[1] Roboam sera Jerusalɛm tuma min na, a ye Juda bɔnsɔn ni Benjamɛn bɔnsɔn na kɛlɛkɛ cɛ farin waa kɛmɛ ni bisegin lajɛ yɔrɔ kelen na, walisa ka taa Israɛl bɔnsɔn kɛlɛ ka o masaya bɛɛ kɔsegin a ma.
[2] Nka Matigi ka kuma sera Ala ka cɛ Semaɛja ma ko:
[3] «I ka kuma Juda ka masakɛ Roboam, Solomani denkɛ, fɛ ani Israɛl bɔnsɔn minw sigilen bɛ Juda ani Benjamɛn mara la ko
[4] Matigi ko: ‹Aw kana taa, aw kana aw balimaw kɛlɛ. Aw bɛɛ kelen-kelen ka segin ka taa aw ka sow kɔnɔ k'a masɔrɔ nin ko ye ne nɔ ye.›» U ye Matigi kan minɛ ka kɔsegin ka Jeroboam nɔ fɛ taali dabila.
[5] Ayiwa Roboam tora Jerusalɛm. A ye dugu caman barika bonya Juda masaya la.
[6] A ye Bɛtilɛhɛm dugu barika bonya ani Etam ni Tekoa
[7] ni Bɛt-Zur ni Soko ni Adulam
[8] ni Gat ni Maresa ni Zif
[9] ni Adoraim ni Lakis ni Azeka
[10] ni Zorea ni Ajalɔn ani Heborɔn. Olu kɛra Juda bɔnsɔn ni Benjamɛn bɔnsɔn ka dugu barikamaw ye.
[11] A ye u barika bonya ka kuntigiw sigi o duguw kɔnɔ. A ye dumuni ni tulu ni diwɛn caman mara u kɔnɔ.
[12] A ye nɛgɛ bɛnnanw ni tamaw bila o duguw bɛɛ kelen-kelen kɔnɔ ka u barika bonya kosɛbɛ. Juda bɔnsɔn ni Benjamɛn bɔnsɔn tora ale fɛ.
[13] Sarakalasebaa ani Levite minw sigilen tun bɛ Israɛl bɔnsɔn ka jamana kɔnɔ, olu bɛɛ nana u lajɛ a kɔrɔ.
[14] Levitew ye u ka duguw ni u ka lamini forow to yen ka taa u sigi Juda bɔnsɔn ka mara la ani Jerusalɛm, k'a masɔrɔ Jeroboam ni a denkɛw ye u bali ko u kana sarakalasebaaya baara kɛ Matigi ɲɛ kɔrɔ.
[15] Jeroboam tun ye sarakalasebaaw sigi batoli kɛ yɔrɔw kun na ka a ka bakɔrɔw ni misiden bisigi dilalenw bato.
[16] Israɛl siyaw la mɔgɔ minw tun b'a fɛ ka Matigi, Israɛl ka Ala bato ni u dusukunw bɛɛ ye, olu tugura o Levitew nɔ fɛ ka taa Jerusalɛm walisa u ka sarakaw faga u bɛnbaw ka Ala ye yen.
[17] U ye barika di Solomani denkɛ Roboam fana ma ka a ka masaya sabati san saba kɔnɔ, k'a masɔrɔ u taamana Dawuda ni Solomani ka siraw fɛ san saba kɔnɔ.
[18] Roboam ye Jerimot denmuso Mahalat ta k'a kɛ a muso ye. Jerimot tun ye Dawuda denkɛ ye. Mahalat ba tun ye Abihail ye. Abihail fa tun ye Eliab ye, Eliab fa tun ye Isayi ye.
[19] Mahalat ye denkɛ saba bange a ye, olu tun ye Jeus ni Semaria ani Zaham ye.
[20] O kɔ, Roboam ye Absalɔm denmuso Maka ta. O ye Abija ni Atai ni Ziza ani Selomit bange.
[21] Absalɔm denmuso Maka ko tun ka di Roboam ye ka tɛmɛn a muso furulenw ni a ka muso wɛrɛ talenw bɛɛ kan, k'a masɔrɔ furu muso tan ni segin ani muso wɛrɛ talen biwɔɔrɔ tun bɛ a fɛ. A ye denkɛ mugan ni segin ani denmuso biwɔɔrɔ sɔrɔ.
[22] Roboam ye jɔyɔrɔ fɔlɔ di Maka denkɛ Abija ma ka o kɛ a balimaw kuntigi ye, k'a masɔrɔ a tun b'a fɛ ka o kɛ masakɛ ye.
[23] A ye o ko kɛ ni hakilitigiya ye ka a denkɛ tɔw bɛɛ jɛnsɛn Juda bɔnsɔn ni Benjamɛn bɔnsɔn ka jamana dugu barikamaw kɔnɔ ka balo caman di u ma ka muso caman furu u ye.