[1] Akaz sigira masaya la a si san mugannan la. A ye san tan ni wɔɔrɔ kɛ masaya la Jerusalɛm. A ma ko ɲuman kɛ Matigi ɲɛ kɔrɔ i ko a bɛnba Dawuda y'a kɛ cogo min na.
[2] A taamana Israɛl bɔnsɔn ka masakɛw ka siraw fɛ fo ka Baal boli jaw dila.
[3] A ye suma diyalanw jeni Hinom denkɛw ka kulu furancɛ la k'a denkɛw jeni. Matigi tun ye siya wɛrɛw gɛn ka bɔ Israɛl bɔnsɔnɲɛ u ka ko haramulen minw kosɔn, a ye olu ɲɔgɔn kɛ.
[4] A ye saraka jenitaw ni wusulan suma duman sarakaw fana lase batoli kɛ yɔrɔw la, tintinw kan ani jirisunbaw kɔrɔ.
[5] Matigi a ka Ala y'a don Siri masakɛ bolo. Sirikaw ye a gosi ka a ka mɔgɔ caman cɛ ka taa n'u ye jɔnya la Damasi. Akaz donna Israɛl bɔnsɔn ka masakɛ Pekak fana bolo, o y'a tiɲɛn kosɛbɛ.
[6] O cogo la Remalia denkɛ Pekak ye Juda bɔnsɔn kɛlɛkɛ cɛ farin waa kɛmɛ ni mugan faga don kelen na, k'a masɔrɔ u ye Matigi, u bɛnbaw ka Ala bila.
[7] Kɛlɛkɛ cɛ Zikiri min bɔra Efrayim, o ye masakɛ denkɛ Maseja ni masaya so kuntigi Azrikam ani masakɛ dankan Elkana faga.
[8] Israɛl bɔnsɔn taara ni u balima minɛlen mɔgɔ waa kɛmɛ fila ye, musow ni denkɛw ni denmusow, ka fɛn caman cɛ ka taa ni olu ye Samari.
[9] Matigi ka kira dɔ tun bɛ yen, o tɔgɔ ko Odɛd. O bɔra ka kɛlɛbolo kunbɛn u natɔ Samari, k'a fɔ u ye ko: «Matigi, aw bɛnbaw ka Ala diminna Juda bɔnsɔn kɔrɔ k'a don aw bolo. Aw diminnen ye u faga kosɛbɛ fo o kan sera sankolo la.
[10] Ayiwa sisan aw bɛ taa ni o Juda bɔnsɔn ni Jerusalɛmkaw, cɛw ni musow ye, ka olu kɛ jɔnkɛw ni jɔnmusow ye. Nka aw yɛrɛw jalakilen tɛ Matigi aw ka Ala ɲɛ kɔrɔ wa?
[11] Ayiwa a' ye ne lamɛn sa. Aw ye aw balima minw minɛ ka kɛ jɔnw ye, aw ka olu bila ka taa k'a masɔrɔ Matigi diminna aw kɔrɔ kosɛbɛ.»
[12] Ayiwa kɛlɛbolo minw ye Juda bɔnsɔn minɛ, Efrayim bɔnsɔn kuntigi dɔw, Jokanan denkɛ Azaria ni Mesilemot denkɛ Berekia ni Salum denkɛ Ezekiasi ani Hadilai denkɛ Amasa wulila olu kama.
[13] U ko: «Aw kana don ni o mɔgɔ cɛlenw ye yan, k'a masɔrɔ aw b'a fɛ ka jalaki lase an ma Matigi ɲɛ kɔrɔ, ka dɔ fara an ka jurumu ni an ka fililiw kan k'a sɔrɔ an jalakilen don ka ban. Ala diminna Israɛl bɔnsɔn kɔrɔ ka ban.»
[14] O tuma la kɛlɛkɛ cɛw ye mɔgɔ minɛlenw ni fɛn cɛlenw bila kuntigiw ni jama bɛɛ ɲɛ kɔrɔ yen.
[15] O cɛ minw tɔgɔw fɔra, olu wulila ka mɔgɔ cɛlenw magoɲɛ ka u la fɛɛrɛtɔw fɛɛrɛbɔ ni nafolo cɛlen ye, ka finiw don u kan na ka sabara don u senw na ka dumuni fɛn ni minni fɛn di u ma ka u mun ni tulu ye. U ye mɔgɔ barikantanw layɛlɛn faliw kan ka taa ni u bɛɛ ye Jeriko, ntamaro sunw dugu la, u balimaw yɔrɔ la. O kɛlen kɔ, u kɔseginna Samari.
[16] O waati la, masakɛ Akaz ye ci bila ka taa Asiri masakɛw sɛgɛrɛ ko u ka a dɛmɛ,
[17] katuguni Edɔmkaw tun nana ko kura ka Juda bɔnsɔn kɛlɛ ka u kɛ jɔnw ye.
[18] Filisitikaw fana tun taara Juda bɔnsɔn ka jɛkɛnɛ la duguw minɛ. O duguw tun ye Bɛt-Semɛs ni Ajalɔn ni Gederot ni Soko ani a lamini duguw ani Timna ni a lamini duguw ani Gimzo ni a lamini duguw ye. U y'u sigi o yɔrɔw la.
[19] Matigi ye Juda bɔnsɔn majigin Israɛl bɔnsɔn ka masakɛ Akaz kosɔn katuguni a ye Juda bila jurumu la ka Matigi mafiɲɛya.
[20] Asiri masakɛ Tilgat-Pilnesɛr taara masakɛ Akaz minɛ, a ma a dɛmɛ.
[21] Akaz ye Matigi ka so ni masaya so kɔnɔ fɛnɲuman dɔw ta ka di Asiri masakɛ ma, nka o ma foyiɲɛ.
[22] Ka masakɛ Akaz to o tɔɔrɔba la, a ye Matigi hakɛ ta ka tɛmɛn fɔlɔ ta kan.
[23] A ye sarakaw faga Damasi bato fɛnw ye, olu y'a gosi. A y'a fɔ ko: «Sirikaw ka masakɛw ka bato fɛnw nana u dɛmɛ, o kosɔn ne na saraka faga olu ye walisa olu ka na ne dɛmɛ.» Nka o tun ye a yɛrɛ ni Israɛl bɔnsɔn bi kun ye.
[24] Masakɛ Akaz ye Ala ka so kɔnɔ dagaw bɛɛ lajɛ ka olu bɛɛ karikari ka Matigi ka so daw tugu ka saraka bɔlanw jɔ Jerusalɛm selekew bɛɛ la,
[25] ani batoli kɛ yɔrɔw Juda bɔnsɔn ka duguw bɛɛ la walisa ka wusulan suma duman wusu bato fɛn wɛrɛw ye. A y'a bɛnbaw ka Ala dusu dimin.
[26] Akaz ka kɛwale tɔw ni a ka baara kɛlenw, u daminɛw ni u labanw bɛɛ sɛbɛnnen bɛ Juda bɔnsɔn ni Israɛl bɔnsɔn ka masakɛw ka kitabu kɔnɔ.
[27] O kɔ, Akaz sunɔgɔra a bɛnbaw fɛ. U y'a su don Jerusalɛm dugu kɔnɔ, nka u ma a su don Israɛl bɔnsɔn ka masakɛw ka kaburu kɔnɔ. A denkɛ Ezekiasi sigira masaya la a nɔ na.