[1] Amazia sigira masaya la a si san mugan ni duurunan la. A ye san mugan ni kɔnɔntɔn kɛ masaya la Jerusalɛm. A ba tɔgɔ ko Joadan ka bɔ Jerusalɛm.
[2] A ye ko ɲuman kɛ Matigi ɲɛ kɔrɔ, nka a m'a kɛ ni dusukun dafalen ye.
[3] A ka masaya fanga bonyara tuma min na, a ka baaraden minw ye a fa masakɛ faga, a ye olu faga.
[4] Nka a ma olu denw faga ka kɛɲɛ ni Musa ka sariya ko sɛbɛnnen ye, i ko Matigi ye o ci di cogo min na ko: «Faw kana faga u denw kosɔn, denw kana faga u faw kosɔn, nka mɔgɔw bɛɛ kelen-kelen ka faga a yɛrɛ ka jurumu kosɔn.»
[5] Amazia ye Juda bɔnsɔn lajɛ yɔrɔ kelen na ka u sigi cɛ waa kelen-kelen kuntigiw ani cɛ kɛmɛ-kɛmɛ kuntigiw bolo ka kɛɲɛ ni u bɛnbaw bɔnsɔnw ye, Juda bɔnsɔn ni Benjamɛn bɔnsɔn bɛɛ. A ye mɔgɔw dan k'a daminɛ san mugan mɔgɔw la ka taa bila u ɲɛ mɔgɔw la. A ye kɛlɛkɛ cɛ waa kɛmɛ saba sɔrɔ minw bɛ se ka kɛlɛ kɛ ni tama ni nɛgɛ bɛnnan ye.
[6] A ye cɛ farin ja gɛlɛn waa kɛmɛ fana sɔrɔ ka bɔ Israɛl bɔnsɔn na ka u sara ni warijɛ talan kɛmɛ ye.
[7] Nka Ala ka cɛ dɔ nana Amazia sɛgɛrɛ k'a fɔ a ye ko: «Masakɛ, i kana sɔn Israɛl bɔnsɔn ka kɛlɛkɛ cɛw ka taa i fɛ, katuguni Matigi tɛ Israɛl bɔnsɔn ni a denkɛ Efrayim bɔnsɔn si fɛ.
[8] Hali ni i taara ni o mɔgɔw ye, Ala na i don i juguw bolo katuguni se bɛ Ala ye ka mɔgɔ dɛmɛ ani ka mɔgɔ bi.»
[9] Amazia ye Ala ka cɛ ɲininka ko: «Ne ye warijɛ talan kɛmɛ min di Israɛl bɔnsɔn ka kɛlɛbolo ma, o na kɛ di?» Ala ka cɛ y'a jaabi ko: «Matigi bɛ se ka o ɲɔgɔn caman di i ma ko kura.»
[10] Ayiwa kɛlɛbolo min tun nana ka bɔ Efrayim bɔnsɔn cɛma, Amazia ye olu fara ka bɔ a ta la walisa olu bɛɛ ka taa u ka so, nka o mɔgɔw diminna Juda bɔnsɔn kɔrɔ kosɛbɛ. U diminnenba kɔseginna ka taa u ka yɔrɔw la.
[11] O tuma la Amazia ye ja gɛlɛya sɔrɔ ka a ka kɛlɛboloɲɛ minɛ ka taa ni u ye jɛkɛnɛ kɔgɔma la. A ye Sirikaw la cɛ waa tan faga.
[12] Juda bɔnsɔn ye cɛ waa tan wɛrɛɲɛnama minɛ ka taa ni olu ye fara yɔrɔ la kulu kan ka u bɛɛ ɲɔni ka u bi dingɛ kɔnɔ ka u faga.
[13] Nka Amazia tun ye Israɛl bɔnsɔn kɛlɛkɛ cɛ minw bila ka taa so, ko u kana taa a fɛ kɛlɛ la, olu taara bi Juda bɔnsɔn duguw kan k'a daminɛ Samari fo ka taa se Bɛt-Horɔn. U ye mɔgɔ waa saba faga ka fɛn caman cɛ.
[14] Amazia selen kɔ ka bɔ Edɔmkaw faga yɔrɔ la, a ye Seir bɔnsɔn ka bato fɛnw ta ka olu kɛ a yɛrɛ ka bato fɛnw ye ka i biri u kɔrɔ ka wusulan suma duman wusu u ye.
[15] Matigi diminna Amazia kɔrɔ kosɛbɛ. A ye kira dɔ ci Amazia ma k'a fɔ a ye ko: «Nin siya ka bato fɛn minw ma se ka u yɛrɛw tila ka bɔ i bolo, mun kosɔn i taara o mɔgɔw ka bato fɛnw ɲini ka na ni olu ye?»
[16] Ka o kira to kuma la, Amazia y'a fɔ a ye ko: «Yala ne ye i sigi ka kɛ masakɛ laadibaa ye wa? I ka bɔ yan! Yala i b'a fɛ an ka i gosi wa?» Kira bɔra a kɔrɔ k'a fɔ a ye ko: «Ne y'a dɔn ko Ala b'a fɛ ka i faga, k'a masɔrɔ i ye ko jugu kɛ. I ma sɔn ka ne ka laadilikan fana lamɛn.»
[17] Ayiwa Juda ka masakɛ Amazia ye laadibaaw ɲininka. O kɔ, a ye ci bila ka taa Israɛl masakɛ Joas sɛgɛrɛ k'a fɔ o ye ko: «Na, an kaɲɔgɔn ye ɲɛda niɲɛda.» Ayiwa Joas fa tun ye Joakaz ye. Joakaz fa tun ye Jehu ye.
[18] Israɛl bɔnsɔn ka masakɛ Joas ye Juda bɔnsɔn ka masakɛ Amazia jaabi ko: «Liban ŋɔni sun ye ci bila ka taa fɔ Liban sedere sun ye ko: ‹I ka i denmuso furu ne denkɛ ma,› nka Liban kungo kɔnɔ waraw tɛmɛntɔ ye o ŋɔni sun cɔngɔ u sen kɔrɔ.
[19] E b'a fɔ ko i ye se sɔrɔ Edɔmkaw kan, o kosɔn i dusukun falen bɛ kuncɛbaya la. Ayiwa i ka to i ka so sisan. Mun kosɔn i bɛ boli bɔnɛ nɔ fɛ ka ko jugu lase i ni Juda bɔnsɔn ma?»
[20] Nka Amazia ma sɔn ka o kuma lamɛn, k'a masɔrɔ o kow bɛɛ tun ye Ala nɔ ye walisa ka Juda bɔnsɔn don Joas bolo, katuguni u ye Edɔmkaw ka bato fɛnw bato.
[21] O tuma la Israɛl bɔnsɔn ka masakɛ Joas taara a kama. U y'a daminɛ kaɲɔgɔn kɛlɛ Bɛt-Semɛs, Juda bɔnsɔn ka jamana la.
[22] Juda bɔnsɔn gosira Israɛl bɔnsɔn ka kɛlɛbolo fɛ fo u bolila ka taa u ka finisow kɔnɔ.
[23] Israɛl bɔnsɔn ka masakɛ Joas ye Juda bɔnsɔn ka masakɛ Amazia minɛ Bɛt-Semɛs ka taa n'a ye Jerusalɛm. Joas fa tun ye Joakaz ye. U ye nɔnkɔnɲɛ kɛmɛ naani ci Jerusalɛm lamini kogo la, k'a daminɛ Efrayim donda la ka taa bila seleke la donda la.
[24] A ye sanu ni warijɛ bɛɛ cɛ ani minan sɔngɔ gɛlɛn minw tun bɛ Ala ka so kɔnɔ Obɛd-Edɔm bolo ani masaya so ka nafolo, ka taa ni olu ani mɔgɔ minɛlenw ye Samari.
[25] Joas denkɛ Juda bɔnsɔn ka masakɛ Amazia ye san tan ni duuru sɔrɔ Joakaz denkɛ Joas, Israɛl bɔnsɔn ka masakɛ salen kɔ.
[26] Amazia ka ko tɔw, a daminɛw ni a labanw bɛɛ sɛbɛnnen bɛ Juda bɔnsɔn ni Israɛl bɔnsɔn ka masakɛw ka kitabu kɔnɔ.
[27] Kabini Amazia murutira Matigi ma, u ye jɛ siri a kama Jerusalɛm. A bolila ka taa Lakis, nka u y'a nɔgɛn ka taa se fo Lakis k'a faga yen.
[28] O kɔ, u y'a su ta yɛlɛnkan so kan ka taa n'a ye k'a su don a bɛnbaw fɛ Juda bɔnsɔn ka dugu kɔnɔ.