[1] O kɔ, Josafat sunɔgɔra a bɛnbaw fɛ. A su donna olu kɛrɛ fɛ Dawuda ka dugu kɔnɔ. A denkɛ Joram sigira masaya la a nɔ na.
[2] Josafat denkɛw, Joram balimakɛw tun ye Azaria ni Jehiɛl ni Zakari ni Azaria ni Mikaɛl ani Sefatia ye. Olu bɛɛ tun ye Israɛl bɔnsɔn ka masakɛ Josafat denkɛw ye.
[3] U fa ye nili fɛn caman di u ma, warijɛ ni sanu ni kabakurun sɔngɔ gɛlɛnw, ka Juda bɔnsɔn ka dugu barikamaw fana di u ma. Nka a ye masaya di Joram ma k'a masɔrɔ o tun ye den fɔlɔ ye.
[4] Joram sigira masaya la a fa nɔ na tuma min na k'a yɛrɛ barika bonya, a y'a yɛrɛ balimaw bɛɛ ni Israɛl bɔnsɔn kuntigi dɔw faga.
[5] Joram si tun ye san bisaba ni fila ye a sigi tuma la masaya la. A ye san segin kɛ masaya la Jerusalɛm.
[6] A ye Israɛl bɔnsɔn ka masakɛw ka sira taama i ko Akab ka so y'a kɛ cogo min na, katuguni Akab denmuso tun ye ale muso ye. A ye ko jugu kɛ Matigi ɲɛ kɔrɔ.
[7] O bɛɛ n'a ta Matigi tun t'a fɛ ka Dawuda ka so bɛɛ halaki a ka layidu talen kosɔn Dawuda ye, ko a na a ka kuma fɔlen kɛ Dawuda ye ka a ka fitinɛ manalen to tuma bɛɛ Dawuda ni a bɔnsɔn bɛɛ ye.
[8] Masakɛ Joram ka waati la, Edɔmkaw murutira Juda bɔnsɔn ma ka masakɛ sigi u kun na.
[9] Joram ni a ka kuntigiw ni a ka wotorow bɛɛ taara. Su tilancɛ selen, Edɔmka minw tun ye a lamini, a ni a ka kuntigiw ni a ka sotigiw wulila olu kama ka u gosi.
[10] Nka Edɔmkaw murutira Juda bɔnsɔn ma fo ka na se bi ma. O waati kelen na, Libina fana murutira Juda bɔnsɔn ma k'a masɔrɔ Joram tun ye Matigi, a bɛnbaw ka Ala bila.
[11] Joram ye batoli kɛ yɔrɔw fana jɔ Juda jamana kuluw kan. A ye Jerusalɛmkaw ɲɔni ka u bila boli batoli la ka Juda bɔnsɔn lafili.
[12] O tuma la kira Eli ye sɛbɛn ci a ma k'a fɔ a ye ko: «Matigi, i bɛnba Dawuda ka Ala ko: ‹I ma i fa Josafat ni Juda bɔnsɔn ka masakɛ Asa ka siraw taama,
[13] nka i taamana Israɛl bɔnsɔn ka masakɛw ka siraw fɛ sabu i ye Juda bɔnsɔn ni Jerusalɛmkaw bila boli batoli la i ko Akab ka so y'a kɛ cogo min na. I ye i balimaw, i fa ka du kɔnɔ mɔgɔw faga, olu minw tun ka fisa ni i yɛrɛ ye.
[14] O de kosɔn Matigi na i ka mɔgɔw ni i denkɛw ni i musow ani i ka fɛnw bɛɛ gosi ni joli juguw ye.
[15] E yɛrɛ kɔni, kɔnɔna bana juguba na i minɛ. O dimi na juguya don o don fo i kɔnɔ nugu na bɔ o bana jugu fɛ.›»
[16] Ka fara o bɛɛ kan, Filisitikaw ni Arabu jamana mɔgɔ minw sigilen tun bɛ Etiopi jamana kɛrɛ fɛ, Matigi ye olu lawuli Juda bɔnsɔn kama k'a kɛlɛ.
[17] Olu ye masaya so kɔnɔ nafolow bɛɛ cɛ ka taa ni masakɛ denkɛw ni a musow ye ka olu kɛ jɔnw ye. A denkɛ si ma to yen a denkɛ sinnaban Joakaz kɔ.
[18] O bɛɛ tɛmɛnnen kɔ, Matigi ye masakɛ gosi ni bana jugu ye.
[19] O tun bɛ juguya don o don. San fila tɛmɛnnen kɔ, a nugu bɔra. A tɔɔrɔlenba sara. A ka mɔgɔw si ma wusulan suma duman wusu a ye i ko u y'a kɛ a bɛnbaw ye cogo min na.
[20] Joram si tun ye san bisaba ni fila ye a sigi tuma la masaya la. A ye san segin kɛ masaya la Jerusalɛm. Mɔgɔ si ma nimisa a saya ko la. Mɔgɔ si mago tun t'a la. U y'a su don Dawuda ka dugu kɔnɔ, nka a su ma don masakɛw ka kaburuw kɔnɔ.