[1] Masakɛ Solomani tilalen kɔ a ka delili la, tasuma jiginna ka bɔ sankolo la ka saraka jenitaw ni sarakaw jeni. O tuma la Matigi nɔɔrɔ ye so fa.
[2] Sarakalasebaaw ma se ka don Matigi ka so kɔnɔ k'a masɔrɔ Matigi nɔɔrɔ ye so fa.
[3] Israɛl bɔnsɔn bɛɛ ye tasuma ni Matigi nɔɔrɔ jigintɔ ye Alabatosoba kɔnɔ minkɛ, u y'u biri ka u ɲɛ biri duguma ka batoli kɛ Alabatosoba dukɛnɛ la ka Matigi tanu k'a fɔ ko: «Ɔwɔ, a ka ɲi, ɔwɔ, a ka ɲumaya tɛ ban abada.»
[4] Ayiwa masakɛ ni mɔgɔw bɛɛ ye saraka lase Matigi ɲɛ kɔrɔ.
[5] Masakɛ Solomani ye saraka ntura waa mugan ni fila ani saga waa kɛmɛ ni mugan lase. Masakɛ ni mɔgɔw bɛɛ ye Ala ka so seli kɛ.
[6] Sarakalasebaaw tora u ka baara la. Levitew tun bɛ fɔlifɛn senumaw fɔ. Masakɛ Dawuda tun ye o fɔlifɛnw dila Matigi tanuli kama Levitew bila tuma la Matigi tanuli dɔnkili dali la. U tun b'a fɔ ko: «Ɔwɔ, a ka ɲumaya tɛ ban abada.» Sarakalasebaaw tun bɛ buru fyɛ u ɲɛ kɔrɔ. Israɛl bɔnsɔn bɛɛ jɔlen tun bɛ yen.
[7] Dukɛnɛ min bɛ Matigi ka soɲɛ fɛ, Solomani ye o bila Ala ye. A ye saraka jenitaw ni nisɔndiya sarakaw kɛn jeni yen, k'a masɔrɔ Solomani tun ye nsiranɛgɛ saraka bɔlan min dila, o tun ka dɔgɔ o sarakaw la, saraka jenitaw ni mugu sarakaw ani kɛn ma kun o kan.
[8] O waati la masakɛ Solomani ani Israɛl bɔnsɔn bɛɛ ye tile wolonwula kɛ o seli la. K'a daminɛ Hamat mara la ka taa se fo Misira kɔji da la, jama bɔra o yɔrɔw bɛɛ la ka na.
[9] A tile seginnan don, u ye jamalajɛ senuma kɛ, k'a masɔrɔ u tun bɛ Matigi ka saraka bɔlan dili seli la tile wolonwula kɔnɔ, u ye tile wolonwula wɛrɛ kɛ seli la.
[10] San kalo wolonwulanan tile mugan ni sabanan don, Solomani ye mɔgɔw labila ka taa u ka finisow kɔnɔ. U nisɔndiyalen ni u dusuɲagalilen taara k'a masɔrɔ Matigi ye ko ɲuman kɛ Dawuda ni Solomani ani a ka mɔgɔw Israɛl bɔnsɔn ye.
[11] Ayiwa masakɛ Solomani tilara Matigi ka so jɔli ani a ka masaya so jɔli la, a tun ye ko minw latigɛ Matigi ka so ni a yɛrɛ ka so ko la, a ye o bɛɛ kɛ k'a dafa.
[12] O tuma la Matigi y'i jira Solomani la a siɲɛ filanan la su fɛ k'a fɔ a ye ko: «Ne sɔnna i ka delili ma ka nin yɔrɔɲɛnatɔmɔ ne yɛrɛ ye k'a kɛ ne ka saraka jenitaw lase so ye.
[13] Ni ne ye sankolo datugu fo sanji tɛ na, ni ne ye ntɔnw ci ka taa tiɲɛnni kɛ jamana kɔnɔ, ni ne ye fiɲɛbana ci ne ka mɔgɔw cɛma,
[14] ne ka mɔgɔ minw bɛ wele ne tɔgɔ la, ni olu ye u yɛrɛw majigin ka ne tɔgɔ wele ka ne deli ka ne ɲini ka u ka sira juguw bila, ne na u ka deliliw lamɛn ka ne to sankolo la ka u ka jurumuw yafa u ma ka u ka jamana kɛnɛya.
[15] Neɲɛ jɔlen na to u la, ne tulo majɔlen na to ka u ka deliliw lamɛn nin yɔrɔ la.
[16] K'a daminɛ bi la, ne ye nin soɲɛnatɔmɔ k'a saniya walisa ne tɔgɔ ka to yan badaa. Neɲɛ ni ne dusukun na to yan tuma bɛɛ.
[17] E yɛrɛ ta fan fɛ, ni i taamana ne ɲɛ kɔrɔ i ko i fa Dawuda y'a kɛ cogo min na, ne bɛ ci fɔlen minw di i ma, ni i ye olu mara ka ne ka ci fɔlen ani ne ka ko latigɛlenw mara,
[18] o tuma la ne na i ka masasigilan ani i ka masaya sabati i ko ne y'a fɔ i fa Dawuda ye cogo min na ko, a bɔnsɔn tɛna ban Israɛl bɔnsɔn ka masasigilan kan.
[19] Nka ni e ni i ka mɔgɔw jɛngɛna ka ne ka ko latigɛlenw ni ne ka ci fɔlenw bila, ne ye olu minw di i ma, ni aw taara baara kɛ bato fɛn wɛrɛw ye ka aw biri u kɔrɔ,
[20] ne ye ne ka jamana min di aw ma, ne na aw dili sama ka bɔ o la. Nin so min dira ne ma ka ne tɔgɔ da o kan, ne na o fili ka mabɔ ne la, ne na a kɛ ntalen da fɛn ni yɛlɛbɔ fɛn ye mɔgɔw bɛɛ ɲɛ na.
[21] «Nin yɔrɔ senuma min jɔlen filɛ nin ye, mɔgɔ minw bɛ tɛmɛn ka o filɛ, olu bɛɛ na kabakoya k'a fɔ ko: ‹Mun kosɔn Matigi ye nin jamana ani nin so kɛ ten?›
[22] Mɔgɔw na u jaabi ko: ‹K'a masɔrɔ Israɛl bɔnsɔn ye Matigi, u bɛnbaw ka Ala bila, o min ye u labɔ Misira jamana la. U tugura bato fɛn wɛrɛw nɔ fɛ ka u biri olu kɔrɔ ka baara kɛ u ye, o de kosɔn Ala ye nin bɔnɛ bɛɛ lase u ma.›»