[1] Masakɛ Ezekiasi ka kantigiya jiralen kɔ Ala ta fan fɛ, Asiri masakɛ Sankerib donna Juda jamana la ka daga dugu barikamaw da la walisa ka u minɛ.
[2] Ezekiasi y'a ye ko Sankerib nana ka Jerusalɛm kɛlɛ tuma min na,
[3] a ni a ka kuntigiw ni a ka kɛlɛkɛ cɛ farinw kumanaɲɔgɔn fɛ ko u na dugu kɔ fɛ ji dingɛw datugu. U bɛɛ y'a dɛmɛ o kow la.
[4] O tuma la, u caman ye ɲɔgɔn lajɛ ka o ji dingɛw bɛɛ datugu ani kɔji min bɛ woyo ka jamana cɛ tigɛ. U ko: «Mun kosɔn, ni Asiri masakɛw sera yan u ka ji caman sɔrɔ?»
[5] Ezekiasi ja gɛlɛyara. Dugu lamini kogo min tun tiɲɛnna, a ye o jɔ ko kura ka kogo janya fo ka se sankanso janw ma. A ye lamini kogo wɛrɛ jɔ kɛnɛma ka Dawuda ka dugu barika bonya. A ye tama caman ni nɛgɛ bɛnnan caman dila.
[6] A ye kuntigiw sigi kɛlɛkɛ cɛw kun na ka olu lajɛ o kɔrɔ dugu fɛrɛkɛnɛ la ka olu jija ko:
[7] «A' ye aw barika bonya ka aw ja gɛlɛya. Aw kana siran foyi la, aw kan'a to Asiri masakɛ ni a fɛ cɛ dama dɔnbali ka aw ja wuli katuguni anɲinw ka ca ni a ta ye.
[8] Bolo farisogoma bɛ ale fɛ, nka Matigi an ka Ala bɛ an fɛ ka an dɛmɛ ka kɛlɛ kɛ an ye.» Mɔgɔw ye u jigi da Juda ka masakɛ Ezekiasi ka kumaw kan.
[9] O kow kɔ, Asiri masakɛ Sankerib ni a ka kɛlɛbolow bɛɛ tun bɛ Lakis da fɛ. K'a to yen a ye a ka kuntigi dɔw ci masakɛ Ezekiasi ani Juda bɔnsɔn bɛɛ ma Jerusalɛm k'a fɔ u ye
[10] ko Asiri masakɛ Sankerib ko: «Aw jigi bɛ mun kan fo aw degunnen bɛ to Jerusalɛm?
[11] Yala aw m'a dɔn ko Ezekiasi bɛ aw lafili ka aw faga ni kɔngɔ ni minnɔgɔ ye wa? A ko, Matigi aw ka Ala na aw tila Asiri masakɛ la.
[12] Yala aw m'a dɔn ko o Ezekiasi de ye batoli kɛ yɔrɔw ni Matigi ka saraka bɔlanw ci ka ci di Juda bɔnsɔn ni Jerusalɛmkaw ma ko aw ka batoli kɛ saraka bɔlan kelenɲɛ fɛ ka suma diyalan wusu o kan wa?
[13] Ne ni ne faw ye min kɛ jamana wɛrɛ mɔgɔw la, aw ma o dɔn wa? O jamana siyaw ka bato fɛnw sera ka u tila ne la wa?
[14] Ne faw ye o siyaw ka jamana minw halaki, u la jumɛn ka bato fɛnw sera ka u tila ne la? Aw ka Ala na se ka aw tila ne la cogo di?
[15] Ayiwa sisan aw kana sɔn Ezekiasi ka aw lafili. Aw kana aw jigi da a kan katuguni siya si ka bato fɛn si wala masaya si ma se ka a ka mɔgɔw tila ne ni ne faw la. O cogo la aw ka Ala tɛ se ka aw tila ne la.»
[16] Masakɛ Sankerib ka baaradenw ye kuma jugu fɔ Matigi Ala ni a ka baaraden Ezekiasi ma.
[17] Asiri masakɛ ye lɛtɛrɛ sɛbɛn fana ka Matigi, Israɛl bɔnsɔn ka Ala neni k'a fɔ ko: «Jamana wɛrɛw ka bato fɛnw ma se ka u ka mɔgɔw tila ne la cogo min na, o cogo la Ezekiasi ka Ala tɛna se ka a ka mɔgɔw tila ne la.»
[18] A ka baaradenw pɛrɛnna ni kanba ye Yahutu kan na Jerusalɛmkaw kama walisa kogo sanfɛ mɔgɔw k'a mɛn ka siran kosɛbɛ, walisa u ka se ka dugu minɛ.
[19] U kumana Jerusalɛmkaw ka Ala ko la i ko dugukolo kan mɔgɔw ka bato fɛnw, mɔgɔ bolow ye olu minw dila.
[20] O tuma la masakɛ Ezekiasi ni Amoz denkɛ kira Esayi ye delili daminɛ ka u kan lase sankolo la.
[21] Matigi ye mɛlɛkɛ dɔ ci ka taa Asirikaw ka masakɛ ka daga la ka u ka kɛlɛkɛ cɛ farinw bɛɛ ni u ka faamaw ani u ka kɛlɛ kuntigiw bɛɛ halaki ka u ban. Asiri masakɛ maloyalen kɔseginna ka taa a ka jamana la. A donna a ka bato fɛn ka so kɔnɔ. A yɛrɛ denkɛw y'a faga ni npan ye yen.
[22] Ayiwa Matigi ye masakɛ Ezekiasi ni Jerusalɛmkaw tila Asiri masakɛ Sankerib ani u jugu tɔw bɛɛ la ka hɛrɛ di u ma u fan bɛɛ la.
[23] Mɔgɔ caman taara Jerusalɛm ka nili fɛnw di Matigi ma ka fɛn sɔngɔ gɛlɛnw di Juda ka masakɛ Ezekiasi ma. Kabini o tuma la siyaw bɛɛ ye a jate mɔgɔba ye.
[24] O waati la Ezekiasi banana fo a tun bɛ na sa. A ye Matigi deli, o y'a ka delili lamɛn ka taamashyɛn di a ma ko a na kɛnɛya.
[25] Nka Ezekiasi ma barika da Ala ye, kuncɛbaya y'a minɛ. O de kosɔn Matigi diminna ale ni Juda bɔnsɔn ani Jerusalɛm kɔrɔ.
[26] O waati la Ezekiasi ni Jerusalɛmkaw y'u yɛrɛ majigin u ka kuncɛbaya ko la. O cogo la Matigi ma a ka dimiya bi u kan Ezekiasi tilew la.
[27] Ezekiasi ye nafolo caman ni bonyaba sɔrɔ. A ye nafolo mara yɔrɔw dila a ka wari ni a ka sanu ni a ka fɛnɲuman ni tulu suma dumanw ani a ka nɛgɛ bɛnnanw ani a ka fɛn sɔngɔ gɛlɛnw bɛɛ ye, ka u bɛɛ bila u kɔnɔ.
[28] A ye bonw jɔ a ka alikama ni a ka diwɛn ani tulu ye. A ye bagan sifaw bɛɛ mara ka sinsan dila a ka bagankuluw ye.
[29] A ye dugubaw sigi ka bagan kunbaw ni bagan misɛnw bila olu kɔnɔ k'a masɔrɔ Ala y'a kɛ fɛntigiba ye.
[30] Ale, Ezekiasi ye Gihɔn ji boyi fana da geren ka a ji woyo sira dila dugukolo jukɔrɔ Dawuda ka dugu ni tilebi cɛ. Ayiwa Ezekiasi ka baara bɛɛ ɲɛna.
[31] Kabako min kɛra jamana la, Babilonɛ faamaw ye mɔgɔw bila ka taa a ɲininka o la. Ala ye a to a yɛrɛma o ko la walisa a ka a kɔrɔbɔ ka a kɔnɔna kow bɛɛ dɔn.
[32] Masakɛ Ezekiasi ka ko tɔw, a ka kantigiya kow, olu bɛɛ sɛbɛnnen bɛ Amoz denkɛ kira Esayi ka hakili jigin kitabu ani Juda bɔnsɔn ni Israɛl bɔnsɔn ka masakɛw ka kitabu kɔnɔ.
[33] O kɔ, Ezekiasi sunɔgɔra a bɛnbaw fɛ. A sara tuma min na, u y'a su don Dawuda bɔnsɔnw ka san fɛ kaburu kɔnɔ. Juda bɔnsɔn bɛɛ ani Jerusalɛmkaw bɛɛ y'a bonya kosɛbɛ. A denkɛ Manase sigira masaya la a nɔ na.