[1] San wolonwulanan la Jehojada ye ja gɛlɛya sɔrɔ. A ni cɛ kɛmɛ-kɛmɛ kuntigiw ye layidu taɲɔgɔn ye. Olu tun ye Jeroham denkɛ Azaria ni Jokanan denkɛ Isumaɛl ni Obɛd denkɛ Azaria ni Adaja denkɛ Maseja ani Zikiri denkɛ Elisafat ye.
[2] U ye Juda jamana yaala ka Levitew lajɛɲɔgɔn fɛ ka bɔ Juda duguw bɛɛ la ka Israɛl bɔnsɔnw bɛnbaw kuntigiw fana lajɛ. U taara Jerusalɛm.
[3] O jama bɛɛ ni masakɛ jɛra Ala ka so kɔnɔ. Jehojada y'a fɔ ko: «Masakɛ denkɛ filɛ nin ye. A ka kan ka sigi masaya la ka kɛɲɛ ni Matigi ka layidu talen ye Dawuda bɔnsɔn ko la.
[4] Ayiwa aw ka min kɛ, o filɛ nin ye. Aw sarakalasebaaw ni Levitew tila kelen na don ka baara kɛ lafiɲɛ don nata ka Alabatosoba daw kɔlɔsi.
[5] Aw tila filanan na masakɛ ka so kɔlɔsi. Aw tila sabanan na Jesod da kɔlɔsi. Mɔgɔ tɔw na u jɔ Matigi ka so dukɛnɛ la.
[6] Mɔgɔ si kana don Matigi ka so kɔnɔ fɔ sarakalasebaa ni Levite minw bɛ o baara la. Olu kɔni na don, k'a masɔrɔ olu bilara Ala ye. Mɔgɔ tɔw ta fan fɛ, olu ka kan ka Matigi ka ci fɔlenw sira taama.
[7] Levitew na masakɛ lamini, u bɛɛ kelen-kelen ka kɛlɛkɛ minanw ka kɛ u bolo. Ni mɔgɔ o mɔgɔ donna Alabatosoba kɔnɔ, o ka faga. Aw na masakɛ lamini a taa yɔrɔw bɛɛ la.»
[8] Ayiwa Levitew ni Juda bɔnsɔnw ye sarakalasebaa Jehojada ka ci fɔlenw bɛɛ kɛ. Kuntigiw bɛɛ kelen-kelen ye u ka mɔgɔw lajɛ u ka lafiɲɛ don baara kama. Kulu minw tun bɛ bɔ ani minw tun bɛ don baara la, Jehojada ma sɔn olu si ka taa.
[9] Masakɛ Dawuda ka tamaw ni a ka nɛgɛ bɛnnan kɔrɔw, kunbaba ni misɛnman minw tun bɛ Ala ka so kɔnɔ, sarakalasebaa Jehojada ye olu di cɛ kɛmɛ-kɛmɛ kuntigiw ma.
[10] O kɔ, a ye mɔgɔw jɔ ka masakɛ lamini k'a daminɛ saraka bɔlan na fo ka taa se Alabatosoba ma. U bɛɛ kelen-kelen ka kɛlɛkɛ minanw tun bɛ u bolo k'a daminɛ Alabatosoba kinin yanfan fɛ fo ka taa se numan yanfan fɛ.
[11] O tuma la u ye masakɛ denkɛ madon ka masafugula don a kun na ka sariya di a ma. A sigira ka kɛ masakɛ ye. Jehojada ni a denkɛw y'a mun ni masaya tulu ye ka pɛrɛn ko: «Masakɛ ka si sɔrɔ badaa.»
[12] O tuma la masamusoma Atali ye mɔgɔw bolikan ni masakɛ tanulikan mɛn minkɛ, a taara don jama cɛma Matigi ka so kɔnɔ,
[13] ka filɛli kɛ. A ye masakɛ jɔlen ye banbe kan Alabatosoba donda la. Sɔrɔdasi kuntigi ni a ka kɛlɛkɛ cɛw jɔlen tun bɛ masakɛ kɛrɛ fɛ. Jamana kɔnɔ mɔgɔw bɛɛ ɲagalilen tun don. U ye buru fyɛ, dɔnkili dalaw ye mɔgɔw ɲɛ minɛ ni fɔlifɛnw ye. O tuma la Atali y'a ka finiw fara k'a fɔ ko: «Janfa kɛra! Janfa kɛra!»
[14] Cɛ kɛmɛ-kɛmɛ kuntigi minw tun bɛ kɛlɛboloɲɛ minɛ, sarakalasebaa Jehojada y'a fɔ olu ye ko: «A' ye a labɔ aw niɲɔgɔn cɛ, ni mɔgɔ min tugura a nɔ fɛ, o ka faga ni npan ye.» Sarakalasebaa y'a fɔ ko a kana faga Alabatosoba kɔnɔ.
[15] U ye sira bila a ɲɛ. A taara masaya so kɔnɔ. A sera yɛlɛnkan sow donda la tuma min na, u y'a faga yen.
[16] Sarakalasebaa Jehojada ye layidu ta a yɛrɛ ni mɔgɔw ani masakɛ cɛ ka layidu ta ko u na kɛ Matigi ka mɔgɔw ye.
[17] Mɔgɔw bɛɛ taara Baal batoso kɔnɔ ka a saraka bɔlanw ni a jaw karikari ka Baal ka sarakalasebaa Matan faga saraka bɔlan kɔrɔ.
[18] Jehojada ye kɔlɔsilikɛla dɔw sigi Matigi ka so kɔnɔ, sarakalasebaa Levitew tun bɛ olu kun na. Dawuda tun ye Levitew sigi ka kɛ kulu-kulu ye Matigi ka so kɔnɔ walisa u ka sarakaw ni saraka jenitaw bɔ Matigi ye i ko a sɛbɛnnen bɛ Musa ka sariya la cogo min na, k'a kɛ niɲagali ni dɔnkili dali ye i ko Dawuda y'a fɔ cogo min na.
[19] Jehojada ye dakɔlɔsibaaw fana sigi Matigi ka so daw la walisa mɔgɔ nɔgɔlen si kana don yen.
[20] A taara ni cɛ kɛmɛ-kɛmɛ kuntigiw ni mɔgɔ tɔgɔba dɔw ye minw bɛ mɔgɔw kun na ani jamana kɔnɔ mɔgɔw bɛɛ, ka masakɛ bilasira ka bɔ n'a ye Matigi ka so kɔnɔ ka taa n'a ye masaya so kɔnɔ daba da la. U ye masakɛ sigi masaya masasigilan kan.
[21] Jamana kɔnɔ mɔgɔw bɛɛ ɲagalila. Kabini u ye masamusoma Atali faga ni npan ye, dugu ye lafiya sɔrɔ.