[1] Josiasi si san seginnan la, a sigira masaya la. Ale ye san bisaba ni kelen kɛ masaya la Jerusalɛm.
[2] A ye ko ɲuman kɛ Matigi ɲɛ kɔrɔ. A ye a bɛnba Dawuda ka siraw taama, a ma jɛngɛ ka taa kinin wala numan fɛ.
[3] A ka masaya san seginnan la k'a to denmisɛnya la, a y'a bɛnba Dawuda ka Ala ɲinili daminɛ. A ka masaya san tan ni filanan la a ye Juda bɔnsɔn ni Jerusalɛm saniyali daminɛ ka batoli kɛ yɔrɔw ni boliw ni ja dɛsɛnenw bɛɛ bɔ yen.
[4] U ye Baal ka saraka bɔlanw ci a ɲɛ na. Tile bato samasen minw tun bɛ Baal ka saraka bɔlanɲɛ fɛ, a ye olu tiɲɛn ka boliw ni ja dɛsɛnenw ni nɛgɛ yeelelen jaw karikari ka u kɛ buguri ye ka o buguri kɛ u batobaaw kaburuw kan.
[5] O kɔ, a ye o sarakalasebaaw kolow jeni o saraka bɔlanw kan ka Juda bɔnsɔn ni Jerusalɛm saniya o cogo la.
[6] A ye o kɛ Manase bɔnsɔn ni Efrayim bɔnsɔn ani Simeɔn bɔnsɔn ka duguw fana kɔnɔ fo ka taa se Nefitali bɔnsɔn ka duguw ma. A ye o kɛ u lamini yɔrɔw bɛɛ la.
[7] A ye saraka bɔlanw ni ja dɛsɛnenw ci ka boliw karikari ka u kɛ buguri ye. A ye tile bato samasenw bɛɛ karikari ka bɔ Israɛl bɔnsɔn ka jamana bɛɛ la. O kɔ, a seginna ka taa Jerusalɛm.
[8] A ka masaya san tan ni seginnan la, jamana ni Alabatosoba saniyalen kɔ a fɛ, a ye Azalia denkɛ Safan ani dugutigi Maseja ani Joakaz denkɛ tilew kibaru sɛbɛnnikɛla Joak ci ka taa Matigi, a ka Ala ka so labɛn.
[9] Olu taara sarakalasebaa kuntigi Hilkija sɛgɛrɛ. Wari min tun bɛ Ala ka so kɔnɔ ani Levite minw tun bɛ daw kɔlɔsi, olu ye wari min sɔrɔ ka bɔ Manase bɔnsɔn ni Efrayim bɔnsɔn ani Israɛl bɔnsɔn tɔw bɛɛ cɛma ani Juda bɔnsɔn ni Benjamɛn bɔnsɔn ka jamanaw la ani minw sɔrɔla Jerusalɛmkaw bolo, u ye olu bɛɛ di sarakalasebaaw kuntigi Hilkija ma.
[10] O kɔ, u ye o wari di Ala ka so kɔnɔ baara kuntigiw ma, olu k'a di so kɔnɔ baarakɛlaw ma walisa ka Matigi ka so tiɲɛn yɔrɔw dila.
[11] Olu ye o wari di mininsiyew ni masɔnw ma, walisa u ka kabakurun dɛsɛnenw ani so jɔ jiriw ni cɛtigɛ jiriw san walisa Juda bɔnsɔn ka masakɛw ye so minw tiɲɛn, olu ka dila tun.
[12] O mɔgɔw ye u ka baara kɛ ni kantigiya ye. U kuntigiw tun ye Mɛrari bɔnsɔn Levitew Jakat ani Abdiasi ye ani Kɛhat bɔnsɔn Zakari ni Mesulam. Levite bɛɛ tun bɛ fɔlifɛn fɔ cogo dɔn.
[13] U tun bɛ doni talaw fana kun na. Mɔgɔw tun bɛ baara sifa o sifa kɛ, u tun ye olu kɔlɔsibaaw ye. Sɛbɛnnikɛlaw ni kuntigiw ani dakɔlɔsibaaw fana bɔra Levitew la.
[14] Mɔgɔw taara ni wari min ye Matigi ka so kɔnɔ, u ye o ta ka bɔ wari mara yɔrɔ la tuma min na, sarakalasebaa Hilkija ye Matigi ka sariya kitabu ye, o min dira Musa ma.
[15] O tuma la Hilkija y'a fɔ sɛbɛnnikɛla Safan ye ko: «Ne ye sariya kitabu ye Matigi ka so kɔnɔ.» Hilkija y'a don Safan bolo.
[16] Safan taara o kitabu di masakɛ ma ka baara ko dantigɛ a ye fana, ko: «I tun ye baara min di i ka baaradenw ma, u b'a kan.
[17] Wari min sɔrɔla Matigi ka so kɔnɔ, u ye o wari di baara kuntigiw ni baaradenw ma.»
[18] Sɛbɛnnikɛla Safan y'a fɔ masakɛ ye fana ko: «Sarakalasebaaw kuntigi Hilkija ye kitabu dɔ di ne ma.» O tuma la Safan ye o kitabu kalan masakɛ ɲɛ na.
[19] Masakɛ ye sariya kitabu kɔnɔ kuma mɛn tuma min na, o yɔrɔ nin bɛɛ a y'a ka finiw fara.
[20] O kɔ, a y'a fɔ Hilkija ni Safan denkɛ Akikam ni Mise denkɛ Abidon ani sɛbɛnnikɛla Safan ani masakɛ ka baaraden Asaja ye ko:
[21] «Nin kitabu min yera, aw ka taa Matigi ɲininka ne ni Israɛl bɔnsɔn ni Juda mɔgɔ tɔw ye o kitabu kuma ko la. Matigi ka dimiyaba bira an kan, katuguni an bɛnbaw ma Matigi ka kuma mara ka kɛɲɛ ni nin kitabu kuma sɛbɛnnenw bɛɛ ye.»
[22] Hilkija ni masakɛ tun ye mɔgɔ minw ko fɔ, olu taara kiramusoma Hulda sɛgɛrɛ. O tun ye fini kɔlɔsibaa Salum muso ye. Salum fa tun ye Tokehat ye, Tokehat fa tun ye Hasra ye. O kiramusoma sigilen tun bɛ Jerusalɛm kinda filanan la. U taara o ciw fɔ a ye.
[23] Hulda y'a fɔ u ye ko: «Matigi, Israɛl ka Ala ko: ‹Cɛ min ye aw ci ne ma,
[24] aw k'a fɔ o ye ko, Matigi ko: «A filɛ, ne na bɔnɛ bi nin yɔrɔ ani nin mɔgɔw kan, dangali kuma minw bɛɛ kalanna sariya kitabu kɔnɔ Juda bɔnsɔn ka masakɛ ɲɛ na, ne na olu bɛɛ lase u ma.
[25] Juda bɔnsɔn ye ne bila ka wusulan suma dumanw wusu bato fɛn wɛrɛw ye ka ne dusu dimin ni u bolo baara nɔw ye, o de kosɔn ne diminna nin jamana kɔrɔ, o tɛ dabila fewu.»
[26] Juda bɔnsɔn ka masakɛ ta fan fɛ, o minw ye aw ci ka na Matigi ɲininka, aw k'a fɔ o ye ko: «Matigi, Israɛl bɔnsɔn ka Ala ko, i ye ne ka lasiranni kuma minw mɛn,
[27] i dusukun magayara ani i ye i yɛrɛ majigin Ala ɲɛ kɔrɔ k'a masɔrɔ nin kuma minw fɔra nin yɔrɔ ani nin mɔgɔw ko la, i ye o kumaw mɛn minkɛ, i ye i ka finiw fara ka kasi ne ɲɛ kɔrɔ, o de kosɔn ne ye i lamɛn.» Matigi ko ten.
[28] «Ne na i kafo i bɛnbaw kan hɛrɛ la kaburu kɔnɔ. Ne na bɔnɛ minw lase nin yɔrɔ ni nin jamana mɔgɔw ma, i ɲɛ tɛna olu ye.» ›» O cidenw taara o ko fɔ masakɛ ye.
[29] O tuma la masakɛ ye ci bila ka taa Juda bɔnsɔn na cɛkɔrɔbaw ni Jerusalɛmkaw bɛɛ wele.
[30] O kɔ, masakɛ ni Juda bɔnsɔn ni Jerusalɛmkaw donna Matigi ka so kɔnɔ ani sarakalasebaaw ni Levitew ani mɔgɔw bɛɛ, mɔgɔba fara mɔgɔ misɛn kan. Layidu kitabu min yera Matigi ka so kɔnɔ, a ye o bɛɛ kalan u ɲɛ na.
[31] Masakɛ jɔlen tun bɛ samasen kɔrɔ ka layidu ta Matigi ye, ko a na tugu Matigi nɔ fɛ ka a ka ci fɔlenw ni a ka ko latigɛlenw ani a ka sariyaw sira taama ni a dusukun bɛɛ ni a hakili bɛɛ ye ka o sariya kitabu ko sɛbɛnnenw bɛɛ kɛ.
[32] Masakɛ y'a to Jerusalɛmkaw ni Benjamɛn bɔnsɔn fana ka o layidu ta. O kɔ, Jerusalɛmkaw ni o mɔgɔw ye Matigi, u bɛnbaw ka Ala ka layidu kow kɛ.
[33] Josiasi ye Israɛl bɔnsɔn ka bato fɛn haramulenw ka yɔrɔw bɛɛ tiɲɛn ka bɔ jamana kɔnɔ. Mɔgɔ minw tora Israɛl bɔnsɔn fɛ, a ye olu karaba ko olu ka baara kɛ Matigi u ka Ala ye. U ma jɛngɛ ka mabɔ Matigi, u bɛnbaw ka Ala la Josiasi si tile bɛɛ la.