw ni nɛgɛ dagaw ani jiranni kɛ faaw kɔnɔ. O kɔ, u y'u tɛliya ka u bɔ ka o tilatila mɔgɔw bɛɛ cɛ.
[14] O kɔ, u ye u yɛrɛ ka Tɛmɛnkan dumuni labɛn, u ni sarakalasebaaw ye, k'a masɔrɔ sarakalasebaaw, Aron denkɛw bolo degunnen tun don saraka jenitaw ni u kɛnw laseli fɛ fo ka taa su ko. O de kosɔn Levitew ye Tɛmɛnkan dumuni labɛn u yɛrɛw ni sarakalasebaaw ye.
[15] Asaf bɔnsɔn dɔnkili dalaw tora u ka yɔrɔw la ka kɛɲɛ ni Dawuda ni Asaf ni Heman ani masakɛ ka yelikɛla Jedutun ka kuma fɔlenw ye. Dakɔlɔsibaaw jɔlen tun bɛ daw la. Olu si ma bɔ u ka yɔrɔw la katuguni u balimaw Levitew ye u ka Tɛmɛnkan seli dumuni dila u ye.
[16] Ayiwa Matigi ka baara kow bɛɛ ɲɛnabɔra o don na ka Tɛmɛnkan seli kɛ ka saraka jenitaw lase Matigi ka saraka bɔlan kan ka kɛɲɛ ni masakɛ Josiasi ka kuma fɔlen ye.
[17] Israɛl bɔnsɔn minw tun bɛ yen, olu ye o Tɛmɛnkan seli ni buuru fununbali seli kɛ tile wolonwula kɔnɔ o waati la.
[18] Kabini kira Samuɛl tilew la, Israɛl bɔnsɔn tun ma seli kɛ min bɛ o seli bɔ. Israɛl bɔnsɔn ka masakɛ si ma Tɛmɛnkan seli si kɛ min bɔlen bɛ Josiasi ni a dɛmɛbaa sarakalasebaaw ni Levitew ta fɛ, olu minw tun bɛ Jerusalɛm.
[19] O Tɛmɛnkan seli kɛra Josiasi ka masaya san tan ni seginnan la.
[20] O ko tɛmɛnnenw kɔ, Josiasi ye Alabatosoba tiɲɛn yɔrɔw dila tuma min na, Misira masakɛ Neko taara Karkemis, Ufrate ba da la ka kɛlɛ kɛ. Josiasi bɔra ka taa a kɛlɛ.
[21] Neko ye cidenw bila ka taa a fɔ Josiasi ye ko: «Mun bɛ ne ni i cɛ, Juda bɔnsɔn ka masakɛ? Ne ma wuli ka na i kama bi. Ne nana ne kɛlɛɲɔgɔn ka so de kama. Ala y'a fɔ ne ye ko ne ka ne tɛliya. Ala bɛ ne fɛ, i kana i sen don Ala ka ko la walisa a kana na i faga.»
[22] Nka Josiasi ma sɔn ka kɔsegin. A y'a cogo yɛlɛma k'i madon ka Neko kɛlɛ. Neko ye Ala ka laadilikan min fɔ a ye, a ma sɔn ka o lamɛn. A taara kɛlɛ daminɛ Megido jɛkɛnɛ la.
[23] Bonnikɛ kalatigiw ye masakɛ Josiasi bon. Masakɛ y'a fɔ a ka jɔnw ye ko: «Aw ka ne ta ka bɔ yan, katuguni ne joginna kosɛbɛ.»
[24] A ka baaradenw y'a ta ka bɔ o wotoro kɔnɔ ka a bila a ka wotoro filanan kɔnɔ ka taa n'a ye Jerusalɛm. A sara, a su donna a bɛnbaw ka kaburu kɔnɔ. Juda ni Jerusalɛmkaw bɛɛ ye Josiasi su kasi.
[25] Kira Jeremi ye su kasi dɔnkili da Josiasi saya kosɔn. Dɔnkili dala cɛmaw ni musomaw bɛɛ bɛ o dɔnkili da fo ka na se bi ma, katuguni o kɛra laada ye Israɛl bɔnsɔn cɛma. O su kasi dɔnkili sɛbɛnna maɲumatɔkan kitabu kɔnɔ.
[26] Josiasi ka ko tɔw ani a ye ko ɲuman min kɛ ka kɛɲɛ ni Matigi ka sariya ko sɛbɛnnenw ye,
[27] a ka kɛwalew, daminɛw ni u labanw, olu bɛɛ sɛbɛnnen bɛ Israɛl bɔnsɔn ni Juda bɔnsɔn ka masakɛw ka kitabu kɔnɔ.