[1] Jerusalɛmkaw ye Joram denkɛw la fitinin kamalen Akazia sigi ka kɛ masakɛ ye a fa nɔ na, k'a masɔrɔ Arabu jamana la kɛlɛbolow tun taara daga yen da la ka a denkɛɲɛmatigiw bɛɛ faga. O de kosɔn Joram denkɛ Akazia sigira ka kɛ Juda bɔnsɔn ka masakɛ ye.
[2] Akazia si tun ye san binaani ni fila ye a sigi tuma la masaya la. A ye san kelen kɛ masaya la Jerusalɛm. A ba tun ye Omri denmuso Atali ye.
[3] Akazia fana ye Akab ka so ka siraw taama, k'a masɔrɔ a ba tun ye a laadibaa ye. O y'a bila ko jugu kɛli la.
[4] A ye ko jugu kɛ Matigi ɲɛ kɔrɔ i ko Akab ka du kɔnɔ mɔgɔw y'a kɛ cogo min na, o min y'a ka mɔgɔw kalan o kow la a fa salen kɔ.
[5] Ka kɛɲɛ ni u ka laadili ye, ale ni Akab denkɛ, Israɛl bɔnsɔn ka masakɛ Joram taara Siri jamana masakɛ Hazaɛl kɛlɛ Galad Ramɔt. Sirikaw y'a jogin.
[6] A kɔseginna Jizreɛl walisa k'a jogindaw fura kɛ. A ye Siri jamana masakɛ Hazaɛl kɛlɛ tuma min na, Sirikaw y'a bana Rama.
[7] O tuma la Juda bɔnsɔn ka masakɛ Joram denkɛ taara Jizreɛl ka taa bɔ Akab denkɛ Joram ye, k'a masɔrɔ a tun man kɛnɛ. O ko tun ye Ala sago ye k'a tɔɔrɔ walisa a ka sa. O cogo la, a selen yen, Akazia ni Joram bɔra ka taa Nimsi denkɛ Jehu kama. Matigi tun ye o ɲɛnatɔmɔ walisa a ka Akab ka so halaki.
[8] K'a sɔrɔ Jehu bɛ kiri bi Akab ka so kan ka kɛɲɛ ni Ala ka kuma ye, Jehu ye Juda bɔnsɔn kuntigiw ani a balimakɛw denkɛw sɔrɔ yen. Olu tun bɛ Akazia ka baara la. A ye olu bɛɛ faga.
[9] O kɔ, a taara Akazia ɲini. O dogolen tun bɛ Samari dugu kɔnɔ. U y'a minɛ ka taa n'a ye Jehu yɔrɔ la k'a faga yen. O kɔ, u y'a su don, k'a masɔrɔ a tun bɛ fɔ ko: «Josafat min ye Matigi ɲini ni a dusukun bɛɛ ye, nin ye a bɔnsɔn ye.» Akazia ka so mɔgɔ si ma to min bɛ se ka kɛ masakɛ ye.
[10] Akazia ba Atali y'a ye ko a denkɛ fagara minkɛ, a wulila ka masa si bɛɛ faga Juda bɔnsɔn cɛma.
[11] Nka Joram denmuso Josabeat ye Akazia denkɛ Joas dogo ka bɔ masa si fagataw cɛma ka o ni a lamɔbaa dogo a ka sibon kɔnɔ Alabatosoba kɔnɔ. Joram denmuso Josabeat tun ye sarakalasebaa Jehojada muso ye. Akazia balimamuso tun don. A ye Joas kisi saya ma o cogo la.
[12] A dogolen tora u fɛ yen san wɔɔrɔ kɔnɔ Ala ka so kɔnɔ k'a sɔrɔ Atali tun bɛ masaya la jamana kun na.