[1] Roboam taara Sisɛm, Israɛl bɔnsɔn bɛɛ lajɛlen tun bɛ yen ko u b'a sigi ka kɛ masakɛ ye.
[2] Nebat denkɛ Jeroboam ye o kibaru mɛn k'a to Misira. A tun bolila masakɛ Solomaniɲɛ ka taa yen. A kɔseginna ka bɔ Misira. U ye ci bila k'a wele.
[3] O tuma la Jeroboam ni Israɛl bɔnsɔn bɛɛ taara Roboam sɛgɛrɛ k'a fɔ a ye ko:
[4] «I fa ye doni girin minw da an kun, i ka an ka doni fiɲɛya sisan ka i fa ka doni girinman bɔ an kun. An na baara kɛ i ye.»
[5] Roboam y'u jaabi ko: «Aw ka segin ka na ne fɛ yan tile saba tɛmɛnnen kɔ.» Mɔgɔw bɛɛ taara.
[6] Cɛkɔrɔba minw tun bɛ baara kɛ Roboam fa Solomani ye a si tilew bɛɛ la, Roboam ye olu ɲininka ko: «Aw ɲɛ na, ne ka jaabili jumɛn di nin mɔgɔw ma?»
[7] Olu y'a jaabi ko: «Ni i kɛra mɔgɔɲuman ye o mɔgɔw ye ka ko ɲuman kɛ u ye, ni i ye kumaɲuman fɔ u ye, u na kɛ i ka baaradenw ye tuma bɛɛ.»
[8] Nka Roboam ma sɔn o cɛkɔrɔbaw ka laadili ma. A ni a filaɲɔgɔn kamalen minw mɔnaɲɔgɔn fɛ ni u tun bɛ a ka baara la,
[9] a ye olu ɲininka ko: «Aw ɲɛ na, ne ka nin mɔgɔw jaabi cogo di? U sago filɛ nin ye ko: ‹I fa ye doni girin min da an kun, i ka o jigin ka bɔ an kun.›»
[10] A filaɲɔgɔn kamalen minw tun bɛ a ka baara kɛ a fɛ yen, olu y'a fɔ a ye ko: «O mɔgɔ minw ye o kuma fɔ i ye ko: ‹I fa ye doni girin minw da an kun, ko i ka o fiɲɛya,› i k'a fɔ olu ye ko: ‹Ne bolonkɔni sinnaban ka bon ni ne fa solo ye.
[11] Ni ne fa ye doni girin da aw kun, ne na dɔ da aw kun min ka girin o ye. Ne fa ye aw gosi ni gwɛɲɛw ye, nka ne na aw gosi ni bunteniw ye.›»
[12] Tile saba tɛmɛnnen kɔ, Jeroboam ye mɔgɔw bɛɛ ɲɛ minɛ ka taa masakɛ Roboam sɛgɛrɛ ka kɛɲɛ ni a ka kuma fɔlen ye ko: «Aw ka kɔsegin ka na ne fɛ yan tile saba tɛmɛnnen kɔ.»
[13] Nka masakɛ ye mɔgɔw jaabi ni kuma gɛlɛnw ye. A ye cɛkɔrɔbaw ka laadili to yen,
[14] ka kamalenw ka kuma fɔ mɔgɔw ye ko: «Ne fa ye doni girin minw da aw kun, ne na aw ka doni giriya ka tɛmɛn o kan kosɛbɛ. Ne fa ye aw gosi ni gwɛɲɛw ye, ne na aw gosi ni bunteniw ye.»
[15] O cogo la masakɛ ma mɔgɔw lamɛn, k'a masɔrɔ o kow tun ye Ala nɔ ye walisa Matigi ka a ka kuma dafa, a tun ye o min fɔ Nebat denkɛ Jeroboam ye Silo Akija da la.
[16] Ayiwa Israɛl bɔnsɔn bɛɛ y'a ye ko masakɛ ma u lamɛn tuma min na, u y'a jaabi ko: «Dawuda ka wajibi ko jumɛn bɛ an kan? Niyɔrɔ si tɛ an fɛ Isayi denkɛ la, Israɛl bɔnsɔn bɛɛ ka taa u ka sow kɔnɔ. Dawuda, i ka i yɛrɛ ka so kow ɲɛnabɔ sisan.» O cogo la Israɛl bɔnsɔn bɛɛ taara so.
[17] Israɛl bɔnsɔn minw sigilen tun bɛ Juda bɔnsɔn ka duguw kɔnɔ, Roboam ye olu mara.
[18] O tuma la Hadoram min tun bɛ diyagoya baarakɛlaw kun na, masakɛ Roboam ye o ci ka taa nisɔngɔ minɛ, nka Israɛl bɔnsɔn y'a bon ni kabakurunw ye k'a faga. O tuma la Roboam y'i tɛliya ka don a ka wotoro kɔnɔ ka boli ka taa Jerusalɛm.
[19] Ayiwa Israɛl bɔnsɔn murutira Dawuda ka so ma fo ka na se bi ma.