[1] O kow bɛɛ bannen kɔ, Israɛl bɔnsɔn minw tun bɛ yen, olu bɛɛ taara Juda duguw kɔnɔ ka ja dilalenw ni boliw ni batoli kɛ yɔrɔw ani saraka bɔlanw bɛɛ karikari ka bɔ Juda bɔnsɔn ni Benjamɛn bɔnsɔn ni Efrayim ni Manase ka yɔrɔw la. U ma hali u kelen to yen. O kɔ, Israɛl bɔnsɔn bɛɛ taara u ka duguw kɔnɔ. U bɛɛ taara u ka so.
[2] Ezekiasi ye sarakalasebaaw ni Levitew kuluw sigi ka kɛɲɛ ni u kulu-kulu ye. Sarakalasebaaw ni Levitew bɛɛ kelen-kelen ye u ka baara kɛ ka saraka jenitaw ni nisɔndiya sarakaw lase ka batoli baara kɛ ka dɔnkili da ka Ala tanu Matigi ka so dondaw la.
[3] Masakɛ fana ye a ka fɛn dɔw di ka kɛ saraka jenitaw ye, sɔgɔma ni wula fɛ ani lafiɲɛ don saraka jenitaw ni kalo kura taw ani seli don taw, i ko a sɛbɛnnen bɛ Matigi ka sariya la cogo min na.
[4] A y'a fɔ Jerusalɛmkaw ye fana ko fɛn minw ka kan ka di sarakalasebaaw ni Levitew ma, u ka na ni olu ye walisa u ka u yɛrɛw bɛɛ don Matigi ka baara la.
[5] O ci fɔra tuma min na, Israɛl bɔnsɔn ye u ka suman kura kun fɔlɔw caman di ka bɔ alikama ni diwɛn ni tulu ni di ani foro la sumanw bɛɛ la. U taara ni u ka suman jakaw bɛɛ ye. U tun ka ca.
[6] Israɛl bɔnsɔn ni Juda bɔnsɔn minw sigilen tun bɛ Juda duguw kɔnɔ, olu fana taara ni u ka bagan kunbaw ni u ka bagan misɛnw jakaw ye. Fɛn senuma minw tun bilara Matigi, u ka Ala ye, u ye olu fana jaka bɔ, ka u tonto.
[7] U ye o tontoli baara daminɛ san kalo sabanan la k'a laban san kalo wolonwulanan la.
[8] Ayiwa, masakɛ Ezekiasi ni kuntigiw nana ka o fɛn tontolenw filɛ tuma min na, u ye foli di Matigi ni a ka mɔgɔw, Israɛl bɔnsɔn ma.
[9] Ezekiasi ye sarakalasebaaw ni Levitew ɲininka o fɛn tontolenw ko la.
[10] Sarakalasebaaw kuntigi Azaria min bɔra Zadɔk ka so, o y'a jaabi ko: «Kabini mɔgɔw y'a daminɛ ka na ni nili fɛnw ye Matigi ka so kɔnɔ, an ye dumuni kɛ, an fara fo ka a tɔ to, k'a masɔrɔ Matigi dubara a ka mɔgɔw ye, a tɔ caman tolen filɛ nin ye.»
[11] O tuma la masakɛ Ezekiasi y'a fɔ ko u ka bon dɔw labɛn Matigi ka so kɔnɔ. U ye u labɛn
[12] ka jakaw ni nili fɛnw ani fɛn senumaw bila u kɔnɔ ni kantigiya ye. Levite Konania tun ye o koɲɛnabɔbaa ye, a balimakɛ Simei tun ye a dankan ye.
[13] Jehiɛl ni Azazia ni Nahat ni Asaɛl ni Jerimot ni Jozabad ni Eliɛl ni Jismakia ni Makat ani Benaja kɛra Konania ni a balimakɛ Simei dɛmɛbaaw ye ka kɛɲɛ ni masakɛ Ezekiasi ni Ala ka so kuntigi Azaria ka ci dilen ye.
[14] Levite Jimina denkɛ Korɛ, kɔrɔn fɛ dakɔlɔsibaa sigira ka kɛ Ala ka diyaɲe nili fɛnw kɔlɔsibaa ye, walisa a ka Matigi sɔn fɛnw ani fɛn senuma senumaw tilatila.
[15] Sarakalasebaaw ka duguw la, Edɛn ni Menjamɛn ni Josue ni Semaɛja ni Amaria ani Sekania tun farala a kan ka a kɛ olu kuntigi ye walisa u ka o fɛnw tila u balimaw cɛ ni kantigiya ye, mɔgɔ misɛn ni mɔgɔba bɛɛ ka dama kɛɲɛ ka kɛɲɛ ni u ka kuluw ye,
[16] ani minw bɛɛ tɔgɔw sɛbɛnna buruju sɛbɛn la k'a daminɛ san saba mɔgɔw la ka taa ɲɛ, olu bɛɛ minw tun bɛ don Matigi ka so kɔnɔ don o don ka u ka baara kɛ ka kɛɲɛ ni u ka baaraw ni u ka kuluw ye.
[17] Sarakalasebaaw fana sɛbɛnna ka kɛɲɛ ni u bɛnbaw ka gwaw ye ani Levitew fana k'a daminɛ san mugan mɔgɔw la ka taa ɲɛ ka kɛɲɛ ni u ka baaraw ni u ka kuluw ye.
[18] O jama bɛɛ ni u denw ani u musow sɛbɛnna, u denkɛw ni u denmusow, katuguni u bilara yɔrɔ senuma baara kama ni kantigiya ye.
[19] Aron bɔnsɔn sarakalasebaa minw sigilen tun bɛ dugubaw kɔnɔ ani bugufyɛw ni u laminiw na, cɛ dɔw tɔgɔ fɔra o yɔrɔw bɛɛ kelen-kelen na walisa olu ka sarakalasebaaw ni Levite cɛmaw niyɔrɔw tilatila u cɛ.
[20] Masakɛ Ezekiasi y'a kɛ o cogo la Juda bɔnsɔn ka jamana yɔrɔw bɛɛ la. Ale ye ko ɲuman ni ko tilennenw ni ko jɛlenw kɛ Matigi, a ka Ala ɲɛ kɔrɔ.
[21] A ye fɛn o fɛn kɛ Matigi ka so kɔnɔ ani sariya ni ci fɔlenw ko la ka a ka Ala sago ɲini, a ye o kow bɛɛ kɛ ni a dusukun bɛɛ ye, o kow ɲɛna.